អន្តរជាតិ
នយោបាយអន្តរជាតិ
×![]()
ដោយ: ថ្មីៗ
ការបន្តសកម្មភាពដ៏គឃ្លើននៃបាញ់សាកល្បងអាវុធនុយក្លេអ៊ែររបស់រដ្ឋាភិបាលក្រុងព្យុងយ៉ាងបាននិងកំពុងតែគម្រាមកំហែងដល់សន្តិសុខនៅក្នុងតំបន់ ជាពិសេសនោះ ប្រទេសជិតខាងដែលរួមមានជប៉ុន និងកូរ៉េខាងត្បូង។ ស្របជាមួយបញ្ហានេះ រដ្ឋាភិបាលក្រុងតូក្យូ និងក្រុងវ៉ាស៊ីនតោន បានព្រមព្រៀងគ្នា ក្នុងការពង្រឹងកិច្ចសហប្រតិបត្តិការដើម្បីឆ្លើយតបទៅសកម្មភាពកូរ៉េខាងជើងផងដែរ។ 
ជប៉ុន និងអាមេរិក នៅថ្ងៃទី១៨ ខែមេសានេះ បានព្រមព្រៀងដើម្បីពង្រឹងកិច្ចសហប្រតិបត្តិការក្នុងការចាត់វិធានការឆ្លើយតបទៅនឹងសកម្មភាព និងមហិច្ឆតារបស់កូរ៉េខាងជើងក្នុងការអភិវឌ្ឍអាវុធនុយក្លេអ៊ែរ។ កិច្ចព្រមព្រៀងនេះ ធ្វើឡើងក្នុងឱកាសនៃជំនួបក្នុងក្រុងតូក្យូរវាងអនុរដ្ឋមន្ត្រីការបរទេសជប៉ុន Akitaka Saiki និងអនុរដ្ឋមន្ត្រីការបរទេសអាមេរិក លោក Antony Blinken ដែលជាជំនួបដែលស្របនឹង របាយការណ៍ដែលថាកូរ៉េខាងជើង ត្រៀមបាញ់អាវុធនុយក្លេអ៊ែរទី៥របស់ខ្លួនផងដែរនោះ។
«យើងត្រូវតែបន្តចាត់វិធានដែលមានប្រសិទ្ធភាពប្រឆាំងកូរ៉េខាងជើង និងតែងតែចងចាំជានិច្ចថា ប្រទេសនោះ អាចនឹងធ្វើសកម្មភាពបង្កហេតុគ្រប់ពេល»។ នេះជាអះអាងរបស់លោក Akitaka Saiki នាឱកាសនៃសន្និសីទកាសែតក្រោយជំនួបជាមួយលោក Antony Blinken ដែលរាយការណ៍ដោយភ្នាក់ ងារព័ត៌មាន Xinhua ដែលបានបន្ថែមដែរថា កិច្ចប្រជុំបីភាគីដែលរួមមានជប៉ុន អាមេរិក និងកូរ៉េខាងត្បូង ស្តីពីបញ្ហាការពារ និងសន្តិសុខក្នុងតំបន់ ក៏ត្រូវប្រព្រឹត្តឡើងនៅថ្ងៃស្អែក ក្នុងក្រុងសេអ៊ូលផងដែរ។
សូមបញ្ជាក់ផងដែរ ថ្មីៗនេះ មានរបាយការណ៍ចារកម្មមួយដែលចុងក្រោយត្រូវបានទទួលស្គាល់ដោយប្រធានាធិបតីកូរ៉េខាងត្បូង បានបង្ហាញថា កូរ៉េខាងជើង កំពុងតែត្រៀមបាញ់សាកល្បងអាវុធនុយក្លេ អ៊ែរលើកទី៥មុនពេលនៃសមាជជាតិរបស់ខ្លួនដែលសកម្មភាពនេះ បានបំពានទៅនឹងបម្រាមរបស់អង្គការសហប្រជាជាតិជាថ្មី។ ការបាញ់លើកទី៤របស់កូរ៉េខាងជើង ត្រូវបានធ្វើឡើងកាលពីថ្ងៃទី០៦ ខែ មករាកន្លងទៅ។
សូមរម្លឹកផងដែរថា ក្រុមប្រឹក្សាសន្តិសុខអង្គការសហប្រជាតិនៅថ្ងៃទី០២ ខែមីនាបានអនុម័តជាឯកច្ឆ័នលើសេចក្តីសម្រេចថ្មីមួយទៀតប្រឆាំងសកម្មភាពដ៏គឃ្លើនរបស់កូរ៉េខាងជើងក្នុងការបាញ់សាកល្បងគ្រាប់បែកមីស៊ីលតាំងពីឆ្នាំ២០១៤ និង២០១៥ និងជាពិសេសនោះការបាញ់គ្រាប់បែកបរមាណូនៅថ្ងៃទី០៦ ខែមករា និងនៅថ្ងៃទី០៧ ខែកុម្ភៈ ឆ្នាំ២០១៦នេះ។ សេចក្តីសម្រេចលេខ២២៧០ ដែលបានបញ្ញាត្តិ៥២ចំណុចនោះ ត្រូវបានចាត់ទុកថាជាទណ្ឌកម្មមួយដ៏ធ្ងន់ធ្ងរបន្ថែមលើទណ្ឌកម្មដែលបានអនុម័តដោយក្រុមប្រឹក្សាសន្តិសុខកន្លងមក។៕
Tag:
ជប៉ុន
អាមេរិក
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 3 ថ្ងៃ
