លោក អូបាម៉ា ទៅអង់គ្លេសនិងអាល្លឺម៉ង់ពេលអឺរ៉ុបជួបវិបត្តិ

អន្តរជាតិ

លោក អូបាម៉ា ទៅអង់គ្លេសនិងអាល្លឺម៉ង់ពេលអឺរ៉ុបជួបវិបត្តិ

18, Apr 2016 , 7:39 pm

រូបភាព

ដោយ: សៅ ផលនិស្ស័យ (Sao Phal Niseiy)

លោក បារ៉ាក់ អូបាម៉ា នឹងចេញដំណើរទៅអឺរ៉ុបដើម្បីពង្រឹងទំនាក់ទំនងជាមួយអឺរ៉ុបនៅក្នុងសប្តាហ៍នេះ មុនពេលលោកចាកចេញពីតំណែង។ លោកនឹងទៅទស្សនកិច្ចប្រទេសអង់គ្លេសនិងអាល្លឺម៉ង់ផងដែរ ខណៈពេលអឺរ៉ុបកំពុងប្រឈមបញ្ហាច្រើនរួមទាំងផ្នែកសន្តិសុខ វិបត្តិជនភៀសខ្លួន និងការត្រៀមប្រជាមតិចាកចេញពីសហភាពអឺរ៉ុបរបស់អង់គ្លេសផង។

សូមស្ដាប់ព័ត៌មានលម្អិត៖

ដំណើរទស្សនកិច្ចរយៈពេល៦ថ្ងៃទៅកាន់អឺរ៉ុបក្នុងនោះមានអង់គ្លេសនិងអាល្លឺម៉ង់របស់ប្រធានាធិបតីអាមេរិក លោក បារ៉ាក់ អូបាម៉ា នឹងចាប់ផ្តើមក្នុងសប្តាហ៍នេះ។ ហើយវានឹងក្លាយជាដំណើរទស្សនកិច្ចលើកទី៥ ទៅកាន់ចក្រភពអង់គ្លេស និងអាល្លឺម៉ង់ របស់លោក អូបាម៉ា ក្នុងនាមជាប្រធានាធិបតីអាមេរិក។ ហើយលោកនឹងជួបជជែកពិភាក្សាជុំវិញបញ្ហាសំខាន់ៗជាច្រើនជាមួយនាយករដ្ឋមន្ត្រីអង់គ្លេស ដេវីដ ខេមេរ៉ូន (David Cameron) និងអធិការបតីអាល្លឺម៉ង់លោកស្រី អែនជេឡា មឺហ្គែល (Angela Merkel) ផងដែរ។

យោងតាមការលើកឡើងរបស់មន្ត្រីសេតវិមានកន្លងមក លោក អូបាម៉ា នឹងឆ្លៀតឱកាស អំពាវនាវឲ្យអឺរ៉ុបរួបរួមគ្នាដើម្បីដោះស្រាយបញ្ហាប្រឈមរួមគ្នា ស្របពេលដែលបណ្តាមេដឹកសហភាពអឺរ៉ុបដូចជា អាល្លឺម៉ង់កំពុងខ្វាយខ្វល់ខ្លាំងពីបញ្ហាសន្តិសុខ និងបន្ទុកធ្ងន់បង្កើតដោយវិបត្តិជនភៀសខ្លួនផង។ ម្យ៉ាងទៀតអឺរ៉ុបកំពុងប្រឈមការបែកបាក់គ្នាព្រោះតែអង់គ្លេសត្រៀមដើរចេញពីសហភាពនយោបាយមួយនេះ តាមរយៈការបោះឆ្នោតប្រជាមតិខែមិថុនាខាងមុខផង។

ប្រជាមតិនៅអង់គ្លេសដើម្បីកំណត់ថា គួរបន្តស្ថិតនៅឬគួរចាកចេញពីសហភាពអឺរ៉ុបជាបញ្ហាចម្រូងចម្រាសនិងរសើបបំផុតដែរសម្រាប់សហភាពអឺរ៉ុប ព្រោះការចាកចេញរបស់អង់គ្លេសនឹងធ្វើឲ្យអឺរ៉ុបចុះខ្សោយ។ ចំណែកនាយករដ្ឋមន្ត្រីអង់គ្លេសលោក ដេវីដ ខេមេរ៉ូន បានបញ្ជាក់ហើយថា ទោះប្រជាជនអង់គ្លេសបោះឆ្នោតចាកចេញពីសហភាពអឺរ៉ុបក៏ដោយ លោកនឹងមិនចុះចេញពីតំណែងឡើយ។

យ៉ាងណាមិញ គេរំពឹងថា ប្រមុខរដ្ឋអាមេរិកលោក អូបាម៉ា នឹងថ្លែងសារនយោបាយដោយស្នើឲ្យប្រជាជនអង់គ្លេសបន្តគាំទ្រសមាជិកភាពអង់គ្លេសក្នុងសហភាពអឺរ៉ុប ហើយលោកព្យាយាមដង្ហើយឲ្យសមាជិកសហភាពអឺរ៉ុបបន្តរួបរួមសាមគ្គីគ្នាដើម្បីវិបុលភាពនិងវឌ្ឍនភាពនៃតំបន់អឺរ៉ុបទាំងមូលផង។ ក្រៅពីនេះលោកក៏នឹងបង្ហាញការគាំទ្រផ្នែកនយោបាយរបស់រដ្ឋបាលលោក ចំពោះរបបដឹកនាំក្រុងប៊ែកឡាំងជាពិសេសលោកស្រី អែនជេឡា មឺហ្កែល ដែលបានដាក់ចេញគោលនយោបាយមានប្រសិទ្ធភាពនិងត្រឹមត្រូវដើម្បីឆ្លើយតបវិបត្តិជនភៀសខ្លួនដែលរួមរឹតអឺរ៉ុបនោះ។

ដោយឡែក ប្រទេសសមាជិកសហភាពអឺរ៉ុបមួយចំនួនយល់ថា អាមេរិកក្រោមការដឹកនាំរបស់លោក បារ៉ាក់ អូបាម៉ា ងាកចេញពីអឺរ៉ុបទៅអាស៊ីវិញ។ លោក អូបាម៉ា ប្រើប្រាស់ទស្សនកិច្ចនេះដើម្បីបង្ហាញសមាជិកអឺរ៉ុបដែលជាសម្ព័ន្ធមិត្តអាមេរិកយូរឆ្នាំមកហើយនោះថា ទោះបីគោលនយោបាយការបរទេសអាទិភាពរបស់អាមេរិកផ្តោតលើតំបន់អាស៊ីក៏ដោយ អឺរ៉ុបនៅតែជាដៃគូយុទ្ធសាស្ត្រខ្វះមិនបានឡើយ។

កាលពីថ្មីៗនេះ រដ្ឋអឺរ៉ុបភ្ងាក់ផ្អើលនិងទំនងជាអន់ចិត្តផងដែរ នៅពេលដែលលោក បារ៉ាក់ អូបាម៉ា បានរិះគន់សម្ព័ន្ធមិត្តចាក់ទឹកមិនលិចរបស់ខ្លួន មានអង់គ្លេសនិងបារាំងជុំវិញការអន្តរាគមន៍យោធាតាមផ្លូវអាកាសនៅលីប៊ី ក្នុងបទសម្ភាសន៍កន្លងមកជាមួយទស្សនាវដ្តី Atlantic ។ លោក អូបាម៉ា ព្រលះបារាំងនិងអង់គ្លេសថា ប្រទេសទាំងពីរដែលជាសមាជិកបក្សសម្ព័ន្ធណាតូនេះ ជិះសេះលែងដៃ ហើយរុញបន្ទុកទាំងអស់ក្នុងអន្តរាគមន៍នៅលីប៊ីមកលើសហរដ្ឋអាមេរិកម្នាក់ឯង៕