អន្តរជាតិ
នយោបាយអន្តរជាតិ
វត្តមានទ័ពអាមេរិកនៅហ្វីលីពីន ជាការកើនឡើងនៃយោធូបនីយកម្មសមុទ្រចិនខាងត្បូង
× ជម្លោះអធិបតេយ្យសមុទ្រចិនខាងត្បូងមិនត្រឹមតែក្លាយជាបញ្ហារវាងចិន និងរដ្ឋសមាជិកអាស៊ានប៉ុណ្ណោះនោះទេ តែវា ក៏បានក្លាយជាបញ្ហាមួយដែលរុញច្រានឲ្យអាមេរិកដែលជារដ្ឋខាងក្រៅចេញមុខប្រឈមជាមួយនឹងចិនដែលជាភាគីទាមទារធំជាងគេនោះ។ ចុងក្រោយនេះ ចិននិងអាមេរិកកំពុងតែប្រទាញប្រទង់គ្នាខ្លាំងក្រោយពីហ្វីលីពីនផ្តល់មូលដ្ឋានយោធាឲ្យអាមេរិកនៅក្បែរតំបន់ជម្លោះសមុទ្រចិនខាងត្បូង។
ក្រសួងការពារជាតិចិននៅថ្ងៃទី១៤ ខែមេសា កន្លងទៅ បានប្រតិកម្មទៅនឹងការវិវត្តសន្តិសុខនារយៈចុងក្រោយក្នុងតំបន់ ដោយបានសង្កត់ធ្ងន់ថាកិច្ចសហប្រតិបត្តិការយោធារវាងអាមេរិក និងហ្វីលីពីន មិនត្រូវដាក់ទិសដៅទៅលើភាគីទីបី ឬបំពានផលប្រយោជននៃភាគីទីបីឡើយ។ ប្រតិបត្តិកម្មនេះ ធ្វើឡើងក្រោយតែមួយថ្ងៃនៃការលើកឡើងរបស់រដ្ឋមន្ត្រីការពារជាតិអាមេរិក លោក Ash Carterដែលថាកងទ័ពអាមេរិកនឹងបន្ថែមសម្ភារផ្សេងៗទៅក្នុងមូលដ្ឋានខ្លួននៅក្នុងទឹកដីហ្វីលីពីន។
ក្រសួងការពារជាតិចិន បានបន្ថែមដែរថា កងទ័ពអាមេរិកបាននិងកំពុងវិលត្រលប់មកវិញ, បាននិងកំពុងពង្រឹងសមត្ថភាពនៅក្នុងទឹកដីហ្វីលីពីន និងថែមទាំងកំពុងតែបង្កើនសកម្មភាពយោធូបនីយកម្ម នៅក្នុងតំបន់សមុទ្រចិនខាងត្បូងទៀតផង។ នេះបើយោងសារព័ត៌មាន People’s Daily ដែលបានឲ្យដឹងដែរថាការបន្ថែមកម្លាំងសម្ព័ន្ធយោធា គឺជាសញ្ញាមួយនៃផ្នត់គំនិតសង្គ្រាមត្រជាក់ ហើយ វាកំពុងតែ ប្រឆាំងជាមួយនឹងបរិបទបច្ចុប្បន្ន ដែលរួមសន្តិភាព ការអភិវឌ្ឍ កិច្ចសហប្រតិបត្តិការ និងយុទ្ធសាស្ត្រ ឈ្នះ-ឈ្នះ។
បន្ថែមពីនេះ ក្រសួងការពាងជាតិចិន ក៏បានទទូចឲ្យភាគីពាក់ព័ន្ធត្រូវតែបំបាត់នូវផ្នត់គំនិតសង្គ្រាមត្រជាក់ដែលបានផុតទៅហើយនោះ ហើយ មិនត្រូវដាក់គោលដៅទៅលើភាគីទីបីណាមួយ, បំពានផលប្រយោជន៍ភាគីទីបី ឬប៉ះពាល់ដល់សន្តិសុខភាព និងស្ថិរភាពក្នុងតំបន់ នៅពេលពួកគេបង្កើនកិច្ចសហប្រតិបត្តិការយោធាទ្វេភាគី។
សូមបញ្ជាក់ផងដែរថាថ្មីៗនេះ អាមេរិក និងហ្វីលីពីន បានប្រកាសពីកិច្ចព្រមព្រៀងមួយរវាងភាគីទាំងពីរស្តីពីទីតាំងប្រាំកន្លែងសម្រាប់ការដាក់មូលដ្ឋានយោធារបស់អាមេរិកនៅក្នុងទឹកដីហ្វីលីពីនក្រោមកិច្ចព្រមព្រៀងកិច្ចសហប្រតិបត្តិការពង្រឹងវិស័យការពារ (EDCA)។ វត្តមានកងទ័ពអាមេរិក នឹងឈរជើងនៅក្នុងទឹកដីហ្វីលីពីនក្នុងមូលដ្ឋានទ័ពអាកាស Antonio Bautista, Fort Magsaysay, Basa , Lumbia, និង មូលដ្ឋានទ័ពអាកាស Mactan-Benito Ebuen។
កិច្ចព្រមព្រៀងកិច្ចសហប្រតិបត្តិការពង្រឹងវិស័យការពារ នឹងផ្តល់លទ្ធភាពឲ្យកងទ័ពអាមេរិកអាចបំពាក់សព្វាវុធ និងបញ្ជូនកងទ័ពរបស់ខ្លួនមកកាន់ទឹកដីហ្វីលីពីនបានដោយស្របច្បាប់។ បន្ថែមពីនេះ កិច្ចព្រមព្រៀងនេះ ក៏នឹងផ្តល់អត្ថប្រយោជន៍សម្រាប់កងទ័ពហ្វីលីពីន ក្នុងការទទួលបាន ការហ្វឹកហ្វឺនបន្ថែមពីអាមេរិក ការការពារសន្តិសុខដែនសមុទ្រ និងប្រតិបត្តិការមនុស្សធម៌ និងមហន្តរាយផ្សេងៗទៀតផង។
អ្វីគួរកត់សម្គាល់នៅក្នុងមូលដ្ឋានយោធាអាកាសទាំងប្រាំនោះ Antonio Bautista គឺជាមូលដ្ឋានមួយដែលស្ថិតនៅក្បែរសមុទ្រចិនខាងត្បូងដែលកន្លងមកតំបន់នោះ ក៏ធ្លាប់មានការប្រឈមមុខគ្នារវាងហ្វីលីពីន និងចិនផងដែរ។ សកម្មភាពនេះ ត្រូវបានគេមើលឃើញថា អាមេរិកនឹងឆ្លៀតឱកាសទាំងការពារសម្ព័ន្ធមិត្តខ្លួនហ្វីលីពីនផង និងដើម្បីប្រឆាំងសកម្មភាពរបស់ចិនដែលកំពុងតែព្យាយាមបង្កើនអំណាចនៅក្នុងតំបន់ជាពិសេសេនោះ គឺនៅក្នុងតំបន់ជម្លោះសមុទ្រចិនខាងត្បូងផងដែរ។ នេះ ក៏មានន័យដែរថា ប្រសិនបើមានការប្រឈមរវាងហ្វលីពីនជាមួយនឹងចិន អាមេរិក នឹងអាចជួយហ្វីលីពីន បានគ្រប់ពេលវេលា។
សូមបញ្ជាក់ផងដែរ ជម្លោះសមុទ្រចិនខាងត្បូង គឺជាជម្លោះដែនអធិបតេយ្យដែលមានរដ្ឋពាក់ព័ន្ធ អាស៊ានរួមមានព្រុយណេ ម៉ាឡេស៊ី ហ្វីលីពីន និងវៀតណាម ជាមួយនឹងចិន។ ជម្លោះនេះ បានអូស បន្លាយដោយគ្មានដំណោះស្រាយជាច្រើនទសវត្សរ៍ហើយ ដ្បិតភាគីនីមួយៗ មានអំណះអំណាងផ្សេង ៗគ្នាទៅលើតំបន់ទាមទារដែលត្រួតស៊ីគ្នា ជាពិសេសនោះ គឺជាមួយនឹងចិនដែលបានទាមទារស្ទើរតែ ទាំងស្រុងនៃតំបន់ជម្លោះ៕
© រក្សាសិទ្ធិដោយ thmeythmey.com