អន្តរជាតិ
សភាប្រេស៊ីលគាំទ្រការបណ្ដេញប្រធានាធិបតី រ៉ូសេហ្វ ចេញពីតំណែង
× សមាជិកសភាប្រេស៊ីលបានបោះឆ្នោតគាំទ្របណ្ដេញលោកស្រី ឌីលម៉ា រ៉ូសេហ្វ (Dilma Rouseff ) ចេញពីតំណែងប្រធានាធិបតី ដែលផ្សាយបន្តផ្ទាល់ទៅទូទាំងទឹកដីប្រេស៊ីលនៅថ្ងៃទី១៧ ខែមេសា។ បន្ទាប់ពីនេះ ព្រឹទ្ធសភាប្រេស៊ីលនឹងបោះឆ្នោតសម្រេចថា គួរតែបើកសវនាការដើម្បីសម្រេចអនាគតលោកស្រី រ៉ូសេហ្វឬយ៉ាងណា ខណៈការបោះឆ្នោតទំនងជាធ្វើនៅខែឧសភាខាងមុខ។
ក្រុមសមាជិកសភាប្រឆាំងបានទទួលជោគជ័យក្នុងការបោះឆ្នោតបណ្ដេញលោកស្រីប្រធានាធិបតី ឌីលម៉ា រ៉ូសេហ្វ ចេញពីតំណែងក្រោយសភាប្រទេសនេះបោះឆ្នោតគាំទ្រដាក់ពាក្យប្រឆាំងនឹងលោកស្រី។ លទ្ធផលនេះបានជាន់ពន្លិចក្ដីសង្ឃឹមរបស់ប្រធានាធិបតីស្ត្រីទីមួយដែលកំពុងរងសម្ពាធឲ្យចាកចេញពីតំណែងលើសំណុំរឿងពុករលួយ។ ជំហានបន្ទាប់ទៀត ព្រឹទ្ធសភាប្រេស៊ីលនឹងវិនិច្ឆ័យលើករណីនេះ ដោយយល់ព្រមឲ្យមានការបើកសវនាការប្រឆាំងលើលោកស្រី រ៉ូសេហ្វ ឬអត់។
ក្នុងការបោះឆ្នោតថ្ងៃទី១៧ ខែមេសា សមាជិកសភាប្រេស៊ីលពីរភាគបីបានផ្ដល់ភ្លើងខៀវសម្រាប់ដំណើរការប្រឆាំងលោកស្រី រ៉ូសេហ្វ បន្ទាប់ពីពួកគេមានមតិរួចរាល់។ នេះមានន័យថា ប្រធានាធិបតីស្ត្រីរូបនេះត្រូវស្វែងរកការគាំទ្រឲ្យលើសលប់ពីសំណាក់សមាជិកព្រឹទ្ធសភា ដែលនឹងត្រូវបោះឆ្នោតចំពោះករណីដកតំណែងលោកស្រីនៅពេលខាងមុខ។ ប្រសិនបើសមាជិកព្រឹទ្ធសភាបោះឆ្នោតដោយសំឡេងភាគច្រើនធម្មតាលើបណ្ដឹងនេះ លោកស្រី រ៉ូសេហ្វ នឹងត្រូវព្យួរតំណែងបណ្ដោះអាសន្ន ដើម្បីបើកផ្លូវដល់សវនាការលើករណីនេះ ហើយអនុប្រធានាធិបតីលោក Michel Temer នឹងកាន់តំណែងជំនួស។
ស្របពេលនឹងការបោះឆ្នោតនេះ អ្នកតវ៉ារាប់ពាន់នាក់ដែលមានទាំងក្រុមគាំទ្រលោកស្រី រ៉ូសេហ្វនិងក្រុមប្រឆាំងផងនោះ បានប្រមូលផ្ដុំគ្នាដើម្បីតាមដានដំណើរការខាងលើ។ បាតុករទាំងពីរក្រុមត្រូវដាក់ខណ្ឌដាច់ពីគ្នាដើម្បីចៀសការប៉ះទង្គិច។ ជាមួយគ្នានេះ នៅពេលសភាប្រកាសលទ្ធផល ក្រុមប្រឆាំងលោកស្រី រ៉ូសេហ្វ បានស្រែកអររីករាយ ខណៈក្រុមគាំទ្រលោកស្រីយំមិនសប្បាយចិត្ត។
យ៉ាងណាមិញ គណបក្សពលកររបស់លោកស្រី រ៉ូសេហ្វ បានចេញមកការពារលោកស្រី និងប្រកាសតស៊ូទៅមុខដើម្បីការពារតំណែងលោកស្រី។ មេដឹកនាំគណបក្សពលករនៅសភាលោក Jose Guimaraes និយាយថា ការតស៊ូកំពុងធ្វើនៅតាមដងផ្លូវនិងនៅព្រឹទ្ធសភាសហព័ន្ធ។ លោកថា៖«យើងចាញ់ ព្រោះក្រុមរដ្ឋប្រហារខ្លាំងជាង»។
សូមបញ្ជាក់ថា ប្រធានាធិបតី ឌីលម៉ា រ៉ូសេហ្វ រងការចោទប្រកាន់ពាក់ព័ន្ធនឹងអំពើពុករលួយក្នុងការបោះឆ្នោតឆ្នាំ២០១៤។ លើសពីនេះ លោកស្រី រ៉ូសេហ្វ ក៏ត្រូវទទួលខុសត្រូវលើការធ្លាក់ចុះសេដ្ឋកិច្ច និងអំពើពុករលួយក្នុងក្រុមហ៊ុនប្រេងរដ្ឋ Petrobras ផងដែរ។ ឆ្លើយតបនឹងរឿងនេះលោកស្រី រ៉ូសេហ្វ បានចោទប្រកាន់លោក Michel Temer និងប្រធានសភា ថា រៀបចំផែនការទម្លាក់លោកស្រីពីអំណាច និងប្រកាសបំបែកការប៉ុនប៉ងដែលលោកស្រីហៅថា ជារដ្ឋប្រហារ៕
Tag:
Dilma Rouseff
ប្រេស៊ីល
© រក្សាសិទ្ធិដោយ thmeythmey.com