នយោបាយអន្តរជាតិ
អាមេរិក ប្រតិកម្មខ្លាំង ក្រោយយន្តហោះយោធាចិន ចុះចតក្នុងសមុទ្រចិនខាងត្បូង
×
ខណៈស្ថានភាពកំពុងតានតឹងស្រាប់ យន្តហោះយោធាចិន បានចុះចតនៅក្នុងតំបន់ជម្លោះសមុទ្រចិនខាងត្បូងដែលជាកោះសិប្បនិម្មិតដែលចិនបានសាងសង់។ វត្តមាននេះ បានធ្វើរដ្ឋាភិបាលក្រុងវ៉ាស៊ីនតោន បានប្រតិកម្មយ៉ាងខ្លាំង និងថែមទាំងទទូចជាថ្មីឲ្យរដ្ឋាភិបាលក្រុងប៉េកាំងធានាឲ្យនូវការមិនមែនវត្តមានយោធានៅក្នុងតំបន់ជម្លោះនោះ។
រដ្ឋាភិបាលក្រុងវ៉ាស៊ីនតោន នៅថ្ងៃទី១៨ ខែមេសា ម្សិលមិញ បានប្រតិកម្មយ៉ាងខ្លាំងចំពោះវត្តមាននៃ យន្តហោះយោធារបស់ចិនដែលចុះចតនៅតំបន់ថ្មប៉ប្រះទឹកដែលជាកោះសិប្បនិម្មិតរបស់ចិនក្នុងតំបន់ ជម្លោះសមុទ្រចិនខាងត្បូង ដែលចិនថាជាប្រតិបត្តិការមនុស្សធម៌នោះ។
« យើងបានដឹងថាយន្តហោះយោធាចិន បានចុះចតនៅឯតំបន់ថ្មប៉ប្រះទឹក Fiery Cross Reef នៅថ្ងៃអាទិត្យ ដែលចិន បានពណ៌នាថាជាប្រតិបត្តិការមនុស្សធម៌ដើម្បីជម្លៀសកម្មករដែលមានជំងឺបីនាក់»។ នេះគឺជាសេចក្តីថ្លែងការណ៍របស់អ្នកនាំពាក្យមន្ទីរបញ្ចកោណអាមេរិកលោក Jeff Davis ទៅកាន់សារព័ត៌មាន CNN ដែលបានចោទសំណួរដែរថា វាហាក់ដូចជានៅមិនទាន់ច្បាស់នោះទេចំពោះប្រតិបត្តិការនោះ ដ្បិត ចិនបានប្រើប្រាស់យន្តហោះយោធាក្នុងប្រតិបត្តិការមនុស្សធម៌។
នៅសេចក្តីថ្លែងការណ៍ដដែលនោះ ក៏បានបញ្ជាក់ដែលថា រដ្ឋាភិបាលក្រុងវ៉ាស៊ីនតោន ទទូចឲ្យចិនត្រូវ ធានាឲ្យបានថាមិនមានយន្តហោះដើម្បីពង្រាយ ឬអាកាសយានយោធានៅឯសំណង់ក្នុងបណ្តុំកោះស្ព្រាតលី (Spratly Islands) ដូចទៅនឹងការសន្យាររបស់ចិនកន្លងមក។
សូមបញ្ជាក់ផងដែរ ជម្លោះអធិបតេយ្យសមុទ្រចិនខាងត្បូងដែលមានរដ្ឋទាមទារដូចជារដ្ឋពាក់ព័ន្ធអាស៊ាន ព្រុយណេ ម៉ាឡេស៊ី ហ្វីលីពីន និងវៀតណាម ជាមួយនឹងចិន បាននិងកំពុងតែឡើងកម្តៅ ដ្បិតខណៈពេលដែលអវត្តមាននៃដំណោះស្រាយរួមនោះ សកម្មភាដែលជាពិសេសធ្វើឡើងដោយចិន បាននិងកំពុងតែកើនឡើងផងដែរ។ ចិន, ភាគីតែមួយគត់ដែលបានទាមទារស្ទើរតែតំបន់ទាំងស្រុងនៃតំបន់ជម្លោះ បានចូលទៅសាងសង់កោះសិប្បនិម្មិតជាច្រើនហិចតា និងចុងក្រោយមានរបាយការណ៍រូបភាព ផ្កាយរណបដែលទទួលស្គាល់ដោយអាមេរិកផងដែរនោះ បានបង្ហាញថាចិន កំពុងតែបន្តសកម្មភាពដាក់ពង្រាយយោធានៅក្នុងតំបន់ជម្លោះនោះទៀតផង។
គោលនយោបាយវាតទីរបស់ចិនក្នុងតំបន់ជម្លោះនេះ បានធ្វើឲ្យអាមេរិកដែលមិនមានតំបន់ទាមទារបន្តិចសោះក្នុងតំបន់ជម្លោះ នៅមិនសុខឡើយ។ ក្នុងនោះដើម្បីឆ្លើយតបនឹងសកម្មភាពរបស់ចិនអាមេរិក បានប្រតិបត្តិការនាវាល្បាត និងប្រភេទយន្តហោះចម្បាំងមកក្បែរតំបន់ចិនកំពុងតែគ្រប់គ្រងក្នុង តំបន់ជម្លោះក្រោមហេតុផលនៃការអនុវត្តសិទ្ធិសេរីភាពនៃការធ្វើនាវាចរណ៍ និងការប្រើប្រាស់ដែនអាកាសអន្តរជាតិដែលស្របនឹងច្បាប់អន្តរជាតិនោះ៕
Tag:
អាមេរិក
សមុទ្រចិនខាងត្បូង
© រក្សាសិទ្ធិដោយ thmeythmey.com