នាការប្រកួតពានរង្វាន់សម្តេច ហ៊ុន សែន លើកទី១០ កាលពីថ្ងៃទី២០ ខែមេសា ក្រុមនៅក្នុងក្របខណ្ឌមិត្តហ្វូនខេមបូឌានលីកចំនួន៥ក្រុម បានលត់ក្រុមឡើងមកពីវគ្គជម្រុះបឋមយ៉ាងចាស់ដៃដោយគិតសរុបមានការស៊ុតបាល់បញ្ចូលទីរហូតដល់ទៅ៧០គ្រាប់ ខណៈជំនួបរវាងក្រុមដែលឡើងមកពីវគ្គជម្រុះបឋមដូចគ្នា ខេត្តកំពង់ឆ្នាំង យកឈ្នះយុវជនបឹងកេតកំពង់ចាម ១-០។
សម្រាប់ការប្រកួតក្នុងពូល B ពានរង្វាន់សម្តេច ហ៊ុន សែន ក្រុមបឹងកេតអង្គរ បានលត់ក្រុមលេខ២ពូល B ឡើងពីវគ្គជម្រុះ ខេត្តព្រៃវែង ១២-០ នៅពហុកីឡដ្ឋានជាតិ។ ជ័យជម្នះយ៉ាងងាយស្រួលទាំង១២គ្រាប់របស់បឹងកេត សម្រេចបានដោយកីឡាករ ចាន់ វឌ្ឍនាកា រកបានគ្រាប់បាល់បញ្ចូលទី៨គ្រាប់ម្នាក់ឯង និងមានការចូលរួមចំណែករបស់ប្រធានក្រុម ឃួន ឡាបូរ៉ាវី ៣គ្រាប់ និងកីឡាករ អ៊ុំ កុម្ភះ មួយគ្រាប់។
៨គ្រាប់របស់កីឡាករ ចាន់ វឌ្ឍនាកា សម្រេចបាននៅនាទីជាបន្តបន្ទាប់ ១៧,៣០,៣៧,៣៨,៤៤ លុះដល់នាទី៧៣ រូបគេបានតែតបាល់បញ្ចូលទីមួយគ្រាប់បន្ថែម និងពីរគ្រាប់ទៀតរកបាននៅនាទី៧៤ និង៧៥។ ចំណែក ៣គ្រាប់របស់ប្រធានក្រុម ឃួន ឡាបូរ៉ាវី រកបាននៅនាទី ៥១,៦១ និង៨៨ ខណៈមួយគ្រាប់របស់កីឡាករ អ៊ុំ កុម្ភះ រកបាននៅនាទី២៩។
ចំណែកក្នុងពូល B ដដែលក្រុមក្រសួងការពារជាតិ បានលត់ក្រុមលេខ១ពូល F នៃវគ្គជម្រុះបឋម ខេត្តស្ទឹងត្រែងយ៉ាងចាស់ដៃ ២១-១ នៅកីឡដ្ឋានកងយោធពលខេមរភូមិន្ទ(ស្តាតចាស់)។ ខ្សែប្រយុទ្ធ សុក ច័ន្ទរស្មី រកបានតែម្នាក់ចំនួន១១គ្រាប់សម្រាប់ការពារជាតិ។
ចំណែកក្រុមអាស៊ីអឺរ៉ុបយូណាយធីត បានលត់ក្រុម កងរាជអាវុធហត្ថខេត្តកំពង់ធំ ៨-១ នៅពហុកីឡដ្ឋានជាតិ។ ជ័យជម្នះ៨គ្រាប់របស់អាស៊ីអឺរ៉ុប សម្រេចបានដោយការទាត់បាល់ជ្រុងរបស់កីឡាករ យ៉ម វណ្ណា មួយគ្រាប់នៅនាទីទី៨ លុះដល់នាទីទី៥០ សម្រេចបានមួយគ្រាប់ទៀតដោយកីឡាករ ចាន់ ដារា នឹងមានការរួមចំណែករបស់កីឡាករ ពិជ័យ សុភារា ចំនួន៤គ្រាប់នៅនាទី៥៦, ៥៧, ៦១ និង៧៦។ កីឡាករ អៀ ពីរ៉ូត បន្ទាប់ពីប្តូរចូលជំនួសកីឡា ស៊េន ពុខរី នៅនាទីទី៤៦ បានសម្រេចគ្រាប់បាល់២គ្រាប់បន្ថែមទៀតនៅនាទីទី៦៤ និង៨៣។
ដោយឡែក នាការប្រកួតនៅកីឡដ្ឋានវេស្ទើនក្នុងពូល A ក្រុមខេមបូឌានថាយហ្គឺរ បានលត់ក្រុមលេខ២ពូល A នៃវគ្គជម្រុះបឋម ខេត្តកណ្តាល ១៨-០ ដែលសម្រេចបានដោយកីឡាករ សួង វីរៈ ១៥គ្រាប់ម្នាក់ឯង និងមានការចូលរួមចំណែករបស់ក្រុមចំនួន៣គ្រាប់បន្ថែមទៀត។
នៅកីឡដ្ឋានខេត្តស្វាយរៀងឯណោះវិញ ម្ចាស់ផ្ទះ ព្រះខ័នរាជស្វាយរៀង បានបំបាក់ក្រុមកំពង់ផែស្វាយ័តខេត្តព្រះសីហនុ ៩-០ លទ្ធផលដែលនាំឲ្យក្រុមព្រះខ័នរាជស្វាយរៀងឈ្នះនេះសម្រេចបានដោយកីឡាករ ប្រាក់ មុន្នី ឧត្តម ហូយ ផល្លីន និង ផានី រដ្ឋា ម្នាក់៣គ្រាប់។ ឬឯការប្រកួតរវាងក្រុមដែលឡើងពីវគ្គជម្រុះបឋមដូចគ្នា ម្ចាស់ផ្ទះខេត្តកំពង់ឆ្នាំង បានយកឈ្នះលើក្រុមភ្ញៀវ យុវជនបឹងកេតកំពង់ចាម ក្នុងលទ្ធផល ១-០៕