កីឡាជាតិ
ជាតិ
NOCC រៀបចំស្វាគមន៍ សៀវម៉ី ដែលទទួលបានសិទ្ធិពេញលេញចូលរួមអូឡាំពិក
×
នៅរសៀលថ្ងៃទី២១ ខែមេសា នេះ គណៈកម្មាធិការជាតិអូឡាំពិកកម្ពុជា(NOCC) រៀបចំកម្មវិធីស្វាគមន៍ការវិលត្រឡប់មកមាតុប្រទេសរបស់វីរនារីតេក្វាន់ដូ ស៊ន សៀវម៉ី ដែលដណ្តើមបានមេដាយមាស និងប្រាក់ ពីការប្រកួតកីឡាតេក្វាន់ដូជើងឯកទ្វីបអាស៊ី ២០១៦ ( ASIAN TAEKWONDO CHAMPIONSHIPS 2016 ) ក្នុងទីក្រុងម៉ានីល ប្រទេសហ្វីលីពីន ហើយក៏បានក្លាយជាកីឡាការិនីដំបូងដែលទទួលបានសិទ្ធិពេញលេញទៅចូលរួមព្រឹត្តិការណ៍អូឡាំពិកនៅប្រទេសប្រេស៊ីលផងដែរ។
គណៈកម្មាធិការជាតិអូឡាំពិកកម្ពុជា(NOCC) នឹងរៀបចំកម្មវិធីប្រគល់រង្វាន់ ក៏ដូចជាទទួលស្វាគមន៍ការវិលត្រឡប់របស់កីឡាការិនីតេក្វាន់ដូជម្រើសជាតិ ស៊ន សៀវម៉ី ដែលបាននាំយកមេដាយមាសមួយគ្រឿង និងប្រាក់មួយគ្រឿង ដែលដណ្តើមបានពីការប្រកួតកីឡាតេក្វាន់ដូជើងឯកទ្វីបអាស៊ី ២០១៦ ក្នុងទីក្រុង Manila ប្រទេសហ្វីលីពីន។ កម្មវិធីទទួលស្វាគមន៍ការវិលត្រឡប់នេះនឹងធ្វើឡើងនៅទីស្នាក់ការ NOCC ថ្ងៃទី២១ មេសា នេះ។
គួរបញ្ជាក់ថា វីរនារីតេក្វាន់ដូជម្រើសជាតិ ស៊ន សៀវម៉ី ទទួលបានកៅអីពេញសិទ្ធក្នុងការចូលរួមប្រកួតក្នុងព្រឹត្តិការណ៍កីឡាអូឡាំពិក(Olympic Games 2016) នៅប្រទេសប្រេស៊ីល ដោយមិនបាច់ប្រើ WILD CARD បន្ទាប់ពីកីឡាការិនីរូបនេះ ឈ្នះមេដាយមាសនៅវគ្គជម្រុះអូឡាំពិក នៅប្រទេសហ្វីលីពីន។ មិនត្រឹមតែប៉ុណ្ណោះ ស៊ន សៀវម៉ី បន្តឈ្នះមេដាយប្រាក់ជើងទ្វីបអាស៊ីផងដែរ។ ចំណែកកីឡាការិនីតេក្វាន់ដូ ឈឿង ពុទ្ធារីម ដែលចូលរួមវគ្គជម្រុះអូឡាំពិកដែរនោះ ពុំបានទទួលជ័យជម្នះឡើយ៕
© រក្សាសិទ្ធិដោយ thmeythmey.com