ជាតិ
គូសគំនូសចរាចរណ៍ថ្មីមហាវិថីធំៗ ដើម្បីលើកសោភ័ណភាព និងសណ្តាប់ធ្នាប់ចរាចរណ៍
× ក្រសួងសាធារណការ និងដឹកជញ្ជូន និងរដ្ឋបាលរាជធានីមហាវិថីធំៗចំនួន៥ នឹងត្រូវគូសចរាចរណ៍ថ្មី ដើម្បីកម្ពស់សោភ័ណភាពក្រុង និងរៀបចំសណ្តាប់ធ្នាប់ចរាចរណ៍តាមដងផ្លូវ។ មហាវិថីទាំង៥នោះ មានមហាវិថីម៉ៅសេទុង ព្រះសីហនុ សហព័ន្ធរុស្ស៊ី កម្ពុជាក្រោម និងមហាវិថីព្រះនរោត្តម។
រដ្ឋបាលរាជធានីភ្នំពេញ និងក្រសួងសាធារណការ និងដឹកជញ្ជូន នឹងចុះអនុវត្តន៍ការងារគូសគំនូសចរាចរណ៍ថ្មីលើមហាវិថីចំនួន៥ ដើម្បីលើកកម្ពស់សោភ័ណភាព និងដើម្បីរៀបចំសណ្តាប់ធ្នាប់ចរាចរណ៍តាមដងផ្លូវក្នុងរាជធានីភ្នំពេញឲ្យកាន់តែប្រសើរ។
ផ្អែកតាមលិខិតជូនដំណឹងរបស់រដ្ឋបាលរាជធានីភ្នំពេញ មហាវិថីទាំង៥នោះរួមមាន៖ មហាវិថីម៉ៅសេទុង ចាប់ពីចំណុចប្រសព្វមហាវិថីព្រះនរោត្តម ដល់ចំណុចប្រសព្វមហាវិថីសហព័ន្ធរុស្ស៊ី។ មហាវិថីព្រះសីហនុ ចាប់ពីចំណុចប្រសព្វមហាវិថីព្រះមុនីរ៉េត ដល់ចំណុចប្រសព្វមហាវិថីសុធារស។ មហាវិថីសហព័ន្ធរុស្ស៊ី ចាប់ពីចំណុចប្រសព្វមហាវិថីព្រះនរោត្តម ដល់រង្វង់មូលចោមចៅ។ មហាវិថីកម្ពុជាក្រោម ចាប់ពីចំណុចប្រសព្វមហាវិថីព្រះមុនីវង្ស ដល់ស្ពានអាកាស៧មករា និងមហាវិថីព្រះនរោត្តម ចាប់ពីចំណុចវត្តភ្នំ ដល់ស្ពានអាកាសក្បាលថ្នល់។
ការអនុវត្តគម្រោងខាងលើ នឹងត្រូវដំណើរការការដ្ឋាននៅពេលយប់គឺចាប់ពីម៉ោង៩យប់ ដល់ម៉ោង៦ព្រឹក ដើម្បីបញ្ចៀសបាននូវផលប៉ះពាល់ជាអតិបរមា និងដោះស្រាយបញ្ហាកកស្ទះចរាចរណ៍តាមដងផ្លូវ។
បើតាមរដ្ឋបាលរាជធានីភ្នំពេញ គម្រោងនេះ នឹងចាប់ផ្តើមពីថ្ងៃទី២៣ខែមេសាសម្រាប់មហាវិថីម៉ៅសេទុង និងព្រះសីហនុ ខណៈមហាវិថីសហព័ន្ធរុស្ស៊ី កម្ពុជាក្រោម និងព្រះនរោត្តម បានចាប់ផ្តើមតាំងពីថ្ងៃទី១៩ ខែមេសាមក៕
Tag:
សាលារាជធានីភ្នំពេញ
ក្រសួងសាធារណការ
© រក្សាសិទ្ធិដោយ thmeythmey.com