ចៅក្រម២រូប ត្រូវបានតែងតាំងជាអនុប្រធានសាលាឧទ្ធរណ៍

ជាតិ

ចៅក្រម២រូប ត្រូវបានតែងតាំងជាអនុប្រធានសាលាឧទ្ធរណ៍

21, Apr 2016 , 10:39 pm

រូបភាព

ដោយ: ម៉ៅ សុផា

អតីតចៅក្រមនៃតុលាការឧទ្ធរណ៍ពីររូប ត្រូវបានឧត្តមក្រុមប្រឹក្សានៃអង្គចៅក្រម តែងតាំងជាអនុប្រធាននៃសាលាជំនុំជម្រះក្តីជាន់ខ្ពស់មួយនេះ។ ការតែងតាំងនេះ ធ្វើឡើងតាមរយៈសំណើរបស់ប្រធានតុលាការឧទ្ធរណ៍។

ឧត្តមក្រុមប្រឹក្សានៃអង្គចៅក្រម បានសម្រេចតែងតាំង លោក ញូង ធុល និងលោក ឃុន លាងម៉េង ជាអនុប្រធានសាលាឧទ្ធរណ៍។ លោកទាំងពីរ សុទ្ធតែជាអតីតចៅក្រម នៃសាលាជំនុំជម្រះជាន់ខ្ពស់មួយនេះ។

ការតែងតាំងអនុប្រធានថ្មីទាំងពីរ ធ្វើឡើងក្នុងសម័យប្រជុំឧត្តមក្រុមប្រឹក្សានៃអង្គចៅក្រមលើកទៅ២៧ កាលពីថ្ងៃទី១៩ ខែមេសា ឆ្នាំ២០១៦ ដែលប្រព្រឹត្តទៅក្រោមអធិបតីភាពនៃអង្គព្រះមហាក្សត្រ។ ក្រៅពីការតែងតាំងអនុប្រធានសាលាឧទ្ធរណ៍ខាងលើ ឧត្តមក្រុមប្រឹក្សានៃអង្គចៅក្រម ក៏បានសម្រេចលើរបៀបវារៈមួយចំនួនផ្សេងទៀងដែរ។

របៀបវារៈដទៃដែលបានសម្រេចនោះ មានដូចជា ១. របាយណ៍ស្តីពីសកម្មភាពការងារ របស់ សមាជិកឧត្តមក្រុមប្រឹក្សានៃអង្គចៅក្រមកន្លងមក, ២. ពិនិត្យនិងយល់ព្រមលើ សេចក្តីសម្រេច របស់ក្រុមប្រឹក្សាវិន័យនៃឧត្តមក្រមប្រឹក្សានៃចៅក្រម, ៣. ពិនិត្យនិងសម្រេចលើសេចក្តីព្រាង ព្រះរាជក្រឹត្យ ស្តីពីនិមិត្តសញ្ញា ត្រា រូបសញ្ញា សញ្ញាសក្តិ និងឯកសណ្ឋានផ្លូវការក្នុងពិធីបុណ្យជាតិ សម្រាប់សម្គាល់ឧត្តមក្រុមប្រឹក្សានៃអង្គចៅក្រម ជាដើម៕