ភ្នំពេញ៖ លោកស្រី សុត ប៉ិច មានអារម្មណ៍រីករាយជាខ្លាំង នៅពេលសួនផ្កាលោកស្រី បានក្លាយជាទីចាប់អារម្មណ៍ពីសំណាក់សាធារណជន ពិសេសគឺយុវវ័យ នៅពេលបច្ចុប្បន្ន។ លោកស្រីទទួលបានចំណូលយ៉ាងតិច ១លានរៀលក្នុងមួយថ្ងៃ ពីអ្នកចូលមើលសួនផ្កាចម្រុះរបស់លោកស្រី។
ពីដើមឡើយ លោកស្រី សុត ប៉ិច និងស្វាមី គ្រាន់តែដាំផ្កា សម្រាប់ផ្គត់ផ្គង់ទីផ្សារនៅរាជធានីភ្នំពេញប៉ុណ្ណោះ។ តែឥឡូវនេះ លោកស្រីបានប្រែក្លាយសួនផ្កាសម្រាប់តែឈ្មួញកណ្តាលនោះ ជាកន្លែងសួនផ្កាសម្រាប់សាធារណជន ពិសេសគឺយុវជន ចូលទស្សនាថតកម្សាន្តផងដែរ។
ស្ត្រីអាយុ ៤០ឆ្នាំ និយាយថា គ្រួសារលោកស្រីអាចទទួលចំណូលបានយ៉ាងតិច ១លានរៀល រយៈពេល ៥ថ្ងៃ មុនឱកាសពិធីចូលឆ្នាំប្រពៃណីជាតិខ្មែរ គឺឆ្នាំវកនេះ។ លោកស្រី បន្តនិយាយ ហាក់ហួសចិត្តថា លោកស្រីប្រកបរបរដាំផ្កាលក់ជាង ១០ឆ្នាំមកហើយ ប៉ុន្តែលោកស្រីពុំធ្លាប់ឃើញមនុស្ស ចាប់អារម្មណ៍ចូលមើលសួនផ្កាទំហំជាង ១ហិកតារបស់លោកស្រី ដែលស្ថិតតាមបណ្តោយផ្លូវជាតិលេខ២ (ផ្លូវអាស៊ាន) ឡើយ។
យ៉ាងណា កសិករសម្បុរខ្មៅស្រអែមរស់នៅក្នុងភូមិដំបងកាញ់ សង្កាត់ព្រែកឯង ខណ្ឌមានជ័យ រាជធានីភ្នំពេញ រូបនេះ សប្បាយរីករាយជាខ្លាំង នៅពេលសួនផ្កាលោកស្រី ត្រូវបានគេចាប់អារម្មណ៍ ព្រោះលោកស្រីអាចរកចំណូលច្រើនជាង ការលក់ផ្គត់ផ្គង់សម្រាប់ ទីផ្សារ។ បើតាមលោកស្រី ប៉ិច ផ្កាពេញនិយមចំនួនជាង ១០ប្រភេទ ត្រូវបានដាំដុះលើផ្ទៃដីសួនជាង មួយហិកតា ក្នុងនោះ រួមមាន ផ្កាចន្ធូរ ផ្កាឈូករ័ត្ន សិរមាន់ ផ្កាដំណក់ទឹកភ្លៀង ផ្កាប៉ៃលិន និងផ្កា វីយូឡេ និងផ្កាស្បៃរឿង ជាដើម។
លោកស្រី ប៉ិច មាឌហំម និយាយថា កាលពីដំបូង លោកស្រីពុំប្រមូលលុយថ្លៃទស្សនាផ្កាទេ ដោយសារលោកស្រីគិតថា មនុស្សមានចំនួនតិច និងមិនប៉ះពាល់ដល់សម្រស់ផ្កាលោកស្រី។ តែផ្ទុយពីការគិតរបស់គាត់ មនុស្សរាប់ពាន់នាក់ បានសម្រុកចូលទស្សនាសួនផ្កាលោកស្រី រយៈពេលជាង ១សប្តាហ៍ មុនឱកាសពេលចូលឆ្នាំថ្មី កន្លងមកនេះ ។
លោកនិយាយប្រាប់ត្រង់ថា៖«ដំបូងកូនសិស្សចូលមើល ខ្ញុំមិនចង់យកលុយទេ ដោយសារខ្ញុំគិតថា គេគ្រាន់តែចូលមើល ផ្កាធម្មតា។ ប៉ុន្តែពួកគេបែរជាកាច់ផ្កាខ្ញុំទៀត ហេតុនេះទើបខ្ញុំយកលុយចូលមើលផ្កាថ្លៃ ១ពាន់រៀលក្នុងមួយនាក់ ដើម្បីទូទាត់ថ្លៃខូចខាត»។
ជាងនេះ ប្រសិនបើអ្នកទស្សនាកាច់យកផ្កាក្នុងសួននោះ លោកស្រីលក់ផ្កាក្នុងមួយទងតម្លៃ ពី ១ពាន់រៀល ទៅ១ម៉ឺនរៀល តាមប្រភេទផ្កាលើទីផ្សារ។ ហេតុនេះ លោកស្រី សុត ប៉ិច អាចរកចំណូលបានច្រើនជាង បើប្រៀបធៀបនឹងប្រាក់ខែកូនស្រីលោកស្រីជាកម្មការិនីរោងចក្រកាត់ដេរសំលៀកបំពាក់ជាង ៣០០ដុល្លារក្នុងមួយខែៗ។ ចំពោះចំណូលដែលលោកស្រី ប៉ិច ទទួលបានវិញ លោកស្រីយកចិញ្ចឹមជីវិតប្រចាំថ្ងៃ និងសងបំណុលធនាគារតែប៉ុណ្ណោះ។
រីឯការដាំផ្កា លោកស្រីនិយាយថា វាមិនលំបាកប៉ុន្មាននោះទេ ទោះបីជាលោកស្រីពុំធ្លាប់ ចូលសិក្សាពីបច្ចេកទេសដាំដុះផ្កាក៏ដោយ។ លោកស្រីថា៖«ខ្ញុំគ្រាន់តែចំណាយកម្លាំង និងសាំងចំនួន ២លីត្រ ក្នុងមួយ សម្រាប់បូមទឹកអូរក្បែរនេះ ស្រោចស្រពផ្កាហ្នឹងប៉ុណ្ណោះ»។
ចំពោះដីសួននេះ លោកស្រី ប៉ិច ថា វាពុំ មែនជាដីកម្មសិទ្ធិរបស់លោកស្រីទេ ពោលគឺវាជាដីរបស់អ្នកដ៏ទៃ។ ស្ត្រីមានកូនស្រីបង្កើតចំនួន ២នាក់រូបនេះ ប្រមូលលុយពីអ្នកចូលទស្សនាបណ្តើរហើយ និយាយបណ្តើរយ៉ាងដូច្នេះថា៖«ខ្ញុំគ្មានដីចំការដូចនេះទេ ខ្ញុំមានតែដីក្នុងភូមិឯណោះ។ ខ្ញុំគ្រាន់តែ សុំដីចំការនេះ ពីអ្នក ភ្នំពេញ សម្រាប់ដាំផ្កាលក់បណ្តោះអាសន្នប៉ុណ្ណោះ។ ប្រសិនបើម្ចាស់គេយកវិញ ខ្ញុំពុំមានដីដាំ ផ្កាធំទៀតទេ»។
យ៉ាងណា លោកស្រី សុត ប៉ិច បានបន្តនិយាយទាំងទឹកមុខញញឹមថា ប្រសិនបើលោកស្រី មានជំនាញច្បាស់លាស់ហើយ មានដីធំទៀតនោះ លោកស្រីមានបំណងពង្រីកដីដាំដុះ និង រៀបចំសួនកន្លែងអង្គុយទស្សនាផ្កាឲ្យកាន់តែមានសោភ័ណភាពបន្ថែមទៀត។ តែនេះ វាគ្រាន់តែជាក្តីស្រម៉ៃរបស់ស្ត្រីខាងលើ តែប៉ុណ្ណោះ ព្រោះលោកស្រី ពុំមានជំនាញបច្ចេកទេស រៀបចំឡើយ៕