និស្សិត២រូប មានគំនិតសុទិដ្ឋិនិយមបង្កើតអាជីវកម្មលក់អាហារ Fast Food កូរ៉េ

ជាតិ

សង្គមជាតិ

និស្សិត២រូប មានគំនិតសុទិដ្ឋិនិយមបង្កើតអាជីវកម្មលក់អាហារ Fast Food កូរ៉េ

24, Apr 2016 , 9:20 pm

រូបភាព

ដោយ: ថ្មីៗ

ភ្នំពេញ៖ យុវនិស្សិតពីររូប គឺកញ្ញា ទី សុខម៉ី និងកញ្ញា រស្មី ដាណែត បានរួមគ្នាបង្កើតអាជីវកម្ម លក់អាហារ Fast Food រសជាតិបែបកូរ៉េផ្ទាល់ខ្លួន ក្នុងគោលបំណងផ្សារភ្ជាប់នឹងទ្រឹស្តីដែលអ្នកទាំងពីរសិក្សា នៅក្នុងសាលា និងការអនុវត្តជាក់ស្តែងក្នុងសង្គម។ ក្រៅពីនេះ អ្នកទាំងពីរ ចង់បំផុសគំនិតយុវជនដទៃរៀនបង្កើតអាជីវកម្មថ្មីៗដោយខ្លួនឯង ព្រោះវានឹងជួយឲ្យពួកគេ មានទំនួលខុសត្រូវការងារខ្ពស់ប្រសើរជាងការបម្រើការងារឲ្យអ្នកដទៃ។

យុវនារីពីររូប ជានិស្សិតកំពុងសិក្សាជំនាញសិក្សាអន្តរជាតិ និងសហគ្រិនភាពនៅថ្នាក់ឧត្តមសិក្សា បានបង្កើតការងារពួកគេផ្ទាល់ ផ្ទុយពីយុវជនមួយចំនួន ចាំតែដាក់ពាក្យសុំធ្វើការឲ្យគេ ដើម្បីទទួលប្រាក់ចំណូល និងបទពិសោធន៍ការងារ ផ្សារភ្ជាប់នឹងទ្រឹស្តីសិក្សារបស់ពួកគេ។

កញ្ញា ទី សុខម៉ី ជានិស្សិតឆ្នាំទី៤ ជំនាញ សិក្សាអន្តរជាតិ នៅវិទ្យាស្ថានភាសាបរទេស (IFL) បានសម្រេចចិត្តចាប់ដៃជាមួយកញ្ញា រស្មី ដាណែត អាយុ ២៤ឆ្នាំ ជានិស្សិតឆ្នាំទី ៤ ជំនាញសហគ្រិន ភាព នៃសាកលវិទ្យាល័យបញ្ញាសាស្ត្រកម្ពុជា (PUC) បង្កើតអាវជីកម្មលក់អាហារ Fast Food មាន់បំពងរសជាតិកូរ៉េ ដើម្បីរកចំណូល និងដកពិសោធន៍ការងារជាក់ស្តែង។

មុនឈានដល់ការចាប់ផ្តើមអាជីវកម្ម សហគ្រិនក្មេងខ្ចីទាំងពីរ បានតាំងចិត្តរួចហើយប្រឈមមុខនឹងឧបសគ្គអាជីវកម្មដំបូងរបស់ពួកគេ។ យុវនារីសម្បុរសរ អាយុ ២១ឆ្នាំ និយាយពីមូលហេតុ នាំឲ្យនាងបង្កើតរបរផ្ទាល់ខ្លួនថា នាងមានបំណងបង្កើតសហគ្រិនថ្មី ដោយខ្លួននាងផ្ទាល់ ក្រោយពីនាងបានសង្កេតឃើញពីអាជីវកម្មលក់ម្ហូបអាហារដ៏ពេញនិយមមួយនេះ តាមដងផ្លូវ នៅប្រទេសកូរ៉េខាងត្បូង អំឡុងពេលនាងបានទៅផ្លាស់ប្តូរការសិក្សា រយៈពេលមួយឆ្នាំ នៅទីនោះ ក្នុងឆ្នាំ២០១៤ កន្លងទៅ។

យុវតីកូនអាជីវករនៅរាជធានីភ្នំពេញរូបនេះ និយាយទាំងទឹកមុខញញឹមយ៉ាងដូច្នេះថា៖«ខ្ញុំចង់រកស៊ីជាសហគ្រិនថ្មី ដែលបង្កើតអ្វីថ្មី ជូនប្រជាជន ព្រោះឪពុកម្តាយជាអាជីវករ ក្នុងរាជធានីភ្នំពេញដែរហើយ ស្របពេលប្រទេសយើងកំពុងអភិវឌ្ឍ ខ្ញុំគិតថា យើងរកស៊ីអ្វីក៏ដុះ តែយើងត្រូវសិក្សាមើលថា តើប្រជាជនយើងត្រូវការអ្វី? គេចូលចិត្តអ្វី»?

កញ្ញាបន្តទៀតថា មូលហេតុ នាំឲ្យកញ្ញាបើកអាជីវកម្មលក់មាន់បំពងប្រលាក់គ្រឿង ក្រោយពីនាងត្រឡប់ពីសិក្សារៀនសូត្រនៅកូរ៉េ ពីព្រោះវាជាអាហារពេញនិយមនៅកូរ៉េ និងងាយស្រួលចម្អិនហើយ វេចខ្ចប់រហ័ស។ កញ្ញា សុខម៉ី បានរម្លឹកកាលនៅកូរ៉េថា កាលនោះ កញ្ញាឆ្លៀតរៀនសូត្រ និងស្រាវជ្រាវពីវិធីចម្អិនបែបនេះជាមួយអ្នកគ្រូកូរ៉េម្នាក់ នៅក្នុងព្រះវិហារ គ្រឹស្ទមួយ ទើបកញ្ញាចេះហើយ អាចបើកអាជីវកម្មមួយ នៅកម្ពុជា នាពេលនេះ។

កញ្ញា សុខមី ប្រាប់ថា នាងមានលក់មាន់បំពងប្រលាក់គ្រឿង ឬអាហារស៊ូស៊ី (Saucy) រសជាតិបែបកូរ៉េឈ្ងុយឆ្ងាញ់ដែលកញ្ញាចូលចិត្ត ដូចជា រសជាតិដើម ហិល និងទឹកឃ្មុំ។ កញ្ញាប្រាកដចិត្តថា ប្រជាជនខ្មែរពិតជាចូលចិត្តរសជាតិអាហារទាំងនេះដែរ ពីព្រោះរសជាតិវាស្រដៀងនឹងរសជាតិខ្មែរហើយ តម្រូវតាមចំណូលចិត្តប្រជាជនខ្មែរ ពិសេសគឺយុវជនដែរ ទើបនាំឲ្យកញ្ញាបង្កើតអាជីវកម្មនេះឡើង។

កញ្ញា សុខម៉ី និងកញ្ញា ដាណែត បានផ្តើមអាជីកម្មលក់អាហារបែបកូរ៉េក្នុងតូបតូចមួយមានរូបរាងដូច កុងតឺន័រ តាមបណ្ដោយផ្លូវមួយ កែងនឹងមហាវិថីសហព័ន្ធរុស្ស៊ី ទល់មុខវិទ្យាស្ថានភាសាបរទេស កាលពីឆ្នាំមុន។ អ្នកទាំងពីរ ជួលបុគ្គលិកពីរនាក់ ឲ្យចម្អិនមាន់បំពង និងផ្សំគ្រឿងរសជាតិដើមពីកូរ៉េ ដើម្បីបម្រើអតិថិជន ចាប់ពីម៉ោង ៩ព្រឹក ដល់ ៨យប់។

អ្នកទាំងពីរឲ្យដឹងថា ពួកគេបានចំណាយដើមទុនជាង ៥ពាន់ដុល្លារអាមេរិក ដើម្បីរៀបចំអាជីវកម្មនេះឡើងហើយ គេចំណាយពី ៦០ ទៅ៧០ដុល្លារ ទិញសាច់មាន់ ទឹកជ្រលក់ និងម្ស៉ៅក្នុងមួយថ្ងៃៗ សម្រាប់ឲ្យបុគ្គលិកពីរអ្នកទៀត ចម្អិនលក់ជូនអតិថិជន គោលដៅគេ។ ចំពោះចំណូលវិញ អ្នកទាំងពីរ អាចរកចំណូលបានពីជាង ១០០ ទៅ ១៥០ដុល្លារអាមេរិក ក្នុងមួយថ្ងៃៗ។

កញ្ញា ទី សុខម៉ី និស្សិតកំពុងសិក្សាជំនាញសិក្សាអន្តរជាតិ បាននិយាយទាំងសុទិដ្ឋិនិយមយ៉ាងដូច្នេះថា៖«ការចាប់ផ្តើមអាជីវកម្មដំបូង យើត្រូវពីរៀនពីអ្នកដទៃ យើងត្រូវដឹងបញ្ហា បទពិសោធន៍ការងារ។ ពួកគេយើងនៅក្មេង ប្រសិនបើយើងមានកំហុសនោះ យើងពេលវេលាច្រើនកែតម្រូវកំហុស ព្រមទាំងរៀនបណ្តើរអនុវត្តបណ្តើរ»។

កញ្ញានិយាយទាំងទំនួលខុសត្រូវថា ប្រសិនបើកញ្ញាធ្វើការងារឲ្យគេនោះ កញ្ញានឹងមិនយល់ច្បាស់ពីសង្វាក់ការងារលម្អិត ដូចជា ការគ្រប់គ្រងធនធានមនុស្ស ហិរញ្ញាវត្ថុ ការដោះស្រាយបញ្ហា ការសិក្សាទីផ្សារសេដ្ឋកិច្ច នយោបាយប្រទេស និងគោលដៅពង្រីកអាជីវកម្មនោះទេ។

បើតាមគំនិតសហគ្រិនវ័យក្មេង សុខម៉ី ការបើកអាជីវកម្មដំបូង គេត្រូវសិក្សាចំណុចសំខាន់ លើមនុស្ស តម្លៃ និងទីតាំង ព្រោះវាទាក់ទងនឹងចំណូលពលរដ្ឋ វប្បធម៌។ កញ្ញាលើកជាសំណួរមួយឧទាហរណ៍ថា តើប្រជាជនប្រទេសនោះ ចូលចិត្តរសជាតិបែបណា?

មិនខុសនឹងគំនិតកញ្ញា សុខម៉ី កញ្ញា រស្មី ដាណែត ម្ចាស់សហគ្រិនវ័យក្មេងមួយរូបដែរនោះ បានិយាយថា ការបង្កើតអាជីវកម្មមួយផ្ទាល់ខ្លួន នាំឲ្យនាងមួយទំនួលខុសត្រូវខ្ពស់ ព្រោះវាទាក់ទងនឹងហានិភ័យអាជីវកម្មនាងផ្ទាល់។

យុវនារីវ័យ ២៤ឆ្នាំ ដែលធ្លាប់មានពិសោធន៍ការងារស្ម័គ្រចិត្ត ការងារធនាគារ និងការផ្លាស់ប្តូរការសិក្សាក្រៅប្រទេស រូបនេះ បន្តនិយាយថា ប្រសិនបើនាងមិនចាប់ផ្តើម ពី អាជីវកម្មមួយតាមលទ្ធភាពទេនោះ នាងក៏ពុំអាចឈានទៅពង្រីកអាជីវកម្មធំបានដែរ។

យុវនារីរាងស្តើងរូបនេះ និយាយទាំងទឹកមុខមាំថា៖«បញ្ហានៅតែជាបញ្ហា តែយើងត្រូវមានវិធីដោះស្រាយ? បញ្ហាទាំងអស់ សុទ្ធមានដំណោះស្រាយ»។

យុវនារីមានគំនិតសុទិដ្ឋិនិយមលើសហគ្រិនភាពរូបនេះ បន្តថា អំឡុងពេលបើកអាជីវកម្ម នេះ នាងអាចសិក្សាពីបញ្ហាទីផ្សារ និងការគ្រប់គ្រងធនធានមនុស្ស ព្រមទាំងទ្រឹស្តីអាជីកម្ម មុននឹងនាងឈានទៅពង្រីកអាជីវកម្មកាន់តែធំបន្ថែមទៀត។

យុវនារីទាំងពីរ មានគំនិតសុទិដ្ឋិនិយមថា ពួកគេនឹងអាចពង្រីកសាខាអាជីវកម្មពេញនិយមបែបកូរ៉េនេះ ច្រើនទីតាំងបន្ថែមទៀត នៅរាជធានីភ្នំពេញ អនាគត ពីព្រោះពួកគេគិតថា វាជាម្ហូបពេញនិយមសម្រាប់អ្នកបរិភោគ និងងាយស្រួលរៀបចំបង្កើត ចម្អិន ព្រមទាំងវេចខ្ចប់ដែរ៕