ជាតិ
អាកាសធាតុ៖ កំដៅបន្តកើនឡើង តែអាចមានភ្លៀងធ្លាក់នៅស្ទើរទូទាំងប្រទេស
× សីតុណ្ហភាព ចាប់ពីថ្ងៃទី២៣ខែមេសា ដល់ថ្ងៃទី៣ខែឧសភា នៅបន្តកើនឡើ់ង តែអាចមានភ្លៀងធ្លាក់នៅស្ទើរទូទាំងប្រទេស។ ផ្អែកតាមការជូនដំណឹងរបស់ក្រសួងធនធានទឹក និងឧតុនិយម សីតុណ្ហភាពអតិបរមានៅតំបន់ទំនាបកណ្តាលចាប់ពី ៣៨ ដល់ ៤១ អង្សា ខណៈតំបន់ខ្ពង់រាបមានសីតុណ្ហភាពចាប់ពី៣៦ ដល់ ៤២ អង្សា។ ចំណែកតំបន់មាត់សមុទ្រមានសីតុណ្ហភាពចាប់ពី ៣៥ ដល់ ៣៧ អង្សា។
ជាមួយគ្នានេះដែរ ស្ថានភាពទឹកភ្លៀងចាប់ពីថ្ងៃទី២៣ខែមេសា ដល់ថ្ងៃទី៣ខែឧសភា អាចមានភ្លៀងធ្លាក់តិចនៅខេត្តកោះកុង ព្រះសីហនុ បន្ទាយមានជ័យ ឧត្តរមានជ័យ ប៉ៃលិន បាត់ដំបង សៀមរាប និងខេត្តពោធិ៍សាត់។ រីឯស្ថានភាពទឹកភ្លៀងចាប់ពីថ្ងៃទី២៨ខែមេសា ដល់ថ្ងៃទី៣ខែឧសភា នៅខេត្តព្រះវិហារ កំពង់ធំ កំពង់ចាម ត្បួងឃ្មុំ ស្ទឹងត្រែង ក្រចេះ រតនគិរី មណ្ឌលគិរី ព្រៃវែង ស្វាយរៀង អាចមានភ្លៀងធ្លាក់ពីតិចទៅបង្គួរ។ ដោយឡែកនៅរាជធានីភ្នំពេញ ខេត្តកណ្តាល កំពង់ស្ពឺ កំពង់ឆ្នាំង និងខេត្តតាកែវ អាចមានភ្លៀងធ្លាក់តិច។
ក្រសួងធនធានទឹក ក៏អំពាវនាវផងដែរឲ្យប្រុងប្រយ័ត្នបាតុភូត ភ្លៀងលាយឡំផ្គរ រន្ទះ ខ្យល់កន្ត្រាក់ ដែលអាចកើតមាន ចាប់ពីថ្ងៃទី២៨ខែមេសា ដល់ថ្ងៃទី១ខែឧសាភា នៅខេត្តព្រះវិហារ កំពង់ធំ រតនគិរី មណ្ឌលគិរី ស្ទឹងត្រែង ក្រចេះ កំពង់ចាម ត្បួងឃ្មុំ ព្រៃវែង និងខេត្តស្វាយរៀង។
© រក្សាសិទ្ធិដោយ thmeythmey.com