អន្តរជាតិ
មីស៊ីលបាញ់ពីនាវាមុជទឹករបស់កូរ៉េខាងជើងអាចមានសមត្ថភាពវាយប្រហារក្រោមទឹកបានហើយ
× បើទោះបីជាសហគមន៍អន្តរជាតិបាននិងកំពុងតែបន្តអនុវត្តន៍ទណ្ឌកម្មធ្ងន់ធ្ងរប្រឆាំងនឹងកូរ៉េខាងជើងលើការគំរាមកំហែងសន្តិសុខយ៉ាងណាក៏ដោយរដ្ឋាភិបាលក្រុងព្យុងយ៉ាងមិនបានថមថយសកម្មភាពនិងមហិច្ឆតារបស់ខ្លួនឡើយ។ចុងក្រោយនេះក្រុងព្យុងយ៉ាងក៏បានប្រកាសពីជោគជ័យថ្មីមួយនៃការបាញ់មីស៊ីលពីនាវាមុជទឹកដែលបានធ្វើឲ្យលោកគីមជុងអ៊ុនរីករាយជាខ្លាំងផងដែរ។
កូរ៉េខាងជើងបានប្រកាសពីជោគជ័យមួយទៀតនៃការបាញ់មីស៊ីលពីក្រោមទឹកដែលជាយុទ្ធសាស្ត្រមួយថ្មីនៃការបាញ់មីស៊ីលពីនាវាមុជទឹក។ការបាញ់សាកល្បងនោះត្រូវបានបញ្ជានិងណែនាំដោយផ្ទាល់ពីប្រមុខកំពូលកូរ៉េខាងជើងលោកគីមជុងអ៊ុន។នេះបើយោងតាមសារព័ត៌មានចិនPeople’s Daily ដែលបានដកស្រង់ចេញពីព័ត៌មានកូរ៉េខាងជើងKCNAនៅថ្ងៃទី២៤ខែមេសានេះ។
ការបាញ់សាកល្បងមានគោលបំណងដើម្បីបងា្ហញពីស្ថិរភាពនៃប្រព័ន្ធដំណើរការបាលីស្ទីកក្រោមទឹកក្នុងជម្រៅអប្បរមានៃទឹកនិងកម្លាំងនៃការផុសចេញពីក្រោមទឹកដោយម៉ាស៊ីនអភិវឌ្ឍន៍ប្រភេទថ្មីរបស់កូរ៉េខាងជើង។នេះបើយោងតាមប្រភពព័ត៌មានដដែលដែលបានបន្ថែមដែរថាការបាញ់សាកល្បងមីស៊ីលពីនាវាមុជទឹកក៏បានបង្ហាញពីជោគជ័យមួយដ៏អស្ចារ្យហើយលោកគីមជុងអ៊ុនក៏ពេញចិត្តនឹងលទ្ធផលនោះដែរ។
ប្រភពព័ត៌មាននោះក៏បានសង្កត់ធ្ងន់ដែរថាជោគជ័យនៃការបាញ់នោះក៏បានបញ្ជាក់ថាបច្ចេកវិទ្យានៃមីស៊ីលបាញ់ចេញពីនាវាមុជទឹករបស់កូរ៉េខាងជើងបានបំពេញលក្ខណៈបច្ចេកទេសគ្រប់គ្រាន់ហើយសម្រាប់«ប្រតិបត្តិការវាយប្រហារក្រោមទឹក»។
ជុំវិញបញ្ហានេះដែរអ្នកនាំពាក្យក្រសួងការបរទេសអាមេរិកលោកJohn Kirbyបានអះអាងថាការប្រើប្រាស់បច្ចេកវិទ្យានៃមីស៊ីលប៉ាលីស្ទីករបស់កូរ៉េខាងជើងបានបំពានយ៉ាងច្បាស់លើសេចក្តីសម្រេចរបស់ក្រុមប្រឹក្សាសន្តិសុខ។ជាមួយនឹងគ្នានៅថ្ងៃទី២៣ខែមេសាម្សិលមិញបារាំងក៏បានទទូចឲ្យសហភាពអឺរ៉ុបអនុម័តទណ្ឌកម្មបន្ថែមជាលក្ខណៈឯកតោភាគីលើកូរ៉េខាងជើងប្រសិនបើព័ត៌មាននៃការបាញ់នោះត្រូវបានបញ្ជាក់ជាការពិត។
សូមរម្លឹកផងដែរថា នៅថ្ងៃទី០២ ខែមីនាកន្លងទៅក្រុមប្រឹក្សាសន្តិសុខអង្គការសហប្រជាតិបានអនុម័តជាឯកច្ឆ័នលើសេចក្តីសម្រេចបន្ថែមប្រឆាំងសកម្មភាពដ៏គឃ្លើនរបស់កូរ៉េខាងជើងក្នុងការបាញ់សាកល្បងគ្រាប់បែកមីស៊ីលតាំងពីឆ្នាំ២០១៤ និង២០១៥ និងជាពិសេសនោះការបាញ់គ្រាប់បែកបរមាណូនៅថ្ងៃទី០៦ ខែមករា និងនៅថ្ងៃទី០៧ ខែកុម្ភៈ ឆ្នាំ២០១៦នេះ។ សេចក្តីសម្រេចលេខ២២៧០ ដែលបានបញ្ញាត្តិ៥២ចំណុចនោះ ត្រូវបានចាត់ទុកថាជាទណ្ឌកម្មមួយដ៏ធ្ងន់ធ្ងរបន្ថែមលើទណ្ឌកម្មដែលបានអនុម័តដោយក្រុមប្រឹក្សាសន្តិសុខកន្លងមក៕
Tag:
កូរ៉េខាងជើង
មីស៊ីល
© រក្សាសិទ្ធិដោយ thmeythmey.com