សហព័ន្ធកីឡាចំបាប់កម្ពុជាបាននឹងកំពុងធ្វើការហ្វឹកហាត់យ៉ាងសកម្ម ដើម្បីពង្រឹងសមត្ថភាពនិងបច្ចេកទេស សម្រាប់ត្រៀមខ្លួនចូលរួមប្រកួតក្នុងព្រឹត្តិការណ៍ជាតិ និងអន្តរជាតិធំៗជាច្រើននៅក្នុងឆ្នាំនេះ ហើយអ្វីដែលសំខាន់គឺត្រៀមសម្រាប់ការធ្វើជាម្ចាស់ផ្ទះជើងឯកអាស៊ីអាគ្នេយ៍និងស៊ីហ្គេម នាពេលខាងមុខ។ នេះបើយោងតាមការបញ្ជាក់របស់លោក ធិន វិចិត្រ អគ្គលេខាធិការសហព័ន្ធកីឡាចំបាប់កម្ពុជា។
លោក ធិន វិចិត្រ អគ្គលេខាធិការសហព័ន្ធកីឡាចំបាប់កម្ពុជាបានបញ្ជក់ថា បច្ចុប្បន្នកីឡាករកីឡាការិនីចំបាប់ បាននឹងកំពុងធ្វើការហ្វឹកហាត់យ៉ាងសកម្មក្នុងការពង្រឹងសមត្ថភាព និងបច្ចេកទេសរបស់ខ្លួន សម្រាប់ត្រៀមខ្លួនចូលរួមប្រកួតក្នុងព្រឹត្តិការណ៍ជាតិ និងអន្តរជាតិធំៗ ជាពិសេសត្រៀមធ្វើជាម្ចាស់ផ្ទះ ជើងឯកអាស៊ីអាគ្នេយ៍(Asian ChapionshipGames 2016)នៅក្នុងខែវិច្ឆិកា ចុងឆ្នាំនេះ។
លោកអគ្គលេខារូបនេះបានឲ្យដឹងទៀតថា ព្រឹត្តិការណ៍ដែលកម្ពុជាត្រូវចូលរួមប្រកួតរួមមាន ការបញ្ជូនកីឡាករកីឡាការិនីចំនួន២រូបចូលរួមប្រកួតជម្រុះកម្រិតពិភពលោកលើកទី២ នៅប្រទេសទួគី, ការចូលរួមប្រកួត Asian Beach Games នៅទីក្រុងដាណាង ប្រទេសវៀតណាម និងការបញ្ជូនកីឡាករបញ្ជូនកីឡាករកីឡាការិនីទៅចូលរួមប្រកួត National Games ក្នុងខែកញ្ញា។
ដោយឡែក នៅក្នុងខែវិចិ្ឆកា កម្ពុជានឹងធ្វើជាម្ចាស់ផ្ទះការប្រកួតកីឡាចំបាប់ជ្រើសរើសជើងឯកអាស៊ីអាគ្នេយ៍លើកទី១ ដែលមានប្រទេសនៅក្នុងតំបត់អាស៊ានចូលរួមប្រមាណជាជិត១០ប្រទេស ជាពិសេសប្រទេសដែលមានវិញ្ញាសាចំបាប់។ ហើយប្រទេសនីមួយៗដែលចូលរួមក្នុងព្រឹត្តិការណ៍នេះអាចដាក់កីឡាករកីឡាការិនីរបស់ខ្លួនតាមលទ្ធភាពរបស់ខ្លួន ពោលគឺរាល់ការចំណាយជាបន្ទុករបស់ប្រទេសដែលចូលរួម។
ពាក់ព័ន្ធទៅនឹងគោលបំណងនៃការរៀបចំធ្វើជាម្ចាស់ផ្ទះនៃការប្រកួតកីឡាចំបាប់ជើងឯកអាស៊ីអាគ្នេយ៍នេះ លោក ធិន វិចិត្រ បានបកស្រាយថា គឹសម្រាប់ត្រៀមការប្រកួតស៊ីហ្គេមលើកទី៣២ ឆ្នាំ២០២៣ ដែលកម្ពុជាធ្វជាម្ចាស់ផ្ទះ ម្យ៉ាងទៀតដើម្បីផ្លាស់ប្តូរបទពិសោធន៍ និងបច្ចេករបស់កីឡាករកីឡាការិនីកម្ពុជាជាមួយប្រទេសដែលបានចូលរួម។
ទន្ទឹមនឹងនេះ ដើម្បីត្រៀមធ្វើជាម្ចាស់ផ្ទះនេះ សហព័ន្ធនឹងធ្វើការបណ្តុះបណ្តាលធនធានអាជ្ញាកណ្តាល និងចៅក្រម ជាពិសេសអាជ្ញាកណ្តាលនៃការប្រកួត និងការបណ្តុះបណ្តាលគ្រូកម្រិតមួយបន្ត ទោះបីជាបានបញ្ចប់មួយវគ្គក៏ដោយ។
លោក ធិន វិចិត្រ បានបញ្ជាក់ទៀតថា៖«បច្ចុប្បន្នចំនួនអាជ្ញាកណ្តាល និងចៅក្រមសម្រាប់រៀបចំការប្រកួតនៅក្នុងព្រឹតិ្តការណ៍អន្តរជាតិមិនទាន់ឆ្លើយតបទៅនឹងតម្រូវនោះទេ ទោះបីជាកីឡាចំបាប់កំពុងតែមានភាពរីកចម្រើន និងអាចដណ្តើមបានមេដាយរាល់ការចូលរួមប្រកួតក៏ដោយ។ ការខ្វះខាតនេះដោយសារចំបាប់ជាកីឡាមួយប្រភេទដែលគេស្គាល់ដោយតំបន់ និងមិនសូវមានសកម្មភាព នេះជាហេតុធ្វើពួកគេមិនចង់ចូលរួមហ្វឹកហាត់»។
លោកអគ្គលេខាធិការរូបនេះបានរៀបរាប់ថា មុននឹងធ្វើការប្រកួត National Games សហព័ន្ធបានរៀបចំផែនការរួចរាល់ហើយ គឺនឹងអញ្ជើញគណៈកម្មការប្រតិបត្តិអាស៊ី ដែលទទួលបន្ទុកអាស៊ីអាគ្នេយ៍ បើកវគ្គបណ្តុះបណ្តាលចៅក្រម និងអាជ្ញាកណ្តាលអន្តរជាតិរយៈពេលពី៣ថ្ងៃទៅ៥ថ្ងៃ ដើម្បីដំឡើងកម្រិតអាជ្ញាកណ្តាល និងចៅក្រមឲ្យមានកម្រិតជាអាជ្ញាកណ្តាលអន្តរជាតិ។
លោកបានបន្ថែមថា បច្ចុប្បន្នសហព័ន្ធពុំទាន់មានអាជ្ញាកណ្តាលដែលមានកម្រិតអន្តរជាតិនោះទេ ជាក់ស្តែងសមត្ថភាពគ្រូបង្វឹកក៏ដូចជាចៅក្រម និងអាជ្ញាកណ្តាលបច្ចុប្បន្នសុទ្ធសឹងតែអាចដំឡើងកម្រិតជាអាជ្ញាកណ្តាលអន្តរជាតិបានទាំងអស់ ប៉ុន្តែដោយសារពុំមាន License អន្តរជាតិ។ ទោះបីជាយ៉ាងនេះកី្តសហព័ន្ធព្យាយាមធ្វើយ៉ាងណាឲ្យមានអាជ្ញាកណ្តាលអន្តរជាតិកម្រិត១ យ៉ាងតិច៥នាក់ក្នុងឆ្នាំនេះ។
បច្ចុប្បន្នអ្នកដែលមាន License អន្តរជាតិគឺមានតែពីរនាក់នោះទេ គឺ ឯកឧត្តម វ៉ាត់ ចំរើន ប្រធានសហព័ន្ធកីឡាចំបាប់កម្ពុជា និងលោក ហុក ឈាងគីម តែប៉ុណ្ណោះ ប៉ុន្តែឆ្នាំនេះសហព័ន្ធបានផ្ញើ Email ទៅកាន់សហព័ន្ធអន្តរជាតិ ដើម្បីដក License ទាំងនេះ ដោយសារតែសហព័ន្ធគិតថា ពួកគាត់ទាំងពីរពុំមានពេលវេលានោះទេ។
ជាមួយគ្នានេះ ការខ្វះខាតអាជ្ញាកណា្តលកម្រិតអន្តរជាតិ វាបានក្លាយជាបញ្ហាមួយដ៏ធំសម្រាប់សហព័ន្ធចំបាប់ ព្រោះរាល់ការប្រកួតប្រសិនបើមិនអាជ្ញាកណ្តាលរបស់ខ្លួន ក្នុងគណៈកម្មការបច្ចេកទេសនៃការប្រកួតនោះទេ ពោលគឺមានការចាញ់ប្រៀបគេរួចទៅហើយ។
គួរបញ្ជាក់ថា សហព័ន្ធកីឡាចំបាប់កម្ពុជាបាននឹងកំពុងធ្វើការហ្វឹកហាត់យ៉ាងសកម្មភាពនៅក្នុងពហុកីឡដ្ឋានជាតិ ដើម្បីពង្រឹងសមត្ថភាព បច្ចេកទេស កីឡាករកីឡាការិនីជម្រើសជាតិថ្នាល សម្រាប់ត្រៀមចូលរួមប្រកួតក្នុងព្រឹតិ្តការណ៍ជាតិ និងអន្តរជាតិផ្សែងៗ ជាពិសេសត្រៀមសម្រាប់ការប្រកួតស៊ីហ្គេមលើកទី៣២ ឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះ៕