អន្តរជាតិ
លោក ហ្វ្រង់ស្វ័រ ហូឡង់ យកលុយរដ្ឋបង់ឲ្យជាងកាត់សក់ខ្លួនក្នុង១ខែ៨០០០អឺរ៉ូ
× អ្នកកាសែតឈ្មោះ Aziz Zemmouri និង Stephanie Marteau ទើបចេញផ្សាយសៀវភៅមួយក្បាលដែលមានចំណងជើងថា « L'Élysée Off» ។ សៀវភៅនេះ ផ្តល់ព័ត៌មានពីការចំណាយផ្សេងៗរបស់វិមានប្រធានាធិបតី Elysée ជាពិសេសការចាយវាយលើសេវាកម្មផ្សេងៗរបស់លោក ហ្វ្រង់ស្វ័រ ហូឡង់។
នៅក្នុងសៀវភៅ « L'Élysée Off» ដែលចេញផ្សាយកាលពីខែមីនា ឆ្នាំ២០១៦ អ្នកកាសែតឈ្មោះ Aziz Zemmouri និង Stephanie បានបញ្ជាក់ឲ្យដឹងថា លោក Olivier Benhamou ម្ចាស់ហាងកាត់សក់មួយកន្លែងនៅក្នុងទីក្រុងប៉ារីស បានទទួលប្រាក់ខែជាប្រចាំចំនួន៨០០០អឺរ៉ូ ចំពោះសេវាកម្មកាត់សក់ជូនលោកប្រធានាធិបតីបារាំង ហ្វ្រង់ស្វ័រ ហូឡង់។
បណ្តាញសារព័ត៌មានបារាំង បានលើកឡើងថា ជាងកាត់សក់ឈ្មោះ Olivier Benhamou ប្រហែលជាត្រូវជ្រើសរើសដោយលោកស្រី Valerie Trierweiler អតីតភរិយារបស់លោក នៅពេលដែលពួកគាត់ស្គាល់គ្នានាអំឡុងនៃយុទ្ធនាការឃោសនាបោះឆ្នោតនៅឆ្នាំ២០១២ ។
មិនមានការអះអាងថា បើគិតចាប់តាំងពីការចែកផ្លូវគ្នារវាងលោក ហូឡង់ និងលោកស្រី Trierweiler នាឆ្នាំ២០១៤ មក លោក Olivier Benhamou នៅបន្តការងារកាត់សក់ជូនលោកប្រធានាធិបតី ឬយ៉ាងណានោះឡើយ។
ក្រុមអ្នកកាសែតបានបង្ហាញឲ្យឃើញនូវការចាយថវិការដ្ឋច្រើនសន្ធឹកសន្ធាប់ និងខ្ជះខ្ជាយរបស់លោកប្រធានាធិបតីបារាំង ហ្វ្រង់ស្វ័រ ហូឡង់ បើគិតចាប់តាំងពីការចូលកាន់តំណែងកាលពីខែឧសភា ឆ្នាំ២០១២ មក ដែលក្នុងនោះមានដូចជា ប្រាក់ខែសម្រាប់អ្នកបើកបររថយន្ត ការចំណាយលើកាហ្វេថ្លៃៗ ការជួសជុលទីតាំងផ្សេងៗ ដើម្បីបម្រើប្រយោជន៍ផ្ទាល់របស់លោក ហូឡង់៕
© រក្សាសិទ្ធិដោយ thmeythmey.com