អន្តរជាតិ
បច្ចេកវិទ្យា
អ្នកស្រាវជ្រាវរកឃើញដោយចៃដន្យដែលថ្មទូរសព្ទកាន់យូរជាងថ្មធម្មតា៤០០ដង
×
ថ្មដែលមិនសូវកាន់ គឺជាសត្រូវរបស់ស្មាតហ្វូន ដោយភាគច្រើន វាឆាប់ក្តៅ និងឆាប់អស់ថាមពល។ ដំណឹងល្អមួយត្រូវបានផ្សព្វផ្សាយកាលពីពេលថ្មីៗកន្លងមកនេះ ដោយក្រុមអ្នកស្រាវជ្រាវនៅសាកលវិទ្យាល័យកាលីហ្វនីញ៉ា សហរដ្ឋអាមេរិក បានរកឃើញថា ថ្មទូរសព្ទអាចដំណើរការយូរជាងថ្មធម្មតារហូតដល់ទៅ៤០០ដងឯណោះ។
បើតាមកាសែត The Telegraph ការស្រាវជ្រាវនេះ ត្រូវបានរកឃើញដោយចៃដន្យ នាអំឡុងនៃការសិក្សារបស់បេក្ខជនបណ្ឌិតនៃសកលវិទ្យាល័យ University of California។ Mya Le Thai ប្រធានក្រុមស្រាវជ្រាវ បាននិយាយដោយជំនឿថា៖ «ការរកឃើញថា ថ្មអាចកាន់ភ្លើងយូរជាងថ្មធម្មតា៤០០ដង គឺជាសញ្ញាថ្មីមួយ ហើយវានឹងអាចមានថាមពលយូរជាងនេះបន្ថែមទៀត»។
បន្ថែមពីលើនេះ អ្នកស្រាវជ្រាវបានអះអាងថា ថាមពលថ្ម មិនមានបញ្ហានោះឡើយ បន្ទាប់ពីឆ្លងកាត់ការដាក់សាកចំនួន២០ម៉ឺនដង ខណៈថ្មទូរសព្ទដែលលក់នៅទីផ្សាអាចរងនូវការខូចខាតបន្ទាប់ពីសាកអស់ប្រមាណ៧០០០ដង។
ទោះបីជាយ៉ាងណាក៏ដោយ គេមិនទាន់មានគម្រោងផ្លូវការណាមួយផលិតថ្មប្រភេទនេះឡើយ ដោយសារតែវាជាការរកឃើញដោយចៃដន្យ ហើយគេត្រូវការពេលវេលាបន្ថែមទៀត ដើម្បីផលិតថ្មដែលរឹងមាំ និងមិនសូវបង្កគ្រោះថ្នាក់។ គេរំពឹងថា គំហើញនេះ នឹងត្រូវបានប្រើប្រាស់សម្រាប់ទូរសព្ទស្មាតហ្វូន Tables, រថយន្ត កុំព្យូទ័រ និងឧបករណ៍អេឡិចត្រូនិចផ្សេងៗ៕
© រក្សាសិទ្ធិដោយ thmeythmey.com