ក្រសួងអប់រំ ផ្តល់ប្រាក់រង្វាន់លើកទឹកចិត្តដល់ សៀវម៉ី, ពុទ្ធារីម និងគ្រូបង្វឹក

កីឡាជាតិ

ជាតិ

ក្រសួងអប់រំ ផ្តល់ប្រាក់រង្វាន់លើកទឹកចិត្តដល់ សៀវម៉ី, ពុទ្ធារីម និងគ្រូបង្វឹក

27, Apr 2016 , 7:39 pm

រូបភាព

ដោយ:

វីរៈកីឡាការិនី ស៊ន សៀវម៉ី ទទួលបានប្រាក់រង្វាន់លើកទឹកចិត្តជិត១០០លានរៀលពីក្រសួងអប់រំយុវជន និងកីឡា ក្រោយពីឈ្នះកៅអីពេញសិទ្ធចូលរួមប្រកួតកីឡាអូឡាំពិកនៅប្រទេសប្រេស៊ីល និងឈ្នះមេដាយប្រាក់ពីការប្រកួតកីឡាតេក្វាន់ដូជើងឯកទ្វីបអាស៊ីឆ្នាំ២០១៦ (Asian Taekwondo Championships 2016) នៅប្រទេសហ្វីលីពីន។

វីរៈកីឡាការិនី ស៊ន សៀវម៉ី ទទួលបានប្រាក់រង្វាន់លើកទឹកចិត្តជិត ១០០លានរៀលពីក្រសួងអប់រំ យុវជន និងកីឡា បន្ទាប់ពីសាងព្រឹត្តិការណ៍ជាប្រវត្តិសាស្ត្រជូនកម្ពុជាក្រោយពីរូបគេបានឈ្នះមេដាយមាសនៃការប្រកួតជម្រុះអូឡាំពិក និងមេដាយប្រាក់ជើងឯកទ្វីបអាស៊ីកីឡាតេក្វាន់ដូ នៅប្រទេសហ្វីលីពីន។ វីរៈកីឡាការិនី ស៊ន សៀវម៉ី ទទួលបានសិទ្ធចូលរួមប្រកួតកីឡាអូឡាំពិកនៅទីក្រុងរីយ៉ូ ប្រទេសប្រេស៊ីល ដោយមិនបាច់ប្រើ WILD CARD ក្រោយពីឈ្នះមេដាយមាស។

សម្រាប់ការឈ្នះមេដាយមាសនៃការប្រកួតជម្រុះអូឡាំពិក ស៊ន សៀវម៉ី ទទួលបានប្រាក់រង្វាន់ ៨០លានរៀល ខណៈមេដាយប្រាក់ជើងឯកទ្វីបអាស៊ីទទួលបាន ១៣លានរៀល ពោលគឺ ស៊ន សៀវម៉ី ទទួលបានប្រាក់រង្វាន់លើកទឹកចិត្តសរុប ៩៣លានរៀល។

ជាមួយគ្នានេះ លោកគ្រូបង្វឹក ឆយ យ៉ុងសុក ក៏ទទួលបានប្រាក់រង្វាន់លើកទឹកចិត្តស្មើកីឡាការិនី ស៊ន សៀវម៉ី ផងដែរ។ ចំណែកកីឡាការិនី ឈឿង ពុទ្ធារីម ដែលឈ្នះមេដាយសំរឹទ្ធពីការប្រកួតកីឡាតេក្វាន់ដូជើងឯកទ្វីបអាស៊ី(Asian Taekwondo Championships 2016) នៅប្រទេសហ្វីលីពីន ទទួលបានប្រាក់រង្វាន់លើកទឹកចិត្តចំនួន ១១លានរៀលផងដែរ។

គួរបញ្ជាក់ថា ការប្រគល់ប្រាក់រង្វាន់លើកទឹកចិត្តនេះធ្វើឡើងកាលពីថ្ងៃទី២៦ ខែមេសា នៅវិទ្យាស្ថានជាតិអប់រំ ក្រោមវត្តមានរបស់លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា និងលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា ព្រមទាំងប្រធាននាយកដ្ឋានអប់រំកាយ និងកីឡា៕