អន្តរជាតិ
ចិន ទាត់ចោលរបាយការណ៍អាមេរិកលើប្រតិបត្តិការសេរីភាពធ្វើនាវាចរណ៍
× ក្រសួងការពារជាតិអាមេរិក បានចេញផ្សាយរបាយការណ៍ឆ្នាំ២០១៥ស្តីពីប្រតិបត្តិការនៃការអនុវត្តសិទ្ធិសេរីភាពនៃការធ្វើនាវាចរណ៍។ របាយការណ៍នោះ ក៏បានបញ្ជាក់ពីបញ្ហាប្រឈមជាមួយនឹងចិនផងដែរ។ យ៉ាងណាក៏ដោយ រដ្ឋាភិបាលក្រុងប៉េកាំង មិនទទួលស្គាល់របាយការណ៍នោះឡើយ និងថែមទាំងឲ្យក្រុងវ៉ាស៊ីនតោន គោរពសិទ្ធិប្រទេសដទៃទៀតផង។
ចិន បានទាត់ចោលរបាយការណ៍ក្រសួងការពារជាតិអាមេរិកឆ្នាំ២០១៥ស្តីពីសិទ្ធិសេរីភាពនៃការធ្វើនាវាចរណ៍ និងទទូចឲ្យអាមេរិកបង្ហាញពីការគោរពអធិបតេយ្យ និងសន្តិសុខរបស់ខ្លួនផងដែរ។ ការអះអាងនេះ ត្រូវបានលើកឡើងដោយអ្នកនាំពាក្យក្រសួងការបរទេសចិន លោកស្រី ហួរ ជួនណីង នាឱកាសសង្ខេបព័ត៌មានប្រចាំថ្ងៃនៅថ្ងៃទី២៦ ខែមេសាម្សិលមិញនេះ។
បើយោងតាមរបាយការណ៍របស់ក្រសួងការបរទេសអាមេរិកដែលចេញផ្សាយនៅថ្ងៃទី២៥ខែមេសា កន្លងទៅ ទាហានអាមេរិក បានអនុវត្តសិទ្ធិសេរីភាពនៃការធ្វើនាវាចរណ៍ក្នុងតំបន់ដែលមានការបញ្ហាចំនួន១៣ ដែលរាប់បញ្ចូលទាំងចិនផងដែរនោះ។ របាយការណ៍ បានបញ្ជាក់ថា ប្រតិបត្តិការសេរីភាព នៃការធ្វើនាវាចរណ៍របស់អាមរិកកាលពីឆ្នាំមុន បានប្រឈមជាមួយនឹងការទាមទារយុត្តាធិការរបស់ចិនលើដែនអាកាសខាងលើតំបន់សេដ្ឋកិច្ចផ្តាច់មុខ និងការរឹតត្បិតលើការហោះហើរបស់យន្តហោះបរទេសតាមរយៈតំបន់កំណត់ដែនអាកាសលើតំបន់សមុទ្រខាងកើតផងដែរ។
ជុំវិញបញ្ហានេះ អ្នកនាំពាក្យក្រសួងការបរទេសចិន បានអះអាងថាគោលបំណងនៃរបាយការណ៍នោះគឺមានសារសំខាន់ដើម្បីបង្កើនតួនាទីរបស់អាមេរិកតាមរយៈកងកម្លាំង និងការគាបសង្កត់។ អ្នកនាំពាក្យដដែល ក៏បានបន្ថែមដែលថា សកម្មភាពរបស់អាមេរិកទាំងនេះ គឺជាការប៉ុនប៉ងគ្រប់គ្រងសណ្តាប់ធ្នាប់ដែនសមុទ្រ និងបង្ហាញពីអនុត្តភាពរបស់អាមេរិកផងដែរ។
ជាមួយគ្នានៅថ្ងៃទី២៥ ខែមេសា កន្លងទៅ ក្រសួងការពារជាតិចិន ក៏បានប្រតិកម្ម និងចោទអាមេរិក ថាកំពុងតែជំរុញឲ្យមានយោធូបនីយកម្មសមុទ្រចិនខាងត្បូង ក្រោមលេសនៃការអនុវត្តសិទ្ធិសេរីភាពនៃ ការធ្វើនាវាចរណ៍ និងការហោះហើរ។ ហើយ ចិន ក៏មានការព្រួយបារម្ភ និងប្រឆាំងចំពោះសកម្មភាព ទាំងនោះ ដែលកំពុងតែគំរាមកំហែងដល់អធិបតេយ្យ និងសន្តិសុខ នៃប្រទេសដែលនៅជុំវិញសមុទ្រចិនខាងត្បូង និងកំពុងបំផ្លាញនូវសន្តិសុខ និងស្ថិរភាពក្នុងតំបន់ផងដែរ។
សូមបញ្ជាក់ផងដែរថា អវត្តមាននៃដំណោះស្រាយលើបញ្ហាសមុទ្រចិនខាងត្បូង បានជំរុញឲ្យអាមេរិក បង្កើនវត្តមានរបស់កងទព័ខ្លួនតាមរយៈការអនុវត្តសិទ្ធិសេរីភាពនៃការធ្វើនាវាចរណ៍ដើម្បីប្រឆាំងនឹងសកម្មភាពរបស់ចិន ក្នុងការបន្តសកម្មភាពវាតទីក្នុងតំបន់ជម្លោះ៕
© រក្សាសិទ្ធិដោយ thmeythmey.com