ពីនេះ ពីនោះ
កវី គង្គ ប៊ុនឈឿន៖ ជំងឺខ្វះជំនឿលើខ្លួនឯង
× (បទពាក្យ៨)
កំណាព្យ៖ថ្មីៗ(គង្គ ប៊ុនឈឿន)
ជំងឺខ្វះជំនឿលើខ្លួនឯង នាំឲ្យនឹកក្រែងបារម្ភជានិច្ច
ធ្វើអ្វីតែងតែពឹងគេមិនភ្លេច ឃើញគេជាពេជ្រខ្លួនឯងសំណរ។
ជំងឺមិនជឿខ្លួនឯងថាអាច នាំឲ្យនឹកខ្លាចធ្វើមិនបានល្អ
បង្អន់ជាតិឯងបង្អាប់វប្បធម៌ បែរជាគាំទ្រវប្បធម៌ដទៃ។
ពេលណាក៏ថាខ្មែរមិនដល់គេ គួរស្តាយម្ល៉េះទេ ខ្មែរភ្លេចតម្លៃ
វប្បធម៌ដូចពេជ្រភ្លេចថែកែច្នៃ មិនឲ្យតម្លៃព្រលឹងជាតិឯង។
បើខ្វះជំនឿ គឺខ្វះឆន្ទៈ ដប់ពីរលាននាក់ចិត្តរេដូចផ្សែង
គ្មានគោលលំនឹងពឹងលើខ្លួនឯង ភ្លេចមើលដើមត្រែងអាចឈ្នះព្យុះបាន។
បើខ្វះជំនឿ គឺអស់សង្ឃឹម ដូចមេឃទូរទឹមចាំទីអវសាន្ត
កំចាត់ជំងឺនេះចេញឲ្យបាន ទើបខ្មែរគ្រប់ប្រាណបានលឿនទៅមុខ! ។
០៣.០៦.០១
ប្រភព៖ កម្រងកំណាព្យទស្សនៈ«ជំងឺខ្មែរ»របស់ លោក គង្គ ប៊ុនឈឿន (កវីម្ចាស់ស្ទឹងសង្កែ)
© រក្សាសិទ្ធិដោយ thmeythmey.com