ពីនេះ ពីនោះ
ស្រា៧ប្រភេទដែលគ្រោះថ្នាក់ខ្លាំង!
× និពន្ធដោយប៉ាកកាខ្មៅ!
កំណាព្យបទ ពាក្យ៨
ខ្ញុំសូមនិទានពីរឿងស្រាថ្នាំ ចាស់ស្រុកខ្ញុំផ្តាំមានប្រាំពីរមុខ
ពេលផឹករួចហើយតែងតែនាំទុក្ខ ខ្ញុំរៀបទំនុកទុកពិចារណា។
មានប្រភេទស្រាប្រមាត់សុនខ ផឹកហើយសម្លក់ចង់ហក់ប្រហារ
លែងស្គាល់សាច់ញតិបងប្អូនខាងណា នៅពេលបានស្រាថាស្តីមិនស្តាប់។
មានស្រាវរវឹកផឹកហើយហានក្លា ចង់រករឿងគ្នាចិត្តហ៊ានសម្លាប់
ស្រាប្រមាត់ខ្លា បើតាមគេប្រាប់ អ្នកផឹកតែងយ៉ាប់ផឹកហើយគ្រាំគ្រា។
មានដែរ ស្រាថ្នាំត្រាំប្រមាត់មឹក ផឹកហើយភ្លេចភ្លឹកនឹកចង់បានគ្នា
ចង់រាវបេះបោចមិនខ្លាចវេរា ផឹកហើយរងារចង់បានគ្នាក្បែរ។
មានស្រាមួយទៀតហៅប្រមាត់ពស់ ផឹកហើយខូចឈ្មោះលូនតាមភ្លឺស្រែ
ផឹកចោលកិច្ចការស្រវឹងតែវ៉ែ ធំក្លិនត្រប៉ែទៅក្បែរមិនបាន។
មានប្រភេទស្រាផឹកហើយចង់ដេក អ្នកផឹកដែលស្រេកដាក់ហើយទន់ប្រាណ
ស្រាប្រមាត់ជ្រូកខ្ញុំប្រាប់សន្តាន អ្នកដែលផឹកបានដាក់ហើយចង់ដេក។
ស្រាប្រមាត់សេកមិនដេកផឹកច្រៀង បង្ហើរសំណៀងក្រោមភ្លើងភ្លឺផ្លេក
ស្រវឹងច្រៀងរាំបាយទឹកមិនស្រេក ផឹកច្រៀងដូចសេកទើបដេកបានសុខ។
ស្រាថ្នាំចុងក្រោយផឹកលែងគិតអី ក្រៅពីរកស្រីអត់មិនស្រណុក
ស្រាប្រមាត់ថ្លាន់បើតាមអ្នកស្រុក ចូលពោះហើយស្មុគនឹកឃើញតែស្រី។
អស់ហើយរឿងស្រាខ្ញុំថាប៉ុណ្ណឹង ខុសត្រូវកុំខឹងបើជ្រុលសម្តី
បើផឹកកុំជ្រុលមិត្តទាំងប្រុសស្រី នាំអាប់រាសីខូចទាំងកេរ្តិ៍ឈ្មោះ៕
© រក្សាសិទ្ធិដោយ thmeythmey.com