ជាតិ
ក្រុមយុវជនបង្កើតកម្មវិធីបោះតង់នៅកែវផុស កសិដ្ឋានលោក ម៉ុង ឫទ្ធី នៅចុងខែនេះ
× សៀមរាប៖ ក្រុមយុវជន ដែលមានឈ្មោះថា Cambodia Amazing Trip Planner នឹងរៀបចំកម្មវិធីបោះជំរំតង់ «ឋានសួគ៌កសិកម្មកែវផុស ឧកញ៉ា ម៉ុង ឫទ្ធី» នៅថ្ងៃទី២១ និង២២ ឧសភានេះ។ ដូចកន្លែងផ្សេងៗទៀតដែរ គោលដៅរបស់ក្រុមយុវជននេះ គឺដើម្បីផ្សព្វផ្សាយពីគោលដៅទេសចរណ៍ថ្មីៗ និងប្លែកៗ ដល់សាធារណជនបានស្គាល់។
ក្រុមយុវជន Cambodia Amazing Trip Planner បង្កើតឡើង ដោយធ្វើសកម្មភាពផ្សព្វផ្សាយគោលដៅទេសចរណ៍ក្នុងស្រុក ដោយមិនរកប្រាក់ចំណេញ។ ក្រុមនេះធ្លាប់រៀបចំកម្មវិធីបោះជំរំតង់ជាច្រើនលើករួចមកហើយ ក្នុងនោះ មានដូចជាការបោះតង់មាត់បឹងត្រាវកុដិ ជំរំតង់ឋានសួគ៌ព្រំដែនកម្ពុជា-ថៃ (ប៉ៃលិន)។
នៅថ្ងៃទី២១-២២ ឧសភា ក្រុមយុវជន Cambodia Amazing Trip Planner ដែលជាយុវជនរស់នៅខេត្តសៀមរាប បានរៀបចំកម្មវិធីបោះជំរំតង់នៅកែវផុស កសិដ្ឋានរបស់លោក ម៉ុង ឫទ្ធី ដែលគេស្គាល់ថា ជាសេដ្ឋីកសិកម្មនៅកម្ពុជា។ ការបោះតង់នឹងធ្វើនៅបរិវេណសាលាបឋមសិក្សាឫទ្ធី៥ ។ អ្នករៀបចំកម្មវិធីនេះនិយាយថា ការបោះតង់នេះមិនមានការគាំទ្រថវិកាពីក្រុមហ៊ុនលោក ម៉ុង ឫទ្ធីទេ តែចង់លើកទឹកចិត្តការវិនិយោគរបស់លោក។
លោក សា ឌីណា តំណាងក្រុម Cambodia Amazing Trip Planner បានឲ្យដឹងថា កសិដ្ឋាននៅកែវផុសរបស់លោក ម៉ុង ឫទ្ធី គឺជាការអភិវឌ្ឍដោយមានសក្កានុពលបំផុត។ លោក ឌីណាអះអាងបែបនេះ ក្រោយពីលោកបានធ្វើដំណើរទៅទីនោះ និងបានឃើញរាល់ការអភវិឌ្ឍរបស់លោក ម៉ុង ឫទ្ធី ដែលលោកថា ចង់ចែករំលែកឲ្យសាធារណជនដទៃបានឃើញដូចលោកដែរ។ លោកបន្ថែមថា៖« យើងឃើញថា ការវិនិយោគរបស់លោកឧកញ៉ា ម៉ុង ឫទ្ធី ជាការអភិវឌ្ឍដោយស្នាមញញឹម។ ខ្ញុំមិនសំដៅទៅអ្នកវិនិយោគផ្សេងទេ តែចង់ឲ្យអ្នកវិនិយោគដទៃយកគំរូតាមលោក ម៉ុង ឫទ្ធី។ ហើយប្រជាជននៅទីនោះ បានទទួលផលយ៉ាងពិតប្រាកដ។ វាជាឋានសួគ៌កសិកម្មនៅប្រទេសកម្ពុជា»។
រហូតមកដល់ថ្ងៃនេះ មានអ្នកចុះឈ្មោះប្រមាណ៦០នាក់ហើយ ដើម្បីចូលរួមបោះតង់នៅកែវផុសនៅចុងខែនេះ។ នេះបើតាមការបញ្ជាក់របស់លោក សា ឌីណា។ លោកបន្តថា អ្នកដែលចូលរួម នឹងបានឃើញ និងស្វែងយល់ពីកន្លែងសំខាន់ៗរបស់លោក ម៉ុង ឫទ្ធី មានដូចជាចំការដូងប្រេង កៅស៊ូ ស្វាយ សៅម៉ាវ ទុរេន កសិដ្ឋានចិញ្ចឹមជ្រូក គោ សួនបន្លែធម្មជាតិ ហើយអ្នកចួលរួម ក៏អាចហែលទឹកសមុទ្រ។ល។
សម្រាប់អ្នកចាប់អារម្មណ៍ចូលរួមកម្មវិធីបោះជំរំតង់នេះ អាចទំនាក់ទំនងតាមរយៈទូរសព្ទទាំងពីរខ្សែខាងក្រោមនេះ។ លោក សា ឌីណា ០៩៣ ៥៣៣៣៣៣៨ និងលោក ជីម ០៧៧ ៧៧៦០៦០៕
© រក្សាសិទ្ធិដោយ thmeythmey.com