សម្រាប់អ្នកវិភាគ ការស្លៀកពាក់ខ្មៅ មិនមែនជាបដិវត្តឡើយ

ជាតិ

នយោបាយជាតិ

សម្រាប់អ្នកវិភាគ ការស្លៀកពាក់ខ្មៅ មិនមែនជាបដិវត្តឡើយ

09, May 2016 , 2:42 pm

រូបភាព

ដោយ: ម៉ៅ សុផា

ភ្នំពេញ៖ នៅថ្ងៃទី៩ ឧសភានេះ ក្រុមសង្គមស៊ីវិលមួយចំនួននិងប្រជាពលរដ្ឋជាច្រើនរូបទៀត បាននាំគ្នាស្លៀកពាក់ពណ៌ខ្មៅ ដើម្បីទាមទារ សុំឲ្យដោះលែងមន្ត្រីអាដហុកនិងមន្ត្រីគ.ជ.ប ដែលកំពុងជាប់ពន្ធនាគារព្រៃស។ ជាអកុសល មន្ត្រីសង្គមស៊ីវិល២រូប រួមទាំងប្រជាពលរដ្ឋមួយចំនួន ត្រូវបានអាជ្ញាធរឃាត់ខ្លួន ខណៈដែលពួកគាត់កំពុងធ្វើយុទ្ធនាការ នៅមុខពន្ធនាគារព្រៃស។ ការបន្តឃាត់ខ្លួនមន្ត្រីសង្គមស៊ីវិលនិងប្រជាពលរដ្ឋ គឺទិដ្ឋភាពគួរឲ្យព្រួយបារម្ភសម្រាប់ស្ថានការណ៍នយោបាយនិងដំណើរការលទ្ធិប្រជាធិបតេយ្យនៅកម្ពុជា។ នេះជាការមើលរបស់ក្រុមអ្នកតាមដានស្ថានការណ៍សង្គមនិងនយោបាយនៅកម្ពុជា។

អ្នកតាមដានស្ថានការណ៍នយោបាយ មិនស្វាគមន៍ចំពោះវិធានការនៃការបង្ក្រាបនិងការឃាត់ខ្លួន មន្ត្រីសិទ្ធិមនុស្ស ព្រមទាំងប្រជាពលរដ្ឋ ពីសំណាក់រដ្ឋាភិបាលឡើយ។ ក្រុមអ្នកឃ្លាំមើលសកម្មភាពនយោបាយនៅកម្ពុជា មើលឃើញថា ការឃាត់ខ្លួនក្រុមសង្គមស៊ីវិលនិងប្រជាពលរដ្ឋជាបន្តបន្ទាប់ គឺជារូបភាពអវិជ្ជមានមួយ ដែលជះឥទ្ធិពលមិនល្អដល់សហគមន៍ជាតិនិងអន្តរជាតិ។ ពួកគេ យល់ថា រដ្ឋាភិបាលគួរតែបង្កលក្ខណៈងាយស្រួលដល់មន្ត្រីអង្គការក្រៅរដ្ឋាភិបាលនិងប្រជាពលរដ្ឋ ដែលចូលរួមតវ៉ានិងទាមទារដោយអហិង្សា។

ថ្លែងប្រាប់សារព័ត៌មានថ្មីៗ អ្នកវិភាគនយោបាយ លោក សូ ចន្ថា ហួសចិត្តចំពោះអាជ្ញាធរ ដែលបានឃាត់ខ្លួន លោក អ៊ី សារុំ ប្រធានសមាគមធាងត្នោត និងលោក ថាវ គឹមសាន នាយករងទទួលបន្ទុកផ្នែកតស៊ូមតិរបស់អង្គការលីកាដូ រួមទាំងប្រជាពលរដ្ឋមួយចំនួនទៀត។ លោកថា សហគមន៍អន្តរជាតិនឹងមើលកម្ពុជាក្នុងផ្លូវអវិជ្ជមាន ប្រសិនបើរដ្ឋាភិបាលនៅតែបន្តចាត់វិធានការមកលើក្រុមសង្គមស៊ីវិលនិងប្រជាពលរដ្ឋយ៉ាងដូច្នេះ។

សាស្ត្រាចារ្យវិទ្យាសាស្ត្រនយោបាយរូបនេះ បន្តថា ក្រុមសង្គមស៊ីវិលនិងប្រជាពលរដ្ឋមិនគួរត្រូវបានបង្ក្រាននោះទេ តែផ្ទុយទៅវិញ អាជ្ញាធរគប្បីរៀបចំនិងសម្រួល ដល់ពួកគាត់ ទៀតផង។ លោកថា ការធ្វើយុទ្ធនាការទាមទាមអ្វីមួយ គឺជាសិទ្ធិរបស់ប្រជាពលរដ្ឋគ្រប់រូប ដែលមានចែងក្នុងរដ្ឋធម្មនុញ្ញ។ «គ្រាន់តែស្លៀកពាក់ពណ៌ខ្មៅ និងដង្ហែក្បួនដោយអហិង្សា ក៏ត្រូវបានឃាត់ខ្លួនដែលនោះ អ៊ីចឹងវាបង្ហាញឲ្យឃើញពីរូបភាពអាក្រក់សម្រាប់សា្ថនភាពនយោបាយកម្ពុជា។ បើរដ្ឋាភិបាលនៅតែបន្តធ្វើដូច្នេះទៀត គឺកំពុងតែធ្វើនយោបាយអត្តឃាតខ្លួនឯងហើយ»។ នេះជាការបញ្ជាក់បន្ថែមរបស់លោក សូ ចន្ថា។

រីឯអ្នកវិភាគមួយរូបទៀត លោក មាស នី បានលើកឡើងថា ការដង្ហែងក្បួននិងការស្លៀកពាក់ពណ៌ខ្មៅ ដើម្បីបញ្ចេញមតិនិងទាមទាមឲ្យដោះលែងមន្ត្រីអាដហុកនិងមន្ត្រីគ.ប.ប មិនមែនជាការធ្វើបដិវត្តពណ៌នោះទេ ប៉ុន្តែជាសិទ្ធិសេរីរបស់ប្រជាពលរដ្ឋ។ លោកថា ប្រជាពលរដ្ឋនិងសង្គមស៊ីវិល មិនអាចត្រូវបានចោទប្រកាន់ថា ធ្វើបដិវត្តពណ៌ឡើយ ព្រោះពួកគាត់មានគ្មានអាវុធ ឬបង្កចលាចលនោះទេ។

លោក មាស នី បន្ថែមទៀតថា ប្រជាពលរដ្ឋនិងមន្ត្រីសង្គមស៊ីវិល បានត្រឹមតែប្រើប្រាស់សិទ្ធិរបស់ខ្លួនប៉ុណ្ណោះ ដើម្បីទាមទារ ដូច្នេះមិនអាចចាត់ទុកការថា ជាការធ្វើបដិវត្តពណ៌នោះទេ។ លោកបញ្ជាក់បែបនេះថា៖«ពួកគាត់គ្មានអាវុធនោះទេ។ ពួកគាត់មានតែសិទ្ធិហ្នឹងហើយ ដើម្បីទាមទាម គឺពួកគាត់មានតែប៉ុណ្ណឹងទេ។

សូមបញ្ជាក់ថា ការផុសផុរសកម្មភាពនៃការស្លៀកពាក់ពណ៌ខ្មៅនេះ គឺដើម្បីទាមទារឲ្យដោះលែងមន្ត្រីអាដហុក៤រូប រួមមាន លោក នី សុខា លោក យី សុខសាន្ត លោក ណៃ វង់ដា និងលោកស្រី លឹម មុន្នី រួមទាំងលោក នី ចរិយា អគ្គលេខាធិការរងរបស់គ.ជ.ប ១រូបផង។ មន្ត្រីអាដហុក ត្រូវបានតុលាការចោទពីបទ «សូកប៉ាន់សាក្សី» ពាក់ព័ន្ធករណីកញ្ញា ខុម ចាន់តារ៉ាទី ហៅស្រីមុំ។ ចំណែកឯ មន្ត្រីគ.ជ.ប ត្រូវបានចោទពីបទ «សមគំនិតក្នុងរឿងសូកប៉ាន់សាក្សី» ទាក់ទងនឹងសំណុំរឿងរបស់កញ្ញា ខុម ចាន់តារ៉ាទី ដូចគ្នា៕