ជាតិ
ប្រកួតកីឡាដើម្បីប្រមូលយុវជនបរិច្ចាគឈាមបញ្ចប់ដោយជោគជ័យ
×
សៀមរាប៖ កម្មវិធីប្រកួតបាល់ទាត់សប្បុរសធម៌ ប្រមូលយុវជនបរិច្ចាគឈាមដល់មន្ទីរពេទ្យកុមារអង្គរ បានបិទបញ្ចប់កាលពីចុងសប្តាហ៍កន្លងទៅ។ ក្រុមយុវជនរបស់សាលាបញ្ញាសាស្ត្រខេត្តសៀមរាប បានផ្តួចផ្តើមឲ្យមានកម្មវិធីនេះឡើង ក្រោមពាក្យស្លោក «ប្រកួតកីឡាដើម្បីការងារមនុស្សធម៌»។
ក្រោយពីឆ្លងកាត់ការប្រកួតជម្រុះអស់រយៈពេល ជាង២ខែមកនេះ ក្រុមនិស្សិតសាកលវិទ្យាល័យបញ្ញាសាស្ត្រសាខាខេត្តសៀមរាប បានរកឃើញក្រុមអ្នកឈ្នះ និងអ្នកចាស់ កាលពីថ្ងៃទី៨ ឧសភាកន្លងទៅ នៅទីលានបាល់ទាត់ភូមិកីឡា។ ក្រុមប្រកួតជម្រុះមាន១០ក្រុម និងសុទ្ធសឹងជានិស្សិតសាលាបញ្ញាសាស្ត្រ។
បន្ទាប់ពីបញ្ចប់ការប្រកួតហើយ នៅព្រឹកថ្ងៃទី៩ ឧសភា ក្រុមនិស្សិតបានទៅចូលរួមបរិច្ចាគឈាមដល់មន្ទីរពេទ្យកុមារអង្គរ ដែលកំពុងខ្វះឈាមជួយសង្គ្រោះកុមារក្រីក្រ។ ការបរិច្ចាគមានរយៈពេល២ថ្ងៃ ចាប់ពីថ្ងៃទី៩ ដល់ថ្ងៃទី១០ ឧសភា។
អ្នករៀបចំកម្មវិធីបាល់ទាត់សប្បុរសធម៌ លោក ឆាយ សុភាព បានឲ្យដឹងថា ការប្រកួតបាល់ទាត់នេះអាចដំណើរការទៅបាន ដោយមានសប្បុរសជនចូលរួមចំនួន ២០ស្ថាប័ន។ លោកបញ្ជាក់ថា ការប្រកួតនេះធ្វើឡើងក្នុងបំណង៣សំខាន់ៗ រួមមាន ការរួមចំណែកលើកកម្ពស់វិស័យកីឡានៅកម្ពុជា ទីពីរប្រមូលយុវជនដែលទំនេរពីការសិក្សាឲ្យលេងកីឡា ជៀសឆា្ងយពីការសេពគ្រឿងញៀនផ្សេងៗ និងទីបី ចូលរួមក្នុងយុទ្ធនាការបរិច្ចាគឈាមដល់មន្ទីរពេទ្យកុមារអង្គរ ដែលកំពុងខ្វះឈាម។
គួរបញ្ជាក់ថា ការប្រកួតកីឡាសប្បុរសធម៌នេះ បានដំណើរការចាប់ពីថ្ងៃទី២១ កុម្ភៈ ឆ្នាំ២០១៦មក និងបានបញ្ចប់នៅថ្ងៃទី៨ ឧសភា៕
© រក្សាសិទ្ធិដោយ thmeythmey.com