ជាតិ
ពាក្យសម្បថចៅក្រម៖ បើយើងខ្ញុំកាត់ក្តីលម្អៀង សូមវត្ថុសក្តិសិទ្ធិក្នុងលោកដាក់ទណ្ឌកម្ម
× កន្លងមកនេះប្រព័ន្ធយុត្តិធម៌នៅកម្ពុជា រងការរិះគន់ពីប្រជាជនខ្មែរមួយចំនួនថា នៅមានភាពទន់ខ្សោយ ពោលគឺចៅក្រមមិនបានអនុវត្តតាមតួនាទីរបស់ខ្លួន ឈរលើស្មារតីអគិតធម៌ទាំង ៤ ឡើយ។ ក្នុងក្រសែភ្នែកពលរដ្ឋខ្មែរខ្លះ ពួកគេចាត់ទុក ចៅក្រម គឺជាមនុស្សពុករលួយ កាត់ក្តីយកប្រាក់ជាធំ ។ តាមពិតទៅនៅក្នុងច្បាប់ស្តីលក្ខិកៈនៃចៅក្រម និងព្រះរាជអាជ្ញារ បានតម្រូវឲ្យចៅក្រមស្បថស្បែមុននឹងបំពេញតួនាទីរបស់ខ្លួន ដែលមានអត្ថន័យជ្រាលជ្រៅនៅក្នុងវិជ្ជាជីវៈរបស់ខ្លួន។
ពាក្យសច្ចាប្រណិធានរបស់ចៅក្រមនោះ មានខ្លឹមសារទាំងស្រុងយ៉ាងនេះថា ៖ ក្នុងពេលបំពេញវិជ្ជាជីវៈជាចៅក្រម និងព្រះរាជអាជ្ញា ទូលព្រះបង្គំយើងខ្ញុំ សូមប្តេជ្ញាថា នឹងប្រតិបត្តិតួនាទី ភារកិច្ច និងប្រើសិទ្ធិអំណាចរបស់ទូលបង្គំយើងខ្ញុំ ក្នុងឋានៈជាចៅក្រម និងព្រះរាជអាជ្ញា ដោយគោរពឲ្យបានត្រឹមត្រូវតាមរដ្ឋធម្មនុញ្ញ និងចៅក្រមទាំងឡាយនៃព្រះរាជាណាចក្រកម្ពុជា ព្រមទាំងប្រតិបត្តិឲ្យបានខ្ជាប់ខ្ជួនតាមក្រមសីលធម៌របស់ចៅក្រម និងព្រះរាជអាជ្ញា ។ ទូលព្រះបង្គំយើងខ្ញុំ សូមសច្ចាថា នឹងស្មោះត្រង់ចំពោះវិជ្ជាជីវៈ ប្រកាន់ខ្ជាប់នូវឧត្តមគតិជាតិ ព្រមទាំងបំពេញវិជ្ជាជីវៈប្រកបដោយសេចក្តីថ្លៃថ្នូរ វីរភាព និងយុត្តិធម៌។
ទូលព្រះបង្គំយើងខ្ញុំ សូមប្តេជ្ញាប្រើប្រាស់សតិសម្បជញ្ញៈ និងឧត្តមគតិជាតិ ក្នុងការប្រតិបត្តិតាមរដ្ឋធម្មនុញ្ញ និងការអនុវត្តច្បាប់ទាំងឡាយនៃព្រះរាជាណាចក្រកម្ពុជា ដោយត្រូវវៀរចាកពីអគតិធម៌ទាំង ៤ប្រការគឺ ឆន្ទាគតិ ទោសាគតិ ភយាគតិ និងមោហាគតិ និងប្រកាន់នូវគុណធម៌ប្រកបដោយ វីរយាសម្បយុត្ត សុចរិតយុត្តិធម៌ បញ្ញត្តិគារវោ សមទណ្ឌោ និងបញ្ញាវុធ វិនិច្ឆ័យ ។
បើទូលព្រះបង្គំយើងខ្ញុំ មិនបានប្រព្រឹត្តតាមតួនាទី ភារកិច្ច និងអំណាច ដូចដែលបានសច្ចាខាងលើទេនោះ សូមព្រះវិញ្ញាណក្ខណ្ឌអតីតព្រះមហាក្សត្រ អស់ទេព្រក្ស អារុកអារក្ខ អ្នកតាយាយទេព និងវត្ថុសក្តិសិទ្ធិទាំងអស់ក្នុងលោក ដាក់ទោសទណ្ឌដល់ទូលបង្គំយើងខ្ញុំទាំងក្នុងឥធលោក(លោកបច្ចុប្បន្ន) និងបរលោក(អនាគត) កុំបីអាក់ខានឡើយ៕
Tag:
ច្បាប់
ស្បថ
ចៅក្រម
© រក្សាសិទ្ធិដោយ thmeythmey.com