ការប្រកួតពានរង្វាន់សម្តេច ហ៊ុន សែន ប្រចាំឆ្នាំ២០១៦ នៃសប្តាហ៍ទី៧ ថ្ងៃទី១៨ ខែឧសភា នេះមានការប្រកួតនៅក្នុងពូល A ៣គូ និងពូល B ៣គូ ដោយក្រសួងការពារជាតិ ជួប អាស៊ីអឺរ៉ុបយូណាយធីត ឬឯបឹងកេតអង្គរ ប៉ះ កងរាជអាវុធហត្ថខេត្តកំពង់ធំ ចំណែក ព្រះខ័នរាជស្វាយរៀង ស្វាគមន៍ ខេត្តកំពង់ឆ្នាំង។ កំពង់ផែស្វយ័តខេត្តព្រះសីហនុ ស្វាគមន៍ ខេត្តកណ្តាល ខណៈយុវជនបឹងកេត ស្វាគមន៍ ខេមបូឌានថាយហ្គឺរ ចំណែកខេត្តស្ទឹងត្រែង ជួប ខេត្តព្រៃវែង។
ក្នុងពូល B ជាជំនួបរវាងក្រុមនៅក្នុងក្របខណ្ឌមិត្តហ្វូនខេមបូឌានលីកដូចគ្នា ដោយក្រុមឈរកំពូលតារាង ក្រសួងការពារជាតិ ជួបប្រកួតជាមួយក្រុមឈរដំដាប់លេខ៣ អាស៊ីអឺរ៉ុបយូណាយធីត នៅកីឡដ្ឋានកងយោធពលខេមរភូមិន្ទ(ស្តាតចាស់)។ ចំណែកក្រុមឈរលំដាប់ទី២ បឹងកេតអង្គរ ធ្វើដំណើរទៅកីឡដ្ឋានខេត្តកំពង់ ដើម្បីជួបប្រកួតជាមួយកងរាជអាវុធហត្ថខេត្តកំពង់ធំ ដើម្បីរក៣ពិន្ទុបន្ថែមសម្រាប់ត្រៀមឈរលំដាប់ទី១ ហើយក្រុមនេះអាចឈរកំពូលតារាងបណ្តោះអាសន្នសប្តាហ៍នេះ ប្រសិនបើអាស៊ីអឺរ៉ុបអាចទប់ទល់ ឬយកឈ្នះក្រុមក្រសួងការពារជាតិ។
ក្នុងពូល B ដដែលក្រុមឈរលេខ១ពូល F នៃវគ្គជម្រុះ ខេត្តស្ទឹងត្រែង ក្រោយពីអាចទប់ជាមួយក្រុមបឹងកេតអង្គរ កាលពីសប្តាហ៍ទី៥ ដោយលទ្ធផល ៥-៤ ស្វាគមន៍ក្រុមភ្ញៀវឡើងមកពីវគ្គជម្រុះដូចគ្នាគឺខេត្តព្រៃវែង ដែលជាក្រុមមិនធ្លាប់ស្គាល់ពាក្យថាឈ្នះសម្រាប់ការប្រកួតជម្រុះក្នុងដំណាក់កាលផ្តាច់ព្រ័ត្រនេះ។
ចំណែកក្នុងពូល A ជាជំនួបរវាងក្រុមដែលឡើងពីវគ្គជម្រុះតាមខេត្តដូចគ្នា គឺក្រុមកំពង់ផែស្វយ័តខេត្តព្រះសីហនុ នឹងបើកទ្វារកីឡដ្ឋានសាកលវិទ្យាល័យឡាយហ្វខេត្តព្រះសីហនុ ស្វាគមន៍ ក្រុមលេខ២ពូល A នៃវគ្គជម្រុះ ខេត្តកណ្តាល។ ចំណែកយុវជនបឹងកេតកំពង់ចាម ប្រើកីឡដ្ឋានរបស់ខ្លួន ចំការកៅស៊ូកំពង់ចាម ស្វាគមន៍ក្រុមភ្ញៀវនៅក្នុងក្របខណ្ឌមិត្តហ្វូនខេមបូឌានលីក ខេមបូឌានថាយហ្គឺរ ដែលជាក្រុមកំពុងឈរលំដាប់លេខ១ក្នុងពូល A។
ជាមួយគ្នានេះ ក្រុបនៅក្នុងក្របខណ្ឌមិត្តហ្វូនខេមបូឌានលីក ព្រះខ័នរាជស្វាយរៀង នឹងបើកទ្វារកីឡដ្ឋានខេត្តស្វាយរៀង ដើម្បីស្វាគមន៍ក្រុមភ្ញៀវលេខ១ពូល D នៃវគ្គជម្រុះ ខេត្តកំពង់ឆ្នាំង ដែលជាក្រុមកំពុងឈរលំដាប់លេខរៀងទី២ក្នុងពូល។ ក្រុមនេះមាន៧ពិន្ទុស្មើ ខេមបូឌានថាយហ្គឺរ ខណៈព្រះខ័នរាជស្វាយរៀងមាន៦ពិន្ទុ ប៉ុន្តែ៧ពិន្ទុរបស់ខេត្តកំពង់ឆ្នាំងក្នុងការប្រកួត៣លើក ចំណែកព្រះខ័នរាជស្វាយរៀងត្រឹមតែពីរប្រកួតប៉ុណ្ណោះ៕
កម្មវិធីប្រកួតពានរង្វាន់សម្តេច ហ៊ុន សែន ថ្ងៃទី១៨ ខែឧសភា នេះ៖
ពូល A៖
-ម៉ោង៣:៣០-កំពង់ផែស្វយ័តខេត្តព្រះសីហនុ ជួប ខេត្តកណ្តាល នៅកីឡដ្ឋានសាកលវិទ្យាល័យឡាយហ្វខេត្តព្រះសីហនុ
-ម៉ោង៣:៣០-យុវជនបឹងកេតកំពង់ចាម ជួប ខេមបូឌានថាយហ្គឺរ នៅកីឡដ្ឋានចំការកៅស៊ូកំពង់ចាម
-ម៉ោង១៨:០០-ព្រះខ័នរាជស្វាយរៀង ជួប ខេត្តកំពង់ឆ្នាំង នៅកីឡដ្ឋានខេត្តស្វាយរៀង
ពូល B៖
-ម៉ោង៣:៣០-ខេត្តស្ទឹងត្រែង ជួប ខេត្តព្រៃវែង នៅពហុកីឡដ្ឋានខេត្តស្ទឹងត្រែង
-ម៉ោង៣:៣០-កងរាជអាវុធហត្ថខេត្តកំពង់ធំ ជួប បឹងកេតអង្គរ នៅកីឡដ្ឋានខេត្តកំពង់ធំ
-ម៉ោង៣:៣០-ក្រសួងការពារជាតិ ជួប អាស៊ីអឺរ៉ុបយូណាយធីត នៅកីឡដ្ឋានកងយោធពលខេមរភូមិន្ទ។