ព្រះខ័នរាជ និងថាយហ្គឺរ រក្សាគម្លាតនាំមុខពូល A ខណៈការពារជាតិ និងបឹងកេត វ៉ាដាច់នៅពូល B

កីឡាជាតិ

ជាតិ

ព្រះខ័នរាជ និងថាយហ្គឺរ រក្សាគម្លាតនាំមុខពូល A ខណៈការពារជាតិ និងបឹងកេត វ៉ាដាច់នៅពូល B

19, May 2016 , 11:28 am

រូបភាព

ដោយ:

នាការប្រកួតពានរង្វាន់សម្តេច ហ៊ុន សែន សប្តាហ៍ទី៧ កាលពីម្សិលមិញ ក្រសួងការពារជាតិ(ទ័ព) ស៊ី អាស៊ីអឺរ៉ុប ៣-១ ខណៈក្រុមបឹងកេតអង្គរ និងព្រះខ័នរាជស្វាយរៀងលត់ក្រុមខេត្ត ១២-0 ដូចគ្នា។ ចំណែកខេមបូឌានថាយហ្គឺរ លត់យុវជនបឹងកេតកំពង់ចាម ៨-១ ឬឯ កំពង់ផែស្វយ័តខេត្តព្រះសីហនុ បំបាក់ ខេត្តកណ្តាល ៦-១ ចំណែកខេត្តស្ទឹងត្រែង តាមត្រឹមស្មើជាមួយខេត្តព្រៃវែង ១-១។

គ្រាន់តែចាប់ផ្តើមការប្រកួតតង់ទី១ភ្លាមនៅនាទីទី២ កីឡាករ ឈិន ឈឿន របស់ក្រសួងការពារជាតិបានរកគ្រាប់បាល់មួយគ្រាប់ជូនក្រុមរបស់ខ្លួន ដើម្បីនាំមុខអាស៊ីអឺរុប ១-០ លុះដល់នាទីទី១៤ កីឡាករ ជិន ជុំ បានសម្រេចគ្រាប់បាល់ជូនអាស៊ីអឺរ៉ុបមួយគ្រាប់ផងដែរ សម្រាប់នាំក្រុមរបស់ខ្លួនស្មើជាមួយទ័ពក្នុងលទ្ធផល ១-១។

នៅនាទីទី៤៦ ប្រធានក្រុមរបស់ទ័ព ភួង សុខសាណា សម្រចបានមួយគ្រាប់ លុះដល់នាទទី៧៨ ទ័ព សម្រេច បានមួយគ្រាប់បន្ថែមទៀត ដោយកីឡាករ កែ វណ្ណៈ ក្រោយបញ្ចប់ការប្រកួតទាំងពីរតង់ក្រុមក្រសួងការពារជាតិ បានយកឈ្នះលើក្រុម អាស៊ីអឺរ៉ុបយូណាយធីត ក្នុងលទ្ធផល ៣-១ ទាំងលំបាក។ លទ្ធផលនេះបានធ្វើឲ្យ ក្រសួងការពារជាតិទទួលបាន៣ពិន្ទុបន្ថែម ដើម្បីបន្តឈរលំដាប់លេខ១ក្នុងពូល B ជាបណ្តោះអាសន្ន ដោយមាន១២ពិន្ទុ។

ជាមួយគ្នានេះ ក្រុមបឹងកេតអង្គរ និងក្រុមព្រះខ័នរាជស្វាយរៀង បានលត់ក្រុមដែលឡើងមកពីវគ្គជម្រុះតាមខេត្ត ១២-០ ដូចគ្នា ដោយបឹងកេតអង្គរ លត់ក្រុមម្ចាស់ផ្ទះ កងរាជអាវុធហត្ថខេត្តកំពង់ធំ នៅក្នុងពូល B ឬឯក្រុមព្រះខ័នរាជស្វាយរៀង លត់ខេត្តកំពង់ឆ្នាំ នៅក្នុងពូល A នៅលើទឹកដីរបស់ខ្លួន។ ចំណែក ខេមបូឌានថាយហ្គឺរ លត់ក្រុមម្ចាស់ផ្ទះយុវជនបឹងកេតកំពង់ចាម ៦-១ នៅក្នុងពូល A ផងដែរ។

ដោយឡែក ការប្រកួតរវាងក្រុមឡើងពីវគ្គជម្រុះតាមខេត្ត ក្រុមកំពង់ផែស្វយ័តខេត្តព្រះសីហនុ បានប្រើកីឡដ្ឋាននៃសាកលវិទ្យាល័យឡាយហ្វខេត្តព្រះសីហនុ លត់ក្រុម ខេត្តកណ្តាល ៦-១ នៅក្នុងពូល A។ ចំណែកនៅក្នុងពូល B ខេត្តស្ទឺងត្រែង ចែកគ្នាម្នាក់មួយពិន្ទុជាមួយក្រុម ខេត្តព្រៃវែង បន្ទាប់ពីរក្សាលទ្ធផល ១-១ នៅកីឡដ្ឋានខេត្តស្ទឹងត្រែង។

នៅក្នុងពូល A ព្រះខ័នរាជស្វាយរៀង រក្សាតំណែងនៅចំណាត់ថ្នាក់លេខ១ ដោយមាន១២ពិន្ទុ ក្រុមលេខ២ ខេមបូឌានថាយហ្គឺរ មាន១០ពិន្ទុ ឈរពីលើខេត្តកំពង់ឆ្នាំង (៧ពិន្ទុ) កំពង់ផែស្វ័យតខេត្តព្រះសីហនុ ៦ពិន្ទុ ខណៈយុវជនបឹងកេតកំពង់ចាម និងខេត្តកណ្តាល ចាញ់ទាំង៤ប្រកួត។

សម្រាប់ពូល B ក្រសួងការពារជាតិ និងបឹងកេតអង្គរ ឈ្នះទាំង៤ប្រកួតដូចគ្នា ដោយមាន១២ពិន្ទុ។ ក្រុម៤ផ្សេងទៀតស្ថិតនៅគម្លាតយ៉ាងឆ្ងាយ ដោយអាស៊ីអឺរ៉ុប មាន៦ពិន្ទុ ខេត្តស្ទឹងត្រែង៤ពិន្ទុ ខេត្តព្រៃវែង១ពិន្ទុ ខណៈខេត្តកំពង់ធំ មិនទាន់មានពិន្ទុរាប់នៅឡើយ។

លទ្ធផលការប្រកួតពានរង្វាន់សម្តេច ហ៊ុន សែន ថ្ងៃទី១៨ ខែឧសភា ៖

ពូល A៖

-ម៉ោង៣:៣០-កំពង់ផែស្វយ័តខេត្តព្រះសីហនុ ៦-១ ខេត្តកណ្តាល នៅកីឡដ្ឋានសាកលវិទ្យាល័យឡាយហ្វខេត្តព្រះសីហនុ

-ម៉ោង៣:៣០-យុវជនបឹងកេតកំពង់ចាម ១-៨ ខេមបូឌានថាយហ្គឺរ នៅកីឡដ្ឋានចំការកៅស៊ូកំពង់ចាម

-ម៉ោង១៨:០០-ព្រះខ័នរាជស្វាយរៀង ១២-០ ខេត្តកំពង់ឆ្នាំង នៅកីឡដ្ឋានខេត្តស្វាយរៀង

ពូល B៖

-ម៉ោង៣:៣០-ខេត្តស្ទឹងត្រែង ១-១ ខេត្តព្រៃវែង នៅពហុកីឡដ្ឋានខេត្តស្ទឹងត្រែង

-ម៉ោង៣:៣០-កងរាជអាវុធហត្ថខេត្តកំពង់ធំ ០-១២ បឹងកេតអង្គរ នៅកីឡដ្ឋានខេត្តកំពង់ធំ

-ម៉ោង៣:៣០-ក្រសួងការពារជាតិ ៣-១ អាស៊ីអឺរ៉ុបយូណាយធីត នៅកីឡដ្ឋានកងយោធពលខេមរភូមិន្ទ។