កីឡាអន្តរជាតិ
អន្តរជាតិ
Euro2016៖ ពូល C មាន អាល្លឺម៉ង់ អៀរឡង់ខាងជើង ប៉ូឡូញ និងអ៊ុយក្រែន
×
ព្រឹត្តិការណ៍ប្រកួតកីឡាបាល់ទាត់ដណ្តើមពានរង្វាន់ទ្វីបអឺរ៉ុបឆ្នាំ២០១៦ (UEFA EURO 2016) នឹងដំណើរការចាប់ពីថ្ងៃទី១០ ខែមិថុនា ដោយមាន២៤ក្រុមចូលរួម។ ការប្រកួតនឹងប្រព្រឹត្តទៅនៅកីឡដ្ឋានចំនួន១០ក្នុងប្រទេសបារាំង ដោយមានការបែងចែកជា៦ពូល។
បន្ទាប់ពីពូល A និងពូល B ថ្ងៃនេះ សារព័ត៌មានថ្មីៗ សូមផ្តល់ព័ត៌មានសង្ខេបទាក់ទងនឹងក្រុមជម្រើសជាតិដែលស្ថិតនៅក្នុងពូល C។ អាល្លឺម៉ង់គឺជាក្រុមដែលលេចធ្លោជាងគេនៅក្នុងពូល ដោយធ្លាប់ឈ្នះជើងឯកអឺរ៉ុប៣លើក ប៉ូឡូញ និងអ៊ុយក្រែន ធ្លាប់ឈានចូលដល់វគ្គនេះ ខណៈអៀរឡង់ខាងជើង បង្ហាញខ្លួនជាលើកដំបូង។
លោក Joachim Low ដឹកនាំក្រុមជម្រើសជាតិអាល្លឺម៉ង់ចាប់តាំងពីខែកក្កដា ឆ្នាំ២០០៦ ហើយបាននាំក្រុមឥន្ទ្រីដែក (ឬ DFB-Elf) ឈ្នះជើងឯក World Cup កាលពីឆ្នាំ២០១៤ ។ សម្រាប់ប្រវត្តិនៅក្នុង EURO អាល្លឺម៉ង់ធ្លាប់ឈ្នះជើងឯកបីលើក គឺឆ្នាំ១៩៧២ ឆ្នាំ១៩៨០ ក្នុងនាមជាប្រទេសអាល្លឺម៉ង់ខាងលិច និងឆ្នាំ១៩៩៦ ក្រោយការបង្រួបបង្រួមប្រទេស។
អៀរឡង់ខាងជើងស្ថិតក្រោមការដឹកនាំរបស់លោក Michael O’ Neill ចាប់តាំងពីចុងឆ្នាំ២០១១ មក។ ក្រុមដែលអ្នកគាំទ្ររបស់ខ្លួនហៅថា Norn Iron មួយនេះ មិនធ្លាប់មានប្រវត្តិចូលលេងក្នុងព្រឹត្តិការណ៍ EURO ឡើយ ប៉ុន្តែពួកគេបានបង្កើតភាពភ្ញាក់ផ្អើលនៅវគ្គជម្រុះ ដោយបានបញ្ចប់ចំណាត់ថ្នាក់លេខមួយនៅក្នុងពូល F ។
ប៉ូឡូញ មានលោក Adam Nawalka ដឹកនាំចាប់តាំងពីខែតុលា ឆ្នាំ២០១៣ មក។ ក្រុមនេះមានរហស្សនាមថា Bialo-czerwoni (ស និងក្រហម) ដោយបានឈានចូលវគ្គចែកពូលលើកដំបូងក្នុងឆ្នាំ២០០៨ និងឆ្នាំ២០១២ នៅពេលដែលពួកគេធ្វើជាសហម្ចាស់ផ្ទះ។
លោក Mykhailo Fomenko បានដឹកនាំបង្វឹកក្រុមជម្រើសជាតិអ៊ុយក្រែន ចាប់តាំងពីចុងឆ្នាំ២០១២ ។ អ៊ុយក្រែន ដែលមានរហស្សនាមថា Synyo-Zhovti (ខៀវ និងលឿង) គឺធនធានមួយរបស់អតីតសហភាពសូវៀតដែលបានឈ្នះពានកាលពីឆ្នាំ១៩៦០ ។ ក្រោមទង់របស់អ៊ុយក្រែន នេះជាលើកទីពីរហើយសម្រាប់ពួកគេនៅវគ្គចែកពូល បន្ទាប់ពីពួកគេធ្វើជាសហម្ចាស់ផ្ទះនៅឆ្នាំ២០១២ ៕
ព័ត៌មានទាក់ទងនឹងពូលនីមួយៗ៖
ពូល A http://www.thmeythmey.com/?page=detail&ctype=article&id=39954&lg=kh
ពូល B http://www.thmeythmey.com/?page=detail&ctype=article&id=39979&lg=kh
ពូល C http://www.thmeythmey.com/?page=detail&ctype=article&id=40010&lg=kh
ពូល D http://www.thmeythmey.com/?page=detail&ctype=article&id=40076&lg=kh
ពូល E http://www.thmeythmey.com/?page=detail&ctype=article&id=40104&lg=kh
ពូល F http://www.thmeythmey.com/?page=detail&ctype=article&id=40126&lg=kh
© រក្សាសិទ្ធិដោយ thmeythmey.com