កីឡាជាតិ
ជាតិ
កីឡាករកីឡាការិនីកម្ពុជា ៦រូបនឹងចូលរួមប្រកួតកីឡាអូឡាំពិកនៅប្រេស៊ីល
× ក្រោយពីទទួលបានសិទ្ធិ និងការអនុគ្រោះនាពេលកន្លងមក កីឡាករកីឡាការិនីផ្នែកអត្តពលកម្ម ហែលទឹក តេក្វាន់ដូ និងចំបាប់បូរាណ របស់កម្ពុជាចំនួន៦រូប នឹងចូលរួមប្រកួតប្រជែងដណ្តើមជើងឯកក្នុងព្រឹត្តិការណ៍ប្រកួតកីឡាអូឡាំពិករដូវក្តៅ Olympic Games 2016 នៅទីក្រុងរីយ៉ូ ប្រទេសប្រេស៊ីល នាខែសីហាខាងមុខនេះ។ គួរបញ្ជាក់ថា ក្នុងចំណោមកីឡាករទាំងអស់មានតែកីឡាការិនី ស៊ន សៀវម៉ី ម្នាក់ប៉ុណ្ណោះដែលទទួលបានសិទ្ធិចូលរួមដោយមិនបាច់ប្រើ WILD CARD។
កីឡាករកីឡាការិនីកម្ពុជាចំនួន៦រូប រួមមាន កីឡាការិនីតេក្វាន់ដូ ស៊ន សៀវម៉ី, កីឡាការិនីចំបាប់ ចូវ សុធារ៉ា កីឡាការិនីហែលទឹក ហែម ថុនវិទិនី និងកីឡាករ ពូ សុវិជ្ជា, កីឡាការិនីអត្តពលកម្មផ្នែកម៉ារ៉ាតុន លី ណារី និងកីឡាករជនជាតិជប៉ុនសញ្ជាតិខ្មែរ NEKO នឹងចូលរួមប្រកួតប្រជែងដណ្តើមមេដាយក្នុងព្រឹត្តិការណ៍កីឡាអូឡាំពិករដូវក្តៅ នៅទីក្រុងរីយ៉ូ ប្រទេសប្រេស៊ីល នាខែសីហា ខាងមុខនេះ។ នេះបើយោងតាមលោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា។
លោកបានបន្តថា ក្នុងចំណោមកីឡាករកីឡាការិនីទាំង៦រូបនោះ គឺមានតែកីឡាការិនី ស៊ន សៀវម៉ី ម្នាក់ប៉ុណ្ណោះដែលទទួលសិទ្ធចូលរួមប្រកួតតាមរយៈការប្រើសមត្ថភាពផ្ទាល់ខ្លួន ដោយរូបគេដណ្តើមបានមេដាយមាសនៅក្នុងការប្រកួតជម្រុះអូឡាំពិក នៅប្រទេសម៉ាឡេស៊ី។ ចំណែកកីឡាករកីឡាការិនីឯទៀត គឺតាមរយៈសិទ្ធអនុគ្រោះប៉ុណ្ណោះ WILD CARD។
ដោយឡែក កីឡាការិនីចំបាប់ម្ចាស់មេដាយមាសក្នុងព្រឹត្តិការណ៍ស៊ីហ្គេម ចូវ សុធារ៉ា ទោះបីជាបរាជ័យក្នុងការប្រកួតជម្រុះកីឡាអូឡាំពិកនៅប្រទេសតួកគីក៏ដោយ ប៉ុន្តែដោយសារកីឡាការិនីចំបាប់ជើងចាស់ម្នាក់នេះធ្វើបានល្អនៅក្នុងការប្រកួត នោះគណៈកម្មការសម្រេចផ្តល់សិទ្ធអនុគ្រោះ WILD CARD ឲ្យកីឡាការិនី ចូវ សុធារ៉ា ចូលរួមប្រកួតកីឡាអូឡាំពិកនៅទីក្រុងរីយ៉ូ ប្រទេសប្រេស៊ីល ខាងមុខនេះ។ ហើយសម្រាប់ការប្រកួតកីឡាអូឡាំពិកនេះ ចូវ សុធារ៉ា នឹងធ្វើការប្រកួតក្នុងប្រភេទទម្ងន់ ៤៨គីឡូក្រាម។
លោកអគ្គលេខាធិការ NOCC រូបនេះបញ្ជាក់ដូច្នេះថា៖«មកទល់ពេលនេះយើងបានចុះឈ្មោះជាបឋមចំនួន៦នាក់ហើយសម្រាប់ចូលរួមប្រកួតកីឡាអូឡាំពិកក្នុងទីក្រុងរីយ៉ូ ក្នុងនោះកីឡាការិនីតេក្វាន់ដូម្នាក់ កីឡាអត្តពលកម្ម២នាក់ កីឡាហែលទឹក២នាក់ ហើយកាលពីពេលកន្លងទៅថ្មីៗនេះកីឡាការិនីចំបាប់ ចូវ សុធារ៉ា ម្នាក់ទៀត ក្រោយពីរូបគេធ្វើបានពិន្ទុល្អនៅក្នុងការប្រកួតជម្រុះអូឡាំពិកនៅប្រទេសតួកគី ទោះបីមិនជាប់ចំណាត់ថ្នាក់ក៏ដោយ»។
ដើម្បីពង្រឹងសមត្ថភាព និងបច្ចេកទេសឲ្យកាន់តែរីកចម្រើនសម្រាប់ត្រៀបប្រកួតកីឡាអូឡាំពិករដូវក្តៅ Olympic Games 2016 នៅទីក្រុងរីយ៉ូ ប្រទេសប្រេស៊ីល កីឡាករកីឡាការិនីកម្ពុជា បាននិងកំពុងធ្វើការហ្វឹកហាត់យ៉ាងសកម្មនៅតាមបណ្តាប្រទេសផ្សេងៗមួយចំនួន ដោយកីឡាការិនី ស៊ន សៀវម៉ី កំពុងហ្វឹកហាត់នៅប្រទេសកូរ៉េ ឬឯកីឡាការិនី ហែម ថុនវិទិនី ហ្វឹកហាត់នៅប្រទេសថៃ ចំណែកីឡាការិនី លី ណារី ហ្វឹកហាត់នៅប្រទេសកេនយ៉ា និងកីឡាករ NEKO កំពុងហ្វឹកហាត់នៅប្រទេសជប៉ុន។
គួរបញ្ជាក់ថា កីឡាការិនីរត់ចម្ងាយ លី ណារី និងកីឡាករជនជាតិជប៉ុនសញ្ជាតិខ្មែរ NEKO នឹងធ្វើការប្រកួតក្នុងរយៈចម្ងាយ៤២គីឡូម៉ែត្រ។ ហើយ លី ណារី ជាកីឡាការិនីកម្ពុជាម្នាក់គត់ដែលរត់ក្នុងរយៈចម្ងាយ ៤២គីឡូម៉ែត្រប្រើរយៈពេលតិចជាង៣ម៉ោង។ ហើយចំនួនកីឡាករកីឡាការិនី៦នាក់ដែលត្រូវចូលរួមប្រកួតកីឡាអូឡាំពិកនេះអាចមានការប្រែប្រួល ព្រោះនៅមានសហព័ន្ធមួយចំនួនកំពុងត្រៀមបញ្ជូនកីឡាកររបស់ខ្លួនចូលរួមប្រកួតជម្រុះអូឡាំពិកផងដែរ៕
Tag:
កីឡាអូឡាំពិក
វ៉ាត់ ចំរើន
© រក្សាសិទ្ធិដោយ thmeythmey.com