កីឡាអន្តរជាតិ
Euro2016៖ ពូល D មាន ម្ចាស់ជើងឯកអេស្ប៉ាញ សាធារណរដ្ឋឆែក តួកគី និងក្រូអាស៊ី
× ព្រឹត្តិការណ៍ប្រកួតកីឡាបាល់ទាត់ដណ្តើមពានរង្វាន់ទ្វីបអឺរ៉ុបឆ្នាំ២០១៦ (UEFA EURO 2016) នឹងដំណើរការចាប់ពីថ្ងៃទី១០ ខែមិថុនា ដោយមាន២៤ក្រុមចូលរួម។ ការប្រកួតនឹងប្រព្រឹត្តទៅនៅកីឡដ្ឋានចំនួន១០ក្នុងប្រទេសបារាំង ដោយមានការបែងចែកជា៦ពូល។
បន្ទាប់ពីពូល A ពូល B និងពូល C ថ្ងៃនេះ សារព័ត៌មានថ្មីៗ សូមផ្តល់ព័ត៌មានសង្ខេបទាក់ទងនឹងក្រុមជម្រើសជាតិដែលស្ថិតនៅក្នុងពូល D។ អេស្ប៉ាញ នឹងចាប់ផ្តើមយុទ្ធនាការដើម្បីការពារជើងឯករបស់ខ្លួន និងស្វះស្វែងលើកពានជាលើកទី៤ ដូចជាស្លូវ៉ាគីផងដែរ សាធារណរដ្ឋឆែកធ្លាប់មានប្រវត្តិលើកពាន១លើកក្នុងនាមជាប្រទេសឆេកូស្លូវ៉ាគី តួកគីធ្លាប់ចូលដល់វគ្គពាក់កណ្តាលផ្តាច់ព្រ័ត្រ ខណៈក្រូអាស៊ី ធ្លាប់ឈានដល់វគ្គ១/៤ផ្តាច់ព្រ័ត្រ។
យុគសម័យមាសរបស់អេស្ប៉ាញ បានកើតឡើងក្រោមការដឹកនាំរបស់លោក Vicente del Bosque ចាប់តាំងពីខែកក្កដា ឆ្នាំ២០០៨មក។ ពួកគេបានឈ្នះជើងឯក World Cup នៅឆ្នាំ២០១០ និងឈ្នះជើងឯក EURO នៅឆ្នាំ២០១២ បន្ទាប់ពីបានឈ្នះពីរលើករួចហើយនៅឆ្នាំ១៩៦៤ និងឆ្នាំ២០០៨។ នេះជាឱកាសរបស់ក្លិបដែលមានរហស្សនាមថា La Roja ក្នុងការគ្រប់គ្រងពានអឺរ៉ុប៣លើកជាប់ៗគ្នា។
សាធារណរដ្ឋឆែក មានលោក Pavel Vrba ជាគ្រូបង្វឹកចាប់តាំងពីដើមឆ្នាំ២០១៤ មក។ ដូចជាស្លូវ៉ាគីផងដែរ ឆែកមានប្រវត្តិលើកពានក្នុងនាមជាប្រទេសឆេកូស្លូវ៉ាគី កាលពីឆ្នាំ១៩៧៦។ បើគិតចាប់តាំងពីក្លាយជារដ្ឋឯករាជ្យនៅឆ្នាំ១៩៩៤ សាធារណរដ្ឋឆែក បង្ហាញខ្លួនយ៉ាងទៀងទាត់នៅ EURO ដោយបានជាប់លេខ២នៅឆ្នាំ១៩៩៦ និងលេខ៣នៅឆ្នាំ២០០៤ ។
តួកគីដឹកនាំដោយលោក Fatih Terim តាំងពីខែសីហា ឆ្នាំ២០១៣ មក។ ក្នុងចំណោមការបង្ហាញខ្លួន៤លើកកន្លងមក បើគិតចាប់តាំងពីឆ្នាំ១៩៩៦ តួកគីមានកំណត់ត្រាដ៏ល្អរបស់ខ្លួន គឺការឈានទៅកាន់វគ្គពាក់កណ្តាលផ្តាច់ព្រ័ត្រ នៅឆ្នាំ២០០៨ ប៉ុន្តែបានចាញ់អាល្លឺម៉ង់ ៣-២ ទាំងប្រផិតប្រផើយ។
លោក Ante Cacic ទើបតែចូលដឹកនាំក្រូអាស៊ី នៅខែកញ្ញា ឆ្នាំ២០១៥ ។ បន្ទាប់ពីផ្តាច់ចេញពីយូហ្គោស្លាវីនៅឆ្នាំ១៩៩១ ក្រូអាស៊ី បានបង្ហាញឥទ្ធិពលដ៏រឹងមាំរបស់ខ្លួននៅតំបន់អឺរ៉ុប ដោយបានឈានដល់វគ្គចុងក្រោយ៥លើកក្នុងចំណោមការព្យាយាម៦លើក។ លទ្ធផលដ៏ល្អបំផុតរបស់ក្រូអាស៊ី គឺការបង្ហាញខ្លួននៅវគ្គ១/៤ផ្តាច់ព្រ័ត្រក្នុងឆ្នាំ១៩៩៦ និងឆ្នាំ២០០៨៕
ព័ត៌មានទាក់ទងនឹងពូលនីមួយៗ៖
ពូល A http://www.thmeythmey.com/?page=detail&ctype=article&id=39954&lg=kh
ពូល B http://www.thmeythmey.com/?page=detail&ctype=article&id=39979&lg=kh
ពូល C http://www.thmeythmey.com/?page=detail&ctype=article&id=40010&lg=kh
ពូល D http://www.thmeythmey.com/?page=detail&ctype=article&id=40076&lg=kh
ពូល E http://www.thmeythmey.com/?page=detail&ctype=article&id=40104&lg=kh
ពូល F http://www.thmeythmey.com/?page=detail&ctype=article&id=40126&lg=kh
© រក្សាសិទ្ធិដោយ thmeythmey.com