កីឡាជាតិ
ខេត្តកែបជាទីតាំងដ៏សាកសមសម្រាប់ការប្រកួតជើងថ្នាក់ជាតិកីឡាទ្រីយ៉ាត្លុង
× សហព័ន្ធកីឡាទ្រីយ៉ាត្លុងកម្ពុជា នឹងធ្វើយុទ្ធនាការប្រកួតជ្រើសរើសជើងឯកថ្នាក់ជាតិ ប្រចាំឆ្នាំ២០១៦ រយៈពេល៤ថ្ងៃចាប់ពីថ្ងៃទី៧ ដល់ថ្ងៃទី១០ ខែតុលា ខាងមុខនេះ ហើយខេត្តកែប នឹងក្លាយជាទីតាំងដ៏សាកសមសម្រាប់ការរៀបចំការប្រកួត ហើយនេះក៏ជាលើកទី២ដែរសម្រាប់ការរៀបចំនៅខេត្តមួយនេះ ក្នុងចំណោមការប្រកួត៤លើករបស់សហព័ន្ធ។
សហព័ន្ធកីឡាទ្រីយ៉ាត្លុងកម្ពុជា សម្រេចជ្រើសរើសខេត្តកែបជាទីតាំងសម្រាប់ការប្រកួតជ្រើសរើសជើងឯកថ្នាក់ជាតិឆ្នាំ២០១៦ ដោយសារខេត្តនេះមានផ្លូវថ្នល់នៅជាប់នឹងសមុទ្រ ដែលអំណោយផលសម្រាប់ការប្រកួតកីឡាមួយនេះ ព្រោះកីឡាទ្រីយ៉ាត្លុងជាកីឡាមួយប្រភេទ ដែលរួមបញ្ចូលកីឡាបីប្រភេទគឹ ហែលទឹក ជិះកង់ និងរត់។
ពាក់ព័ន្ធទៅនឹងការជ្រើសរើសខេត្តកែបជាទីតាំងសម្រាប់ប្រកួតនេះដែរ លោក ងិន សុបញ្ញា អគ្គលេខាធិការសហព័ន្ធកីឡាទ្រីយ៉ាត្លុងកម្ពុជាបានរៀបរាប់ថា៖«ការដែលយើងជ្រើសរើសខេត្តកែបជាទីតាំងសម្រាប់ប្រកួតជើងឯកថ្នាក់ជាតិនេះ ដោយសារខេត្តកែបជាទីតាំងមួយដែលមានសមុទ្រជាប់នឹងផ្លូវថ្នល់ ដែលយើងងាយស្រួលក្នុងការរៀបចំការប្រកួតថ្នាក់ជាតិ ហើយវាឆ្លើយតបទៅនឹងបច្ចេកទេសនៃកីឡាទ្រីយ៉ាត្លុង»។
លោកបានបន្ថែមថា សម្រាប់ការរៀបចំការប្រកួតជើងឯកថ្នាក់ជាតិនេះសហព័ន្ធមិនទាន់ទទួលបានគោលការណ៍អនុញ្ញាតពីក្រសួងអប់រំនោះទេ ពោលគឺក្រសួងកំពុងដាក់សំណើរទៅកាន់ក្រសួងសេដ្ឋកិច្ច និងហិរញ្ញាវត្ថុដើម្បីស្នើសុំថវិកាក្នុងការរៀបចំការប្រកួតនេះ។ ប្រសិនបើទទួលបានគោលការណ៍អនុញ្ញាតពីក្រសួងអប់រំ និងក្រសួងសេដ្ឋកិច្ច និងហិរញ្ញវត្ថុ សហព័ន្ធនឹងចាប់យុទ្ធនាការនេះតែម្តង។
ចាប់តាំងពីសហព័ន្ធបានបង្កើតឡើងការរៀបចំថ្នាក់ជាតិលើកនេះជាលើកទី៤ហើយ ប៉ុន្តែវាជាលើកទី២សម្រាប់ការជ្រើសរើសខេត្តកែបជាទីតាំងដើម្បីរៀបចំការប្រកួតជើងឯកថ្នាក់ជាតិនេះ។ ហើយលោកអគ្គលេខាធិការសហព័ន្ធរូបនេះអះអាងថា ឆ្នាំនេះនឹងមានលក្ខណៈធំជាងឆ្នាំមុន ពោលគឺសហព័ន្ធចង់រៀបចំក្នុងទំហំលើស១៥០នាក់ ខណៈឆ្នាំមុនមានចំនួន១០០នាក់។
គួរបញ្ជាក់ថា កីឡាទ្រីយ៉ាត្លុងជាកីឡាមួយប្រភេទដែលមិនទាន់ទទួលបានការអនុញ្ញាតពីក្រសួងក្នុងការរៀបចំការប្រកួត National Games នោះទេ ដោយសារសហព័ន្ធនេះមិនទាន់មានក្លិបជាសមាជិកនៅតាមខេត្តដែលបំពេញគ្រប់លក្ខខណ្ឌក្នុងរៀបចំការប្រកួតនេះ៕
Tag:
ទ្រីយ៉ាត្លុង
ងិន សុបញ្ញា
© រក្សាសិទ្ធិដោយ thmeythmey.com