កីឡាជាតិ
កីឡាវាយកូនឃ្លីលើតុកម្ពុជានឹងចូលរួមប្រកួតនៅសិង្ហបុរី
× សហព័ន្ធកីឡាវាយកូនឃ្លីលើតុកម្ពុជា នឹងបញ្ជូនកីឡាករចំនួន៤រូប ទៅចូលរួមប្រកួតក្នុងព្រឹត្តិការណ៍ ASEAN University Games 2016 នៅប្រទេសសិង្ហបុរី នាខែកក្កដា ខាងមុខ។ ការប្រកួតនេះមានប្រទេសចំនួន១១ចូលរួម ហើយក្នុងចំណោមប្រទេសទាំងនោះមានតែ៣ប្រទេសប៉ុណ្ណោះដែលជាឧបសគ្គដ៏ធំសម្រាប់កម្ពុជា។
កីឡាករវាយកូនឃ្លីលើតុកម្ពុជាចំនួន៤រូបនឹងចូលរួមប្រកួតដណ្តើមជើងឯកក្នុងព្រឹតិ្តការណ៍ ASEAN University Games 2016 នៅប្រទេសម៉ាឡេស៊ី នាថ្ងៃទី៦ ខែកក្កដាខាងមុខនេះ។ ព្រឹតិ្តការណ៍កម្រិតអាស៊ាននេះមានប្រទេសចូលរួមចំនួន១១ ហើយក្នុងចំណោមប្រទេសទាំងនោះគឹមានតែប្រទេស សិង្ហបុរី វៀតណាម និងថៃ ប៉ុណ្ណោះដែលជាឧបសគ្គរារាំងដ៏ធំសម្រាប់កម្ពុជា ព្រោះប្រទេសទាំងនេះសម្បូរទៅដោយកីឡាករជើងចាស់ដែលមានសមត្ថភាព និងបច្ចេកទេសខ្ពស់។ នេះបើយោងតាម លោក សម បូរ័ត្ន គ្រូបង្វឹកក្រុមកីឡាករវាយកូនឃ្លីលើតុជម្រើសរបស់កម្ពុជា។
លោកបានបន្តថា កីឡាករដែលលោកនឹងបញ្ជូនសុទ្ធសឹងតែជាកីឡាករដែលមានសមត្ថភាព និងបច្ចេកទេសខ្ពស់ និងជាកីឡាករដែលធ្លាប់ចូលរួមប្រកួតក្នុងព្រឹត្តិការណ៍ស៊ីហ្គេម និងមេគង្គហ្គេមផងដែរ។ នេះជាលើកទី៣ហើយសម្រាប់កីឡាករ កម្ពុជា ក្នុងការចូលរួមប្រកួតក្នុងកម្មវិធី ASEAN University Games ហើយលោកសង្ឃឹមយ៉ាងមុតមាំថា ការចូលរួមលើកនេះកូនសិស្សរបស់លោកនឹងទទួលបានលទ្ធផលល្អ ព្រោះកីឡាករទាំងនេះបានហ្វឹកហាត់យ៉ាងយកចិត្តទុក និងព្យាយាមបានល្អ។
នៅក្នុងខែកក្កដានេះដែរ កីឡាករវាយកូនឃ្លីលើតុកម្ពុជា នឹងចូលរួមប្រកួតក្នុងព្រឹត្តិការណ៍ School Games 2016 នាថ្ងៃទី២២ ខែកក្កដា ឆ្នាំ២០១៦ នៅទីក្រុងឈៀងម៉ៃ ប្រទេសថៃ។ ហើយក្នុងខែនេះដែរកម្ពុជា នឹងធ្វើជាម្ចាស់ផ្ទះការប្រកួតកីឡាវាយកូនឃ្លីលើតុយុវជន១១ប្រទេសផងដែរ។
គួរបញ្ជាក់ថា កីឡាករវាយកូនឃ្លីលើតុកម្ពុជា ធ្លាប់បានចូលរួមក្នុងកម្មវិធី ASEAN University Games នេះពីរលើករួចមកហើយ ដោយកាលពីឆ្នាំមុននៅប្រទេសឥណ្ឌូនេស៊ី កម្ពុជា ទទួលបានចំណាត់ថ្នាក់លេខ៤៕
Tag:
វាយកូនឃ្លីលើតុ
សម បូរ័ត្ន
ASEAN University Games 2016
© រក្សាសិទ្ធិដោយ thmeythmey.com