ពលរដ្ឋខ្លាចបាត់ព្រះសារីរិកធាតុជាថ្មី ទោះអាជ្ញាធរអះអាងពីការរឹតបន្តឹងសន្តិសុខ

ជាតិ

ពលរដ្ឋខ្លាចបាត់ព្រះសារីរិកធាតុជាថ្មី ទោះអាជ្ញាធរអះអាងពីការរឹតបន្តឹងសន្តិសុខ

21, May 2016 , 11:00 pm

រូបភាព

ដោយ:

ភ្នំពេញ៖ ព្រះសារីរិកធាតុ ដែលបានរកឃើញវិញ បន្ទាប់ពីត្រូវជនល្មើសលួច កាលពីខែធ្នូ ឆ្នាំ២០១៣ កន្លងទៅ ត្រូវបានដង្ហែទៅតម្កល់ទុក នៅព្រះសក្យមុនីចេតិយលើភ្នំព្រះរាជទ្រព្យវិញហើយ នៅថ្ងៃទី២០ខែឧសភា ឆ្នាំ២០១៦។ តែយ៉ាងណាក៏ដោយប្រជាពលរដ្ឋ នៅតែខ្លាចបាត់ព្រះសារីរិកធាតុនេះម្តងទៀត ទោះបីអាជ្ញាធរបានអះអាងពីការរឹតបន្តឹងសន្តិសុខក៏ដោយ។

ព្រះបរមសារីរិកធាតុ ត្រូវបានដាក់លើរថយន្តបុស្បុក ដង្ហែតាមបែបសាសនាព្រះពុទ្ធទៅទុកនៅកន្លែងដើមវិញហើយ កាលពីព្រឹកថ្ងៃទី២០ ខែឧសភា ឆ្នាំ២០១៦។ ពិធីតាមបែបសាសនានេះ មានការអមដំណើរពី លោក ហ៊ឹម ឆែម រដ្ឋមន្ត្រីក្រសួងធម្មការ និងសាសនា មន្ត្រីស្ថាប័នរដ្ឋនានា ព្រះសង្ឃ ពុទ្ធបរិស័ទ និងសិស្សនិស្សិតជាង១ពាន់នាក់ ។ ព្រះបរមសារីរិកធាតុ ត្រូវបានដង្ហែចេញពីព្រះបរមរាជវាំង ទៅភ្នំ ឧដុង្គ ឆ្លងកាត់តាមមហាវិថីព្រះនរោត្តម វិថីព្រះអង្គឌួង មហាវិថីព្រះមុនីវង្ស ឆ្លងស្ពានជ្រោយចង្វារ តាមផ្លូវជាតិលេខ ៦ឆ្ពោះទៅស្ពានព្រែកតាមាក់ និងស្ពានព្រែកក្តាមរួច ឆ្ពោះទៅកាន់ព្រះមហាសក្យមុនីចេតីយ៍ភ្នំអដ្ឋរស្សតែម្តង។

ដង្ហែព្រះបរមសារីរិកធាតុទៅតម្កល់នៅកន្លែងដើមវិញ អាជ្ញាធរបានអះអាងពីការរឹតបន្តឹងសន្តិសុខ ដោយដាក់កម្លាំងការពារព្រះបរមសារីរិកធាតុនៅភ្នំអដ្ឋរស្ស ឬឧដុង្គនេះ ទាំងយប់ ទាំងថ្ងៃដែរ។ លោក សេង សុមុនី អ្នកនាំពាក្យក្រសួងធម្មការ និងសាសនា មានប្រសាសន៍ថា រដ្ឋាភិបាលបានប្រគល់ព្រះសារីរិកធាតុជូនអាជ្ញាធរមានសមត្ថកិច្ចដែលមានទីតាំង នៅក្បែរភ្នំព្រះរាជទ្រព្យនោះ រួមមានខេត្ត៥ គឺភ្នំពេញ ខេត្តកណ្ដាល កំពង់ស្ពឺ កំពង់ឆ្នាំង និងកំពង់ចាម ដើម្បីថែរក្សាការពារសុវត្ថិភាពព្រះសារីរិកធាតុ។ ប៉ុន្តែអ្នកនាំពាក្យរូបមិនអាចលម្អិតពីការការពារព្រះបរមសារីរិកធាតុនេះឡើយ គ្រាន់តែបញ្ជាក់យ៉ាងខ្លីថា៖«ពាក់ព័ន្ធរឿងសន្តិសុខនេះ ជាសមត្ថកិច្ចរបស់អាជ្ញាធរ»។ ទោះជាមានបញ្ជាក់យ៉ាងនេះក្តី ប៉ុន្តែប្រជាពលរដ្ឋនៅតែបារម្ភដដែល ខ្លាចមានជនខិលខូចលួចម្តងទៀត។

លោក ស្វាយ ម៉ុល រីករាយណាស់ដែលនៅពេលអាជ្ញាធរដង្ហែព្រះសារីរិកធាតុមកតម្កល់ទុកភ្នំឧដុង្គវិញ។ ប៉ុន្តែបុរសចំណាស់ដែលរស់នៅឃុំភ្នំបាត ស្រុកពញាឮ ខេត្តកណ្តាល រូបនេះ នៅតែមានកង្វល់ក្នុងចិត្តពីសុវត្ថិភាពរបស់ព្រះសារីរិកធាតុ។ ព្រឹទ្ធាចារ្យវ័យ៧២ឆ្នាំ បានថ្លែងយ៉ាងដូច្នេះ៖«ខ្ញុំខ្លាចបាត់បង់ ព្រោះខ្ញុំមិនដឹងថា រដ្ឋអំណាចគេយាមកាមយ៉ាងណាទេ។ កាលណាសារីរិកធាតុត្រូវបាត់បង់ ពលរដ្ឋជឿបារមីព្រះអង្គតែងមានអារម្មណ៍មិនសុខក្នុងចិត្តទេ»។

មិនសូវខុសគ្នាដែរ ទន្ទឹមនឹងការសាទរពីការវិលត្រឡប់របស់ព្រះបរមសារីរិកធាតុ លោក ឆេង ឈឿន ដែលជាប្រជាពលរដ្ឋរស់នៅឃុំភ្នំបាត ស្រុកពញាឮដែរនោះ ក៏បារម្ភដូច្នេះដែរ។ បុរសវ័យ ៥៣ឆ្នាំរូបនេះ បានរៀបរាប់ថា បើព្រះសារីរិធាតុស្ថិតនៅភ្នំឧដុង្គ ពលរដ្ឋតែងជួបសេចកី្តសុខសប្បាយ។ លោកបញ្ជាក់ ជាមួយនឹងជំនឿយ៉ាងនេះថា៖«តំបន់យើងរាំងស្ងួតប្លែក តែគ្រាន់តែអាជ្ញាធរដង្ហែមកវិញ យើងទទួលបានភ្លៀងពីរបីមេ ត្រជាក់ត្រជុំណាស់។ ខ្ញុំជឿលើបារមីព្រះអង្គ»។

«អាជ្ញាធរត្រូវការពារព្រះសារីរិកធាតុតឹងរឹងជាងមុន»។ គឺជាការស្នើរបស់ពុទ្ធសាសនិកម្នាក់ទៀត គឺលោក អ៊ូន ទន់។ ពលរដ្ឋរស់នៅក្នុងស្រុកពញាឮ ខេត្តកណ្តាល វ័យ៦១ឆ្នាំ រូបនេះ បានសង្កត់យ៉ាងនេះថា៖«រដ្ឋអំណាច ត្រូវទប់ស្កាត់សត្រូវបំផ្លាញទ្រព្យសម្បតិ្តរដ្ឋឲ្យអស់ ព្រោះពួកគេបំផ្លាញសន្តិសុខជាតិ បំផ្លាញទ្រព្យជាតិ»។ លើសពីនេះបុរសរូបនេះ ក៏ឆ្លៀតបួងសួងដល់វត្ថុស័ក្តិសិទ្ធិ តាមថែរក្សាប្រជាជនកម្ពុជាទាំងមូលដែរ។

សូមបញ្ជាក់ថា ព្រះសារីរិកធាតុត្រូវបានតម្កល់ទុកបណ្ដោះអាសន្ន ក្នុងព្រះបរមរាជវាំងមួយរយៈ ក្រោយពីជនល្មើសលួចព្រះសារីរិកធាតុ កាលពីវេលាយប់ទៀបភ្លឺថ្ងៃទី១០ ខែធ្នូ ឆ្នាំ២០១៣ និងរកឃើញវិញនៅរយៈពេល២ខែក្រោយ។ សំណុំរឿងលួចព្រះសារីរិកធាតុដ៏ចម្រូងចម្រាសនេះ ត្រូវបានសាលាដំបូងខេត្តកណ្តាល ប្រកាសសាលក្រមផ្តន្ទាទោសជនជាប់ចោទចំនួន៥នាក់ ក្នុងចំណោម ៦នាក់ ដាក់ពន្ធនាគារម្នាក់ៗ៧ឆ្នាំ និងពិន័យជាប្រាក់ចំនួន៨លានរៀល។

ព្រះបរមសារីរិកធាតុ ត្រូវបាន ព្រះបាទសម្តេច ព្រះបរមរតនកោដ្ឋ នរោត្តម សីហនុ ដង្ហែពីប្រទេសស្រីលង្កា មកដល់ប្រទេសកម្ពុជាក្នុងឆ្នាំ ១៩៥៧។ ព្រះបរមរតនកោដ្ឋ នរោត្តម សីហនុ បានរៀបចំពិធីដង្ហែព្រះសារីរិកធាតុ ពីព្រះសក្យមុនីចេតិយនៅភ្នំពេញ យកទៅតម្កល់នៅព្រះសក្យមុនីចេតិយថ្មី នៅភ្នំអដ្ឋរស្ស ឬឧដុង្គ កាលពីថ្ងៃទី១៩ ខែធ្នូ ឆ្នាំ២០០២៕