កីឡាអន្តរជាតិ
Euro2016៖ ពូល F មាន អូទ្រីស ហុងគ្រី អ៊ីស្លង់ និងព័រទុយហ្គាល់
× ព្រឹត្តិការណ៍ប្រកួតកីឡាបាល់ទាត់ដណ្តើមពានរង្វាន់ទ្វីបអឺរ៉ុបឆ្នាំ២០១៦ (UEFA EURO 2016) នឹងដំណើរការចាប់ពីថ្ងៃទី១០ ខែមិថុនា ដោយមាន២៤ក្រុមចូលរួម។ ការប្រកួតនឹងប្រព្រឹត្តទៅនៅកីឡដ្ឋានចំនួន១០ក្នុងប្រទេសបារាំង ដោយមានការបែងចែកជា៦ពូល។
បន្ទាប់ពីពូល A ពូល B ពូល C ពូល D និងពូល E ថ្ងៃនេះ សារព័ត៌មានថ្មីៗ សូមផ្តល់ព័ត៌មានសង្ខេបទាក់ទងនឹងក្រុមជម្រើសជាតិដែលស្ថិតនៅក្នុងពូល F។ នៅក្នុងពូលនេះ អ៊ីស្លង់ នឹងបង្ហាញខ្លួនជាលើកដំបូងក្នុងប្រវត្តិសាស្ត្ររបស់ខ្លួន ខណៈព័រទុយហ្គាល់ អូទ្រីស និងហុងគ្រី សុទ្ធតែមានបទពិសោធន៍រួចហើយ។
លោក Marcel Koller គ្រូបង្វឹកសញ្ជាតិស្វីស បានដឹកនាំក្រុមជម្រើសជាតិអូទ្រីសចាប់តាំងពីខែតុលា ឆ្នាំ២០១១ មក។ កាលពីឆ្នាំ២០០៨ អូទ្រីសបានធ្វើជាសហម្ចាស់ផ្ទះជាមួយស្វីស ប៉ុន្តែពួកគេបានបញ្ចប់ត្រឹមចំណាត់ថ្នាក់លេខ៣នៅក្នុងពូល ដោយចាញ់ក្រូអាស៊ី អាល្លឺម៉ង់ និងស្មើប៉ូឡូញ។
ហុងគ្រី ស្ថិតក្រោមការដឹកនាំរបស់គ្រូបង្វឹកអាល្លឺម៉ង់ លោក Bernd Storck ចាប់ពីខែកក្កដា ឆ្នាំ២០១៥ មក។ ក្រុមមួយនេះ មានប្រវត្តិមិនអន់នោះឡើយ ដោយធ្លាប់រងជើងឯក World Cup នៅឆ្នាំ១៩៣៨ និងឆ្នាំ១៩៥៤ ហើយធ្លាប់ឈ្នះជើងឯកអូឡាំពិក៣លើក។ កាលពីឆ្នាំ១៩៦៤ ពួកគេបានចំណាត់ថ្នាក់លេខ៣រង្វាន់ទ្វីបអឺរ៉ុប ប៉ុន្តែពួកគេត្រូវរង់ចាំអស់រយៈពេលរាប់ឆ្នាំដើម្បីបង្ហាញខ្លួនសាជាថ្មី។
អ៊ីស្លង់ ដែលមានឈុតយុវជនដ៏លេចធ្លោ នឹងបង្ហាញវត្តមានលើកដំបូងដើម្បីដណ្តើមពានរង្វាន់ទ្វីបអឺរ៉ុប។ ក្រុមនេះ មានរហស្សនាមថា Strákarnir okkar (Our boys) ដោយស្ថិតក្រោមការដឹកនាំរួមគ្នាពីសំណាក់គ្រូបង្វឹកស៊ុយអែត លោក Lars Lagerbäck និងគ្រូបង្វឹកអ៊ីស្លង់ លោក Heimir Hallgrimsson ។ លោក Hallgrimsson នឹងកាន់កាប់ដំណែងផ្តាច់មុខក្រោយ EURO ពោលគឺបន្ទាប់ពីលោក Lagerback ចូលនិវត្តន៍។
ព័រទុយហ្គាល់ ហាក់ដូចជាក្រុមដែលលេចធ្លោជាងគេនៅក្នុងពូល។ លោក Fernando Santos បានដឹកនាំក្រុមមួយនេះ តាំងពីខែកញ្ញា ឆ្នាំ២០១៤ ។ ចំណាត់ថ្នាក់ល្អបំផុតរបស់ព័រទុយហ្គាល់ក្នុងយុទ្ធនាការប្រចាំទ្វីប គឺការឈានដល់វគ្គផ្តាច់ព្រ័ត្រកាលពីឆ្នាំ២០០៤។ ខ្សែប្រយុទ្ធ Cristiano Ronaldo ដែលលេងឲ្យក្លិប Real Madrid បានស៊ុតបាល់បញ្ចូលទីសរុបរហូតដល់៥៥គ្រាប់សម្រាប់ក្រុមជម្រើសជាតិ៕
ព័ត៌មានទាក់ទងនឹងពូលនីមួយៗ៖
ពូល A http://www.thmeythmey.com/?page=detail&ctype=article&id=39954&lg=kh
ពូល B http://www.thmeythmey.com/?page=detail&ctype=article&id=39979&lg=kh
ពូល C http://www.thmeythmey.com/?page=detail&ctype=article&id=40010&lg=kh
ពូល D http://www.thmeythmey.com/?page=detail&ctype=article&id=40076&lg=kh
ពូល E http://www.thmeythmey.com/?page=detail&ctype=article&id=40104&lg=kh
ពូល F http://www.thmeythmey.com/?page=detail&ctype=article&id=40126&lg=kh
© រក្សាសិទ្ធិដោយ thmeythmey.com