ពីនេះ ពីនោះ
ឱមនុស្ស! មានខ្លាំង ពិបាកខ្លាំង!
× ដោយ ប៉ាកកាខ្មៅ
កំណាព្យបទពាក្យ៨
-ពីមុននៅអត់មានអីក៏បាន ជីវិតចាប់ថ្កានប្រើប្រាស់ស៊ីម៉ាក
ហូបចុកស្លៀកពាក់ចាប់ផ្តើមពិបាក មានទឹករកកាកមិនដែលចេះគ្រប់។
-ពីមុនក្រៀមក្រោះដាក់អស់មិនអី ពេលនេះអាំងត្រីត្រូវការទឹកស៊ុប
ពេលបានម្ហូបឆាទាររកស្ងោរទប់ ហូបមិនចេះគ្រប់ព្រោះអាងមានប្រាក់។
-បានត្រីក្រឹមក្រាញ់ថាឆ្ងាញ់ងាវគ្រំ ពេលបានត្រីធំចង់ត្រីចង្កាក់
បានមាន់ទាខ្វៃចង់អាំងប្រឡាក់ មានត្រីសាបាក់បែររកធូណា។
-ផ្ទះល្វែងលែងសុខរស់ស្មុគស្អុះក្តៅ ថ្លែងប្រាប់អ្នកក្រៅចង់បានវីឡា
មានហើយដីស្រែចង់ថែមចំការ បានចិញ្ចៀនត្រាប្រាថ្នាខ្សែ ក។
-ពេលជិះម៉ូតូស្រែកថ្ងូររកឡាន ទោះថោកក៏បានក៏ចិត្តត្រេកអរ
លុះចាប់ឡើងលុយដូរឡានបន្ត ឆ្លាមឆ្លូញធ្លាប់ល្អប្រែអស់និស្ស័យ។
-ផឹកកាហ្វេតែទាល់តែម៉ាកល្បី ខោអាវចេញថ្មីទាល់តែម៉ូដថ្លៃ
មុនខោអាវដាចធ្លាប់ដេរដោយដៃ អ្នកទាន់សម័យចោលកៀនជញ្ជាំង។
-ថ្លែងមិនចេះចប់រឿងក្តីប្រាថ្នា មិនថាសាសន៍ណាអាស៊ីអាគាំង
បើចិត្តជ្រួលជ្រុលគួរតែឃាត់ឃាំង ត្រូវរៀបជញ្ជាំងខណ្ឌចិត្តខ្លួនឯង៕
© រក្សាសិទ្ធិដោយ thmeythmey.com