អាស៊ីអឺរ៉ុបស្គាល់ជាតិឈ្នះលើកដំបូង រីឯការពារជាតិ និងបឹងកេត នៅតែឈរជាប់គ្នាលើតារាង

កីឡាជាតិ

ជាតិ

អាស៊ីអឺរ៉ុបស្គាល់ជាតិឈ្នះលើកដំបូង រីឯការពារជាតិ និងបឹងកេត នៅតែឈរជាប់គ្នាលើតារាង

23, May 2016 , 5:09 pm

រូបភាព

ដោយ:

ការប្រកួតក្របខណ្ឌមិត្តហ្វូនខេមបូឌានលីករដូវកាល ២០១៦ កាលពីចុងសប្តាហ៍កន្លងមក ក្រសួងការពារជាតិ និងបឹងកេតអង្គរ រកបាន៣ពិន្ទុរៀងៗខ្លួនដើម្បីរក្សាការប្រជែងគ្នាឈរលើកំពូលតារាង ស្របពេលដែលអាស៊ីអឺរ៉ុបស្គាល់ជ័យជម្នះលើកដំបូងក្នុងចំណោមការប្រកួត៨លើក តាមរយៈការបំបាក់ម្ចាស់ផ្ទះភ្នំពេញក្រោន ២-០ ។

កាលពីថ្ងៃម្សិលមិញ ក្រសួងការពារជាតិបានលត់ក្រុមភ្ញៀវមជ្ឈមណ្ឌលកំចាត់មីនកម្ពុជា ៣-០ ដើម្បីបន្តឈរកំពូលតារាងក្របខណ្ឌមិត្តហ្វូនខេមបូឌានលីកសប្តាហ៍ទី៨ ។ ខ្សែប្រយុទ្ធកូរ៉េខាងជើង Choe Myong-ho រក្សាកំណត់ត្រាពិសេសរបស់ខ្លួន តាមរយៈការស៊ុតបាល់បញ្ចូលទី៨ប្រកួតជាប់ៗគ្នា។ សម្រាប់ជំនួបនៅកីឡដ្ឋានកងយោធពលខេមរភូមិន្ទនេះ Choe រកបាន២គ្រាប់បន្ថែមទៀត ហើយប្រធានក្រុម ភួង សុខសាណា បំពេញបាន១គ្រាប់។

ជ័យជម្នះរបស់ការពារជាតិ កើតឡើងមួយថ្ងៃក្រោយ បឹងកេតអង្គរ យកឈ្នះព្រះខ័នរាជស្វាយរៀង ៣-១ នៅពហុកីឡដ្ឋានជាតិអូឡាំពិក។ ខ្សែប្រយុទ្ធអ៊ូហ្គង់ដា Atuheire Kipson រកបានគ្រាប់បាល់បញ្ចូលទីនាំមុខនៅដើមតង់ទីពីរសម្រាប់ព្រះខ័នរាជ ប៉ុន្តែជាង៥នាទីមុននឹងបញ្ចប់ការប្រកួត ខ្សែប្រយុទ្ធ ចាន់ វឌ្ឍនាកា បានស៊ុតបាល់បញ្ចូលទី៣គ្រាប់ជាបន្តបន្ទាប់ដើម្បីនាំជ័យជម្នះដ៏រំភើបសម្រាប់បឹងកេត។

ក្រសួងការពារជាតិ និងបឹងកេតអង្គរ រក្សាចំណាត់ថ្នាក់លេខ១ និងលេខ២លើតារាង ដោយមាន២១ពិន្ទុ ដូចគ្នា ប៉ុន្តែការពារជាតិ មានប្រៀបលើរូបមន្ត Head to Head ។ ស្របពេលជាមួយគ្នានេះ ខ្សែប្រយុទ្ធកូរ៉េខាងជើង Choe Myong-ho របស់ការពារជាតិ និង ចាន់ វឌ្ឍនាកា របស់បឹងកេត មានគ្រាប់បាល់បញ្ចូលទីសរុប១២គ្រាប់រៀងៗខ្លួនពីការប្រកួត៨លើក។

ណាហ្គាវើល បានឡើងទៅកាន់ចំណាត់ថ្នាក់លេខ៣ដោយមាន១៤ពិន្ទុ បន្ទាប់ពីបានយកឈ្នះអគ្គស្នងការដ្ឋាននគរបាលជាតិ ២-១ កាលពីល្ងាចថ្ងៃអាទិត្យ នៅពហុកីឡដ្ឋានជាតិ។ សុះ ស៊ូហាណា និង ទុំ សារ៉ាយ ជាអ្នកសម្រេចផលសម្រាប់ណាហ្គាវើល មុនពេលដែល នុត ស៊ីនួន រកគ្រាប់បាល់បង្គ្រប់កិច្ចសម្រាប់នគរបាលជាតិ។

ខេមបូឌានថាយហ្គឺរ ស្ថិតនៅលេខ៥ ដោយមាន១៣ពិន្ទុស្មើក្រុមលេខ៤ ព្រះខ័នរាជស្វាយរៀង ។ នាជំនួបនៅពហុកីឡដ្ឋានជាតិ កាលពីថ្ងៃសៅរ៍ ខេមបូឌានថាយហ្គឺរ បានយកឈ្នះវេស្ទើនភ្នំពេញ ៦-០ ដោយ Tomoki Muaramatsu រកបាន៣គ្រាប់ Masato Yoshihara រកបាន២គ្រាប់ ហើយ សួង វិរៈ បន្ថែមបាន១គ្រាប់។

ភ្នំពេញក្រោន ទទួលរងនូវការខកចិត្តនៅក្នុងសប្តាហ៍ទី៨នេះ ដោយពួកគេបានរងគ្រោះដោយសារក្រុមបាតតារាងអាស៊ីអឺរ៉ុបយូណាយធីត នៅលើទឹកដី RSN របស់ខ្លួនកាលពីល្ងាចថ្ងៃអាទិត្យ។ ខ្សែប្រយុទ្ធកាមេរូន Baldwin Ngwa បានស៊ុតបាល់បញ្ចូលទីទាំង២គ្រាប់ ដើម្បីនាំអាស៊ីអឺរ៉ុប ស្គាល់ជ័យជម្នះលើកដំបូង។ ភ្នំពេញក្រោនស្ថិតនៅលេខ៦ដោយមាន១១ពិន្ទុ ខណៈអាស៊ីអឺរ៉ុបលោតទៅលេខ៨ ដោយ៥ពិន្ទុ ហើយក្រុមស៊ីម៉ាក់ស្ថិតនៅលេខ៧មាន៧ពិន្ទុ។

ក្រុមដែលមិនទាន់ស្គាល់ឈ្នះអគ្គស្នងការដ្ឋាននគរបាលជាតិ និងវេស្ទើនភ្នំពេញ ស្ថិតនៅបាតតារាង ដោយមានត្រឹមតែ៤ពិន្ទុ និង៣ពិន្ទុ ប៉ុណ្ណោះ៕