ពីនេះ ពីនោះ
អ្នកមិនមែនជាមនុស្សសាមញ្ញទេ ដែលត្រូវស្ដាប់អ្នកនៅជុំវិញខ្លួន
× ភ្នំពេញ៖ មានបុគ្គលមួយចំនួន សុខចិត្តធ្វើអ្វីៗគ្រប់យ៉ាងទៅតាមគំនិតខ្លួនឯង តែមិនព្រមទទួលយកយោបល់ពីអ្នកដទៃនោះទេ។ ដោយសារតែគេគិតថា ការទទួលយកយោបល់ពីអ្នកផ្សេងច្រើន នឹងនាំឲ្យខ្លួនគេលែងមានតម្លៃ។ តើអ្នកធ្លាប់គិតទេថា ការព្យាយាមស្ដាប់យោបល់ពីអ្នកដទៃធ្វើឲ្យខ្លួនអ្នកអស់តម្លៃ ឬយ៉ាងណា?
«ស្ដាប់អ្នកជុំវិញខ្លួន ទទួលយកយោបល់អ្នកដទៃ» មិនមែនធ្វើឲ្យអ្នកក្លាយជាបុគ្គលគ្មានតម្លៃ ឬបុគ្គលសាមញ្ញនោះទេ ប៉ុន្តែអ្នកនឹងក្លាយជាបុគ្គលកាន់តែអស្ចារ្យ នៅពេលដែលអ្នកព្យាយាមស្ដាប់អ្នកនៅជុំវិញខ្លួន ដោយយកចិត្តទុកដាក់ ហើយយកទៅទៅអនុវត្តន៍ ឬច្នៃបង្កើតថ្មី។ មានន័យថា ទោះបីជាអ្នកមានសមត្ថភាព និងចំណេះដឹងយ៉ាងណាក៏ដោយ អ្នកមិនអាចធ្វើអ្វីៗត្រឹមត្រូវបានគ្រប់ពេល គ្រប់ការងារ គ្រប់បេសកកម្មនោះឡើយ។ ក្នុងស្ថានភាពនេះ អ្នកគួរតែចេះស្ដាប់យោបល់របស់មនុស្សដែលនៅជុំវិញខ្លួន ទោះបីជាពួកគេមានតួនាទី ឬការសិក្សាតិចជាងអ្នកក្ដី ព្រោះពេលខ្លះអ្នកទាំងនោះ អាចជួយឲ្យអ្នកដើរឆ្ពោះទៅកាន់វិថីដ៏ត្រឹមត្រូវ។
ហេតុនេះ ជនដែលអស្ចារ្យ គេយកបរិស្ថានជុំវិញខ្លួនជាគ្រូ ជាមាគ៌ាសម្រាប់ពិចារណាទាំងអស់។ ចំណែកជនសាមញ្ញ គេតែងតែចាត់ទុកខ្លួនឯង ជាគ្រូនៃអ្វីៗទាំងអស់ដែលនៅជុំវិញខ្លួនគេ៕
© រក្សាសិទ្ធិដោយ thmeythmey.com