លោក អ៊ុំ សំអាន មិនឆ្លើយសំណួរចៅក្រម ក្រោមហេតុផលថាលោកមានអភ័យឯកសិទ្ធិ

ជាតិ

នយោបាយជាតិ

លោក អ៊ុំ សំអាន មិនឆ្លើយសំណួរចៅក្រម ក្រោមហេតុផលថាលោកមានអភ័យឯកសិទ្ធិ

25, May 2016 , 11:03 am

រូបភាព

លោក អ៊ុំ សំអាន នាថ្ងៃសាកសួរនៅតុលាការកាលពីថ្ងៃទី១៧ ខែឧសភា កន្លងមក

ដោយ: ម៉ៅ សុផា

លោក អ៊ុំ សំអានមិនបានឆ្លើយនឹងសំណួររបស់ ចៅក្រមស៊ើបសួរឡើយ នៅក្នុងបន្ទប់សវនាការជាង២ម៉ោង នៅព្រឹកថ្ងៃទី ២៥ ខែឧសភានេះ។ ការបដិសេធ មិនឆ្លើយសំណួររបស់ចៅក្រមស៊ើបសួររបស់ តំណាងរាស្ត្រមណ្ឌលសៀមរាបរូបនេះ ក្រោមហេតុផលថាលោកជារាស្ត្រដែលមានអភ័យឯកសិទ្ធិ។

លោក អ៊ុំ សំអាន តំណាងរាស្ត្រគណបក្សសង្គ្រោះជាតិមណ្ឌលសៀមរាប បានចូលខ្លួនទៅឆ្លើយបំភ្លឺនៅតុលាការ ជុំវិញរឿងរិះគន់រដ្ឋាភិបាលពីបញ្ហាព្រំដែន នៅព្រឹកថ្ងៃទី ២៥ ខែឧសភានេះ។ យ៉ាងណាក៏ដោយ ក្រោយបញ្ចប់ការសាកសួរជាង ២ម៉ោង លោក អ៊ុំ សំអាន មិនបានឆ្លើយនឹងសំណួរ របស់ចៅក្រមស៊ើបសួរឡើយ ជុំវិញសំណុំរឿង រិះគន់រដ្ឋាភិបាលពីបញ្ហាព្រំដែននេះ។

លោក ហែម សុជាតិ មេធាវីការពារក្តីរបស់លោក អ៊ុំ សំអាន បានថ្លែងប្រាប់អ្នកសារព័ត៌មានចៅក្រមបានសាកសួរកូនក្តីរបស់ខ្លួនចនួំន៦សំណួរជុំវិញ ការតវ៉ារបស់ខ្លួនរឿងព្រំដែនកន្លងមក ក្នុងសវនាការរយៈពេលជាង២ម៉ោងនេះ។

លោក អ៊ុំ សំអាន មិនបានឆ្លើយនឹងសំណួរទាំងនេះឡើយ ដោយលើកហេតុផលថា លោកជាតំណាងរាស្ត្រដែលមានអភ័យឯកសិទ្ធិ។ លើសពីនេះ លោក អ៊ុំ សំអាន បានឆ្លើយតបទៅវិញថា បើចង់ឲ្យរូបគាត់ឆ្លើយសំណួរទាំងនេះ ទាល់តែសភាដកអភ័យឯកសិទ្ធិគាត់ជាមុនសិន។ នេះជាការបញ្ជាក់របស់មេធាវីដដែល។

ក្រោយសាកសួរ នៅពេលនេះ លោក អ៊ុំ សំអាន កំពុងស្ថិតនៅក្នុងបន្ទប់រង់ចាំ ចាំការបញ្ជូនទៅមន្ទីរឃុំឃាំងព្រៃសវិញ។

សូមបញ្ជាក់ថា លោក អ៊ុំ សំអាន ត្រូវបានអាជ្ញាធរបញ្ជូនខ្លួនទៅកាន់ពន្ធនាគារព្រៃស នៅថ្ងៃទី១២ខែមេសា ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ និងបទញុះញង់ឲ្យមានការរើសអើងតាមមាត្រា៤៩៥និង៤៩៦ នៃក្រមព្រហ្មទណ្ឌ។ លោក អ៊ុំ សំអាន ត្រូវបានប៉ូលីសចាប់ខ្លួនកាលពីម៉ោង១២រំលងអាធ្រាត ឈានចូលថ្ងៃទី១១មេសា នៅក្នុងខេត្តសៀមរាប៕