កីឡាករជើងខ្លាំងរបស់កម្ពុជាចំនួន៥រួប ត្រូវជួបប្រកួតជាមួយជើងខ្លាំងថៃ នៅលើទឹកដីខេត្តស៊ីសាកេត ប្រទេសថៃ ចាប់ពីរសៀលម៉ោង ៣ ដល់ម៉ោង៥ ថ្ងៃសុក្រទី២៧ ឧសភា នេះ ដោយការប្រកួតនេះមានលក្ខណៈខុសពីការប្រកួតក្បាច់គុនបុរាណខ្មែរ ពោលគឺប្រកួតតែ៣ទឹកប៉ុណ្ណោះ ហើយការប្រកួតនេះមានការផ្សាយបន្តផ្ទាល់តាមរយៈទូរទស្សន៍ CTN។
កីឡាករជើងខ្លាំងកម្ពុជាចំនួន៥រូប រួមមាន អ៊ុង វិរៈ, ម៉ឺន សុភា, ឡុង សុវណ្ណឌឿន, សារឿន ច័ន្ទ និង ហ៊ឹម សេរី ត្រូវប្រជែងជាមួយជើងខ្លាំងថៃ នៅក្នុងព្រឹត្តិការណ៍ដ៏ធំមួយរបស់ថៃ គឺ ASEAN Fight ដែលជាព្រឹតិ្តការណ៍ប្រកួតលំដាប់អាស៊ី ដែលមានកីឡាករមកពីបណ្តានៅក្នុងតំបន់អាស៊ីជាច្រើនចូលរួម ប៉ុន្តែការប្រកួតនេះមានតែ៣ទឹកប៉ុណ្ណោះ។
កីឡាករជើងខ្លាំងកម្ពុជាទាំង៥រូបនោះត្រូវបាន លោក ម៉ា សេរី ប្រធានគ្រប់គ្រងកីឡានៅស្ថានីយទូរទស្សន៍ CTN និង CNC និងអ្នកដឹកនាំក្រុមកីឡាករ មន្ត្រកីឡា និងគ្រូបង្វឹកចូលរួមក្នុងកម្មវិធីនេះ បានដាក់រហ័សនាមថា«អ្នកចំបាំងអង្គរ»ឬឯកីឡាករថៃ«អ្នកចំបាំងទីក្រុងស្យាម»។
បើយោងតាមរូបភាព និងការសរសេររៀបរាប់នៅលើគណនីយហ្វេសប៊ុកផ្លូវការរបស់ លោក ម៉ា សេរី បានឲ្យដឹងថា កីឡាករជើងខ្លាំងរបស់កម្ពុជា អ៊ុង វិរៈ ត្រូវជួបកីឡាករថៃ Kimlai Phit ប៉ុន្តែដោយសារកីឡាកររូបនេះជួបឧបទ្ទវហេតុត្រូវជំនួសដោយកីឡាករ Natakiet វិញម្តង។ គូនេះដែរ កីឡាករ អ៊ុង វីរៈ មានទម្ងន់លើសកីឡាករ Natakiet រហូតដល់ ៥ គីឡូក្រាម ដោយ អ៊ុង វីរៈ មានទម្ងន់ ៧៥គីឡូក្រាម ចំណែក Natakiet មានទម្ងន់ ៧០គីឡូក្រាម ហើយថៃម្នាក់នេះក៏ធ្លាប់ចាញ់ពិន្ទុ អ៊ុង វិរៈ នាការប្រកួតនៅទីក្រុងភ្នំពេញម្តងផងដែរ។
ចំណែកអ្នកលេងកណ្តាប់ដៃ ម៉ឺន សុភា ត្រូវប៉ះថៃ Kongyam ក្នុងទម្ងន់ ៧០ គីឡូក្រាម គឺ សុភា ស្រាលជាងថៃម្នាក់នេះ ១ គីឡូក្រាម ដោយ សុភា មានទម្ងន់ ៦៩ គីឡូក្រាម ចំណែក Kongyam មានទម្ងន់ ៧០គីឡូក្រាម ប៉ុន្តែ សុភា មានប្រៀបទាំងកម្ពស់ និងបទពិសោធប្រកួត ព្រោះ សុភា ធ្លាប់ប្រកួតបាន ៤៨ ដង ឈ្នះ ៣៨ ចាញ់ ៨ និងស្មើ ២ ដង ខណៈ Kongyam ធ្លាប់ប្រកួត ៣០ ដង ឈ្នះ ២៥ និងចាញ់ ៥ ដង។
ឬឯ ឡុង សុវណ្ណឌឿន ត្រូវប៉ះ Chok Chai ដែលថៃម្នាក់នេះធ្លាប់ឈ្នះខ្សែក្រវាត់គោជល់នៅ CTN ក្រោយឈ្នះ ផាន់ គ្រាន់ នៅវគ្គផ្តាច់ព្រ័ត្រ ហើយគេក៏ធ្លាប់បានឈ្នះកីឡាករកម្ពុជាជាច្រើននាក់ទៀតផងដែរ។ កីឡាករ Chok Chai រូបនេះមានប្រៀបលើកីឡាករ ឡុង សុវណ្ណឌឿន ទាំងអាយុ កម្ពស់ និងប្រវត្តិនៃការប្រកួត ដោយ រូបគេ មានអាយុ ២៨ឆ្នាំ កម្ពស់១.៨០ម៉ែត្រ ធ្លាប់ប្រកួតចំនួន១២០ដង ឈ្នះ៧០ដង ចាញ់៤៨ដង និងស្មើ២ដង។ ចំណែក ឡុង សុវណ្ណឌឿន ធ្លាប់ប្រកួតចំនួន៦០ដង ឈ្នះ៤១ ចាញ់១២ និងស្មើ៧ដង។ តើ ឡុង សុវណ្ណឌឿន អាចយកឈ្នះលើកីឡាករចាស់វស្សាម្នាក់នេះដើម្បីសងសឹកជួសកីឡាករកម្ពុជាបានឬយ៉ាងណា?
ដោយឡែកកីឡាករកម្ពុជា សារឿន ច័ន្ទ ត្រូវជួបជាមួយកីឡាករថៃ Tam Roulek ក្នុងទម្ងន់ ៦០ គីឡូក្រាម ដោយកីឡាករថៃម្នាក់នេះធ្លាប់ប្រកួត ៧០ ដង ឈ្នះ ៥៨ ចាញ់ ១០ និងស្មើ ២ ដង ឬឯ សារឿន ច័ន្ទ ធ្លាប់ប្រកួតចំនួន១០៧ដង ឈ្នះ៧០ ចាញ់២០ដង និងស្មើ១៧ដង។ ចំណែកកីឡាករជើងខ្លាំងវ័យក្មេង ហ៊ឹម សេរី ប៉ះជើងខ្លាំងថៃ Saylab ក្នុងប្រភេទទម្ងន់៥១គីឡូក្រាម ដោយថៃរូបនេះធ្លាប់ប្រកួត ៦០ដង ឈ្នះ៥១ដង និងចាញ់៩ដង ចំណែក ហ៊ឹម សេរី ធ្លាប់ប្រកួត៤៦ដង ឈ្នះ៤១ដង ចាញ់៤ដង និងស្មើ១ដង។
គួរបញ្ជាក់ថា ការប្រកួតនេះនឹងប្រព្រឹត្តទៅចាប់ពីវេលាម៉ោង ៣រសៀល ដល់ម៉ោង៥រៀល ថ្ងៃទី២៧ ខែឧសភា នេះ នៅខេត្តស៊ីសាកេត ប្រទេសថៃ។ ហើយការប្រកួតនេះមានការផ្សាយផ្ទាល់តាមរយៈស្ថានីយទូរទស្សន៍ CTN៕