ជាតិ
និស្សិតអូស្ត្រាលីជាច្រើនរយនាក់ មកសិក្សានិងចុះកម្មសិក្សានៅកម្ពុជា
× តាមរយៈកម្មវិធី New Colombo Plan របស់រដ្ឋាភិបាលអូស្ត្រាលី និស្សិតអូស្ត្រាលីជាច្រើនរយនាក់ បានមកសិក្សាតាមសាកលវិទ្យាល័យនានា និងចុះកម្មសិក្សានៅតាមអង្គការសង្គមស៊ីវិលផ្សេងៗនៅក្នុងប្រទេសកម្ពុជា។
បើតាមសេចក្តីប្រកាសព័ត៌មានរបស់ស្ថានទូតអូស្ត្រាលីប្រចាំនៅកម្ពុជាឲ្យដឹងថា កម្មវិធី New Colombo Plan នឹងផ្តល់ឱកាសឲ្យប្រជាជនកម្ពុជា និងអូស្ត្រាលីបានធ្វើការួមគ្នា និងសិក្សាពីគ្នា ដែលអាចធ្វើឲ្យសម្រេចបានលទ្ធផលល្អនិងយូរអង្វែង។
នៅក្នុងសេចក្តីប្រកាសព័ត៌មានដដែលនេះឲ្យដឹងទៀតថា កម្ពុជាបានចូលរួមក្នុងកម្មវិធី New Colombo Plan នៅក្នុងឆ្នាំ២០១៥ ។ ហើយក្នុងរយៈពេលពីរឆ្នាំនេះ និស្សិតអូស្ត្រាលីចំនួន ៣៧០នាក់បានមកកាន់កម្ពុជា ដើម្បីអនុវត្តចំណេះដឹង និងជំនាញរបស់ពួកគេ ក្នុងការចូលរួមជួសជុលបរិក្ខាវេជ្ជសាស្ត្រ, ព្យាបាលជំងឺសត្វពាហនៈ ដែលអាចរាតត្បាតឆ្លងប្រទេស និងបានធ្វើការជាមួយបុគ្គលិកសង្គមកិច្ច ដើម្បីពង្រឹងគុណភាពជីវិតជនពិការផងដែរ។
លោក សាយម៉ុន ហ្វ៊ែលឡូវស៍ ភារៈធារីស្ថានទូតអូស្ត្រាលីប្រចាំនៅកម្ពុជា ថ្លែងក្នុងពិធីផ្សព្វផ្សាយកម្មវិធី New Colombo Plan នៅថ្ងៃទី២៦ខែឧសភា ថា ការដែលនិស្សិតអូស្ត្រាលីចាប់អារម្មណ៍ខ្លាំងក្នុងការមកសិក្សានិងចុះកម្មសិក្សានៅកម្ពុជា គឺឆ្លុះបញ្ចាំងពីចំណងទំនាក់ទំនងផ្នែកអប់រំ និងមិត្តភាពរឹងមាំរវាងប្រទេសទាំងពីរ។
គួរបញ្ជាក់ថា កម្មវិធី New Colombo Plan របស់រដ្ឋាភិបាលអូស្ត្រាលីនេះ ត្រូវបានបង្កើត ដើម្បីផ្តល់ឱកាសដល់និស្សិតអូស្ត្រាលីវ័យក្មេង បានបង្កើនការយល់ដឹងឲ្យកាន់តែជ្រាលជ្រៅអំពីតំបន់ឥណ្ឌូប៉ាស៊ីហ្វិក តាមរយៈការគាំទ្រឲ្យនិស្សិតទាំងនោះបានទៅសិក្សា និងចុះកម្មសិក្សាផ្ទាល់ក្នុងប្រទេសនៃតំបន់ឥណ្ឌូប៉ាស៊ីហ្វិក ដែលមានកម្ពុជាផងដែរ៕
Tag:
និស្សិតអូស្រា្តលី
© រក្សាសិទ្ធិដោយ thmeythmey.com