ក្រសួងយុត្តិធម៌បើកវគ្គស្វែងយល់ពីក្រមព្រហ្មទណ្ឌ និងក្រមនីតិវិធីព្រហ្មទណ្ឌ ដល់អ្នកសារព័ត៌មាន

ជាតិ

ក្រសួងយុត្តិធម៌បើកវគ្គស្វែងយល់ពីក្រមព្រហ្មទណ្ឌ និងក្រមនីតិវិធីព្រហ្មទណ្ឌ ដល់អ្នកសារព័ត៌មាន

30, May 2016 , 10:44 am

រូបភាព

ដោយ: ថ្មីៗ

នៅថ្ងៃព្រហស្បតិ៍ទី២ មិថុនា ក្នុងសប្តាហ៍នេះ ក្រសួងយុត្តិធម៌ ដោយបានសហការជាមួយក្លិបអ្នកកាសែតកម្ពុជា (CCJ) នឹងផ្តល់វគ្គសិក្សាខ្លីមួយដល់អ្នកសារព័ត៌មានដើម្បីពួកគេអាចស្វែងយល់អំពី ក្រមព្រហ្មទណ្ឌ និងក្រមនីតិវិធីព្រហ្មទណ្ឌ។ អ្នកសារព័ត៌មានមកពីគ្រប់អង្គភាពសារព័ត៌មានអាចចុះឈ្មោះជាមួយមន្ត្រីក្រសួងយុត្តិធម៌តាមរយៈលេខទូរសព្ទ ០៦១ ៧៦៧ ៧៧៨ និងលេខទូរសព្ទ ០១៦ ៩៧៤ ៤៤៤ និងតាមរយៈក្លិបអ្នកកាសែតកម្ពុជាបានដូចគ្នា។

លោក កើត រិទ្ធ រដ្ឋលេខាធិការក្រសួងយុត្តិធម៌ នឹងធ្វើជាវាគ្មិននៅក្នុងវគ្គសិក្សាស្តីពីក្រមព្រហ្មទណ្ឌ និងក្រមនីតិវិធីព្រហ្មទណ្ឌ ដែលនឹងផ្តល់ជូនអ្នកសារព័ត៌មាននៅព្រឹកថ្ងៃព្រហស្បតិ៍នេះ។ វគ្គសិក្សាដែលចាប់ផ្តើមពីម៉ោង៩ ដល់ម៉ោង១២នោះ នឹងប្រព្រឹត្តទៅនៅទីស្តីការក្រសួងយុត្តិធម៌។

យោងតាមសេចក្តីជូនដំណឹងរបស់ក្រសួងយុត្តិធម៌ វគ្គស្វែងយល់ស្តីពីក្រមព្រហ្មទណ្ឌនេះ មានគោលដៅផ្តល់នូវមូលដ្ឋានគ្រឹះមួយចំនួនទាក់ទងនឹងទិដ្ឋភាពក្រមព្រហ្មទណ្ឌ និងក្រមនីតិវិធីព្រហ្មទណ្ឌ ដល់បណ្តាញសារព័ត៌មានជាតិ និងអន្តរជាតិ ដើម្បីពួកគេអាចស្វែងយល់អំពីចំណាត់ការនីតិវិធីនានារបស់អយ្យការ និងតុលាការកម្ពុជា។

«វគ្គស្វែងយល់នេះ ពុំមែនជាសន្និសីទកាសែត ឬជាវេទិកាសួរដេញដោលទាក់ទងនឹងសំណុំរឿងជាក់ស្តែងណាមួយនោះឡើយ»។ នេះជាការបញ្ជាក់របស់ក្រសួងយុត្តិធម៌៕