ប្រមុខគណកម្មការអឺរ៉ុបនឹងស្កាត់ជួបលោក ពូទីន ទោះអាមេរិកនិងប្រទេសអឺរ៉ុបខ្លះជំទាស់

អន្តរជាតិ

ប្រមុខគណកម្មការអឺរ៉ុបនឹងស្កាត់ជួបលោក ពូទីន ទោះអាមេរិកនិងប្រទេសអឺរ៉ុបខ្លះជំទាស់

31, May 2016 , 8:39 pm

រូបភាព

ដោយ: សៅ ផលនិស្ស័យ (Sao Phal Niseiy)

ខែមិថុនាខាងមុខ ប្រធានគណកម្មការអឺរ៉ុប នឹងបំពេញទស្សនកិច្ចទៅកាន់សហព័ន្ធរុស្ស៊ីដើម្បីចូលរួមវេទិកាសេដ្ឋកិច្ចមួយ ប៉ុន្តែលោកក៏ទំនងជាជួបជជែកផ្ទាល់ជាមួយប្រធានាធិបតី វ្ល៉ាឌីមៀ ពូទីន ពាក់ព័ន្ធទណ្ឌកម្មប្រឆាំងរុស្ស៊ីដែរ។ នេះអាចជាសកម្មភាពថ្មីមួយដែលបង្ហាញថាសហភាពអឺរ៉ុបកំពុងបន្ទន់ជំហរដាក់រុស្ស៊ីដោយតាមទៅជួបលោក ពូទីន ដល់ផ្ទះ ស្របពេលដែលទណ្ឌកម្មប្រឆាំងរុស្ស៊ីជិតផុតកំណត់ហើយ។

តែកាលពីសប្តាហ៍មុនក្នុងកិច្ចប្រជុំនៅប្រទេសជប៉ុនបណ្តាមេដឹកនាំក្រុមប្រទេស ៧ បានអះអាងថាពួកគេនឹងបន្តទណ្ឌកម្មប្រឆាំងរុស្ស៊ីទៀតនៅចុងខែមិថុនាខាងមុខនេះទាំងដែរ រុស្ស៊ីប្រកាសថាខ្លួនមិនខ្វល់ពីទណ្ឌកម្មឡើយ។ ចង់ដកក៏ដកទៅ ឬមិនដកក៏អត់ទៅ។

សូមស្តាប់ការបកស្រាយរបស់លោក សៅ ផលនិស្ស័យ៖

ប្រមុខគណៈកម្មការអឺរ៉ុបលោក ហ្សង់ក្លូ ចាំកឺ ( Jean-Claude Juncker) នឹងបំពេញទស្សនកិច្ចនៅសហព័ន្ធរុស្ស៊ីនៅខែមិថុនាខាងមុខនេះ ដោយលោកនឹងចូលរួមវេទិកាសេដ្ឋកិច្ចមួយដែលរៀបចំឡើងនៅSt Petersburg ។ នៅក្នុងកិច្ចវេទិកានេះ លោក ចាំងកឺ នឹងស្កាត់ជួបជាមួយលោក វ្ល៉ាឌីមៀ ពូទីន (Vladimir Putin) ផងដែរប៉ុន្តែ គេមិនទាន់ច្បាស់នៅឡើយទេថា មេដឹកនាំទាំងពីរនឹងមានកិច្ចពិភាក្សាតទល់មុខគ្នាដាច់ដោយឡែកឬអត់។ គេរំពឹងថា បញ្ហាទណ្ឌកម្មប្រឆាំងរុស្ស៊ីនឹងត្រូវលើកយកមកពិភាក្សាក្នុងពេលបំពេញទស្សនកិច្ចនេះដែរ ព្រោះមេដឹកនាំអឺរ៉ុបកំពុងខ្វែងគំនិតគ្នានៅឡើយនិយាយដល់ការបន្តទណ្ឌកម្មនេះ។ អាមេរិកនិងប្រទេសមេដឹកនាំអឺរ៉ុបមួយចំនួន ប្រឆាំងទស្សនកិច្ចនេះ ដោយសម្អាងថា វាហាក់ដូចជាអឺរ៉ុបកំពុងរណបរុស្ស៊ីដូច្នេះដែរ។ កន្លងមករុស្ស៊ីបានបញ្ជាក់ច្បាស់ហើយថា ខ្លួនគ្មានបំណងលើកយកបញ្ហាទណ្ឌកម្មទៅជជែកជាមួយសហភាពអឺរ៉ុបឡើយ ទោះជាអឺរុបចង់ដក ឬចង់ទុកក៏ខ្លួនមិនខ្វល់ដែរ។ តែរុស្ស៊ីស្វាគមន៍វត្តមានមេដឹកនាំអឺរ៉ុបដូចជាលោក ហ្សង់ក្លូ ចាំងកឺនេះ។

១. អឺរ៉ុបបែកបែកគ្នា ឬអឺរ៉ុបបន្ទន់ឥរិយាបថដាក់រុស្ស៊ី ?
វត្តមានរបស់លោក ហ្សង់ក្លូ ចាំងកឺ នៅរុស្ស៊ីបង្ហាញពីការបន្ទន់ឥរិយាបទមួយចំពោះរដ្ឋាភិបាលក្រេមឡាំង ថ្វីបើវិបត្តិអ៊ុយក្រែនមិនទាន់ឈានដល់ទីបញ្ចប់ក៏ដោយ។ លោក ចាំងកឺ ក្លាយជាមេដឹកនាំសហភាពអឺរ៉ុបទីមួយ ដែលអញ្ជើញទៅទស្សនកិច្ចនៅរុស្ស៊ីនិងជួបមេដឹកនាំរុស្ស៊ី ចាប់តាំងពីពេលដែលរុស្ស៊ីក្រសោបយកទឹកដី Crimea និងគាំទ្រក្រុមឧទ្ទាមភាគខាងកើតប្រទេសអ៊ុយក្រែនក្នុងឆ្នាំ ២០១៤មក។ លោក ចាំងកឺ ខុសពីមេដឹកនាំសហភាពអឺរ៉ុបផ្សេងទៀត ព្រោះលោកយល់ថា បើរក្សាជំហររឹងត្អឹងដាក់រស្ស៊ី គ្មានអ្នកណាចំណេញទេ ហើយអ្វីដែលគ្រោះថ្នាក់គឺការប្រជែងសព្វាវុធរវាងអឺរ៉ុបនិងរុស្ស៊ីតែម្តង។

បើសិនមានការលើកឡើងពីបញ្ហាទណ្ឌកម្មរុស្ស៊ីក្នុងទស្សនកិច្ចនេះមែនវាជាជំហានមួយដែលអឺរ៉ុបនិងរុស្ស៊ីចាប់យកការសន្ទនាគា្នដើម្បីដោះស្រាយបញ្ហា ស្របពេលដែលរដ្ឋអឺរ៉ុបទាំង២៨ ត្រូវសម្រេចនៅចុងខែមិថុនាថាត្រូវបន្តទណ្ឌកម្មប្រឆាំងឬអត់។ ហើយបើជំនួបពិភាក្សានេះមានផ្លែផ្កាច្រើន រដ្ឋមន្ត្រីការបរទេសលោកស្រី Federica Mogherini ប្រហែលជានឹងចាប់ផ្តើមទស្សនកិច្ចនៅរុស្ស៊ីដើម្បីត្រួសត្រាយផ្លូវសម្រាប់ការស្តារទំនាក់ទំនងអឺរ៉ុបជាមួយរុស្ស៊ីនិងជំរុញឲ្យមានការអនុវត្តកិច្ចព្រមព្រៀង Minks II ពេញលេញផងដែរ។

ប៉ុន្តែយ៉ាងណាក៏ដោយ បណ្តាប្រទេសមួយចំនួននៅអឺរ៉ុបដូចជាលីទុយអានី និងឡាត់វី ដែលជាអតីតរដ្ឋសហភាពសូវៀតនោះមិនពេញចិត្តដំណើរទស្សនកិច្ចប្រមុខស្ថាប័ននីតិបញ្ញត្តិសហភាពអឺរ៉ុបឡើយ។ យោងតាមទីភ្នាក់ងារព័ត៌មាន Reuters រដ្ឋមន្ត្រីការបរទេសលីទុយអានី Linas Linkevicius អះអាងថា៖« ទស្សនកិច្ចរបស់មន្ត្រីអឺរ៉ុបគ្រប់ជាន់ថ្នាក់សុទ្ធតែមានតម្លៃជានិមិត្តរូបមួយ។ ហើយខ្ញុំមើលមិនឃើញថាមានហេតុផលអ្វីដែលយើងត្រូវបង្ហាញរុស្ស៊ីថាយើងកំពុងត្រូវការទំនាក់ទំនងជាមួយរុស្ស៊ីដូច្នេះ»។

ចំណែករដ្ឋមន្ត្រីការបរទេសឡាត់វី Edgars Rinkevics វិញបានលើកឡើងស្រដៀងគ្នាថា លោក ចាំងកឺ គួរចៀសវាងឲ្យបាននូវការបញ្ចេញឥរិយាបទដែលបញ្ជាក់ថា ទំនាក់ទំនងរវាងរុស្ស៊ីនិងសហភាពអឺរ៉ុបត្រូវបន្តទៅមុខក្នុងក្របខណ្ឌធុរកិច្ចជាធម្មតាដោយព្រងើយកន្តើយចំពោះព្រឹត្តិការណ៍ឆ្នាំ ២០១៤ឡើយ។ ប្រទេសទាំងពីរនេះមិនគាំទ្រ ចំពោះការបន្ទន់ជំហរដាក់រុស្ស៊ីនេះឡើយ ព្រោះពួកគេគិតថាវាគ្មានផលចំណេញ ហើយរុស្ស៊ីក៏មិនផ្លាស់ប្តូរគោលនយោបាយគំរាមប្រទេសតូចៗដែរ។

តែដូចរៀបរាប់ខាងលើដូច្នេះដែរ អឺរ៉ុបនៅបែកខ្ញែកគ្នានៅឡើយ ហើយក៏មិនទាន់អាចរកជំហររួមគ្នាបានដែរ ពេលដែលនិយាយដល់ទំនាក់ទំនងជាមួយរុស្ស៊ី។ ប្រទេសធំៗដូចជា បារាំង និងអ៊ីតាលី ម្តងជាពីរដងបានអំពាវនាវឲ្យសហភាពអឺរ៉ុបប្រញាប់ប្រញាល់ដកទណ្ឌកម្មប្រឆាំងរុស្ស៊ីចេញ ដើម្បីបើកទ្វារសម្រាប់ការជជែកពិភាក្សាគ្នាដោះស្រាយវិបត្តិនិងបញ្ចៀសការខាតបង់ប្រយោជន៍ធំៗ។

២.រដ្ឋអឺរ៉ុបទំនងជាបន្តទណ្ឌកម្មប្រឆាំងរុស្ស៊ីទៀត ទោះមានការជំទាស់
យ៉ាងណាក៏ដោយ ទណ្ឌកម្មច្រើនជំហានដែលអឺរ៉ុបបានដាក់ប្រឆាំងរុស្ស៊ីទំនងជាមិនត្រូវដកឬបញ្ចប់ត្រឹមចុងខែមិថុនានេះទេ។ រដ្ឋអឺរ៉ុបធំៗដូចជាអង់គ្លេស អាល្លឺម៉ង់និងសម្ព័ន្ធមិត្តអឺរ៉ុប អាមេរិក យល់ឃើញដូចគ្នាថា វាចាំបាច់ត្រូវបន្តទុក ទណ្ឌកម្មនេះ។ ដូច្នេះវាពិតជាមិនអាចចៀសផុតឡើយ ទោះជាមានអ្នកជំទាស់ការបន្តទណ្ឌកម្មនេះក្តី ព្រោះគេចង់បង្ហាញពីការឯកភាពគ្នាផ្ទៃក្នុងរវាងសមាជិក។

ក្នុងថ្ងៃទី២នៃកិច្ចប្រជុំកំពូលប្រទេស ៧ នៅប្រទេសជប៉ុនសប្តាហ៍មុន ប្រមុខរដ្ឋាភិបាលអង់គ្លេសលោក ដេវីដ ខេមេរ៉ូន បានលើកឡើងថាបណ្តាសមាជិកក្រុមប្រទេស ៧ បានឯកភាពគ្នារួចរាល់ហើយថានឹងបន្តទណ្ឌកម្មរុស្ស៊ីចាប់ពីចុងខែមិថុនាខាងមុខ។ ការបន្តដាក់ទណ្ឌកម្មប្រឆាំងរុស្ស៊ីនេះត្រូវបានបណ្តាមេដឹកនាំក្រុមប្រទេស ៧នេះពន្យល់ថាជាការដាក់គំនៀបឲ្យរុស្ស៊ីអនុវត្តកិច្ចព្រមព្រៀងសន្តិភាពក្រុង Minsk ទី ២ ដែលចូលជាធរមានតាំងពីពាក់កណ្តាលខែកុម្ភៈឆ្នាំមុនឲ្យបានពេញលេញសិន៕