ពីនេះ ពីនោះ
ចង់ឲ្យគេសរសើរជាតិ តែម្ចាស់ប្រទេសនៅតែឈ្លោះគ្នា
× ភ្នំពេញ៖ អាចទេថាជាតិរឹងមាំ បើម្ចាស់ប្រទេស មានអ្នកមានសមត្ថភាពតិច។ អាចទេជាតិរីកចម្រើន បើម្ចាស់ប្រទេសមានភាពទំនេរច្រើន។ អាចទេជាតិជាតិខ្ពង់ខ្ពស់ បើម្ចាស់ប្រទេសខ្វះភាពថ្លៃថ្នូរ។ អាចទេបរទេសសរសើជាតិ បើម្ចាស់ប្រទេសរវល់តែឈ្លោះគ្នា។ អាចទេជាតិអាចទទួលបានសេចក្ដីទុកចិត្តពិតពីប្រជាពលរដ្ឋ បើអ្នកនយោបាយចូលចិត្តកុហក ពលរដ្ឋខ្លួនឯង។
គ្រប់យ៉ាង គឺជារឿងដែលកើតមានដដែលៗ នរណាក៏ដឹង អ្នកណាក៏ឃើញ ប៉ុន្តែមិនព្រមកែប្រែ នៅតែបន្ត នៅតែធ្វើរឿងដែលគ្មានប្រយោជន៍ ហើយបង្កើតជារឿង បង្កជាបញ្ហា ក្លាយជាជម្លោះ ឈ្លោះគ្នាមិនចេះចប់មិនចេះហើយ។ ជាពិសេសគឺសកម្មភាពរបស់អ្នកនយោបាយបច្ចុប្បន្ននេះ កាន់តែធ្វើឲ្យពលរដ្ឋអស់ជំនឿចិត្តទៅលើអាជ្ញាធរ តុលាការ រដ្ឋាភិបាល អ្នកនយោបាយ ព្រោះតែជម្លោះក្នុងទិសដៅស្វែងរកផលប្រយោជន៍។ ចំណែកស្ថានភាពនយោបាយបច្ចុប្បន្ននេះ មានលក្ខណៈផុសស្រួយគួរឲ្យបារម្ភ ដែលត្រូវតែយកបញ្ហាមកគិត ពិចារណា រកដំណោះស្រាយរវាងខ្មែរ និងខ្មែរ ដើម្បីផលប្រយោជន៍ខ្មែរ។
យោងតាមតថភាពសង្គម និងស្ថានភាពជាក់ស្ដែង មានតែខ្មែរទេ ដែលស្រឡាញ់ខ្មែរ ជាងអ្នកណាទាំងអស់។ តែបើខ្មែរមិនប្រើវិធីសាស្ត្រសុចរិត ដើម្បីខ្មែរទេ ខ្មែរចាំទទួលយកលទ្ធផលដែលកើតពីអំពើដែលខ្លួនបានសាងក្នុងកាលបច្ចុប្បន្ននេះទៅ។ ខ្មែរត្រូវចាំថា ខ្មែរត្រូវតែមូលមតិគ្នា ជំរុញកិច្ចការជាតិទៅមុខ ដើម្បីកុំឲ្យអ្នកជិតខាងគេបន្តប្រមាថមើលងាយពូជខ្មែរ ថាជាពូជអន់ថយ ចេះតែឈ្លោះគ្នា មិនពូកែខាងរួមគ្នា និងកសាងជាតិ។
សន្តិភាព តម្លៃជាតិ កិត្តិយសជាតិ កម្លាំងជាតិ ស្មារតីជាតិតែមួយ...នឹងកើតមាន ប្រសិនបើខ្មែរយកការសន្ទនា ដោយភាពស្មោះត្រង់ ដើម្បីដោះស្រាយបញ្ហាជាតិ ការពារប្រយោជន៍ខ្មែរ។ ជាប្រទេសជាតិមួយដែលខ្លាំង ជាជាតិមួយដែលមានគេគោរពសរសើរ ជាជាតិមួយដែលបរទេសលេងប្រមាថមើលងាយ ខ្មែរត្រូវតែជាប្រទេសជាតិមួយដែលពលរដ្ឋរស់នៅដោយភាពថ្លៃថ្នូរ និងសាមគ្គីភាពដោយស្មារតីជាបងជាប្អូនពិត។ ប៉ុន្តែបើនៅតែបន្តកុំសង្ឃឹមឡើយថាអ្នកជិតខាងគេសរសើជាតិយើងពិតនោះ៕
© រក្សាសិទ្ធិដោយ thmeythmey.com