ជម្លោះសមុទ្រចិនខាងត្បូងជាប្រធានបទក្ដៅក្នុងជំនួបកំពូលសន្តិសុខនៅសិង្ហបុរី

អន្តរជាតិ

នយោបាយអន្តរជាតិ

ជម្លោះសមុទ្រចិនខាងត្បូងជាប្រធានបទក្ដៅក្នុងជំនួបកំពូលសន្តិសុខនៅសិង្ហបុរី

03, Jun 2016 , 8:19 am

រូបភាព

ដោយ: តន ចាន់រិទ្ធារ៉ា

ការកើនកម្ដៅជម្លោះនៅសមុទ្រចិនខាងត្បូង ទំនងប្រធានបទសំខាន់ក្នុងរបៀបវារៈសំខាន់ៗ ក្នុងជំនួបកំពូលសន្តិសុខនៅសិង្ហបុរី ដែលចាប់ផ្ដើមនៅថ្ងៃទី៣ ខែមិថុនានេះ។ វេទិកានេះ នឹងបង្ហាញពីការបែងចែករវាងមហាអំណាចអាមេរិក និងចិន លើបញ្ហានេះ ខណៈដែលតុលាការមជ្ឈត្តិការអន្តរជាតិ នឹងសម្រេចពាក្យបណ្ដឹងករណីជម្លោះសមុទ្រចិនខាងត្បូង ដែលប្ដឹងដោយហ្វីលីពីន។

ជំនួបកំពូលសន្តិសុខ Shangri-La ដែលជាវេទិកាសន្តិសុខដ៏ធំប្រចាំអាស៊ី ចាប់ផ្ដើមនៅចុងសប្ដាហ៍នេះ ខណៈដែលជម្លោះសមុទ្រខាងត្បូង នឹងជាបញ្ហាក្ដៅដែលត្រូវពិភាក្សា ក្នុងចំណោមប្រមុខការពារជាតិ នៃប្រទេសអាស៊ី។ វេទិកានេះ នឹងក្លាយជាឱកាសសម្រាប់ចិន និងអាមេរិក ក្នុងការស្វែងរកការគាំទ្រពីរដ្ឋដទៃ មុនពេលតុលាការមជ្ឈត្តិករអន្តរជាតិ កាត់ក្ដីលើរឿងនេះ ដែលមានហ្វីលីពីន ជាដើមបណ្ដឹង។

ក្រុងម៉ានីល កំពុងតែប្រជែងជាមួយក្រុងប៉េកាំង ក្នុងជម្លោះទឹកដីសមុទ្រចិនខាងត្បូង ដែលគ្របដណ្ដប់លើផ្ទៃទឹកនៃសមុទ្រនេះ។ អ្នកជំនាញសន្តិសុខ រំពឹងថា អាមេរិក នឹងព្យាយាមទាក់ទាញប្រទេសអាស៊ីអាគ្នេយ៍ ក៏ដូចជាមហាអំណាច ជប៉ុន និងឥណ្ឌា ដើម្បីគាំទ្រហ្វីលីពីន ដែលស្នើឲ្យតុលាការ ទទួលស្គាល់សិទ្ធិរបស់ខ្លួន ក្នុងការប្រើប្រាស់ដែនទឹក ក្នុងសមុទ្រនេះ។ ចំណែកឯ ចិន ដែលបដិសេធយុត្តាធិការតុលាការលើបញ្ហានេះ ក៏រំពឹងថា នឹងស្វែងរកការគាំទ្រពីប្រទេសដទៃ កុំឲ្យបង្ហាញជំហររបស់ខ្លួនជាសាធារណៈ ដើម្បីការពារការរិះគន់ពីលោកខាងលិច។

ជាមួយគ្នានេះ បើតាមទីភ្នាក់ងារព័ត៌មាន Reuters ក្នុងចំណោមប្រតិភូចំនួនជាង២០ គេនឹង ផ្ដោតការយកចិត្តទុកដាក់ខ្លាំង លើជំហររបស់ប្រទេសអាស៊ីអាគ្នេយ៍ លើបញ្ហាសមុទ្រ ចិន ខាងត្បូង។ រដ្ឋជាសមាជិកអាស៊ាន នៅមិនទាន់ឯកភាពគ្នាលើដំណោះស្រាយជាមួយចិន ដែលកំពុងទាមទារដែនអធិបតេយ្យនៅតំបន់នេះទេ ខណៈដែលពួកគេ កំពុងថ្លឹងថ្លែងផល ប្រយោជន៍សេដ្ឋកិច្ច ជាមួយនឹងមហាអំណាចសេដ្ឋកិច្ចលំដាប់ទីពីរនេះ។

ក្រៅពីចិន និងហ្វីលីពីន ប្រទេសផ្សេងទៀតដូចជា វៀតណាម ព្រុយណេ តៃវ៉ាន់ និងម៉ាឡេស៊ី សុទ្ធតែទាមទារទឹកដីក្នុងតំបន់នេះផងដែរ។ សូម្បីតែអាមេរិក ក៏លូកដៃចូលជម្លោះដែរ ដោយបានបញ្ជូននាវាល្បាត មកតំបន់នេះ ក្រោមលេស សិទ្ធិសេរីភាពនាវាចរណ៍អន្តរជាតិ។

សូមបញ្ជាក់ថា កិច្ចប្រជុំកំពូលសន្តិសុខបីថ្ងៃ នឹងផ្ដល់ឱកាសដល់មេដឹកនាំកងទ័ព មន្ត្រីចារកម្ម និងថ្នាក់ដឹកនាំស៊ីវិល ពិភាក្សាដោយចំហ លើបញ្ហាសន្តិសុខ និងជម្លោះដែលកើតមាន។ ជំនួបនេះទៀតសោត ក៏ធ្វើចំពេលដែលអាស៊ីកំពុងប្រឈមមុខ នឹងការផ្លាស់ប្ដូរនៅតំបន់ ដូចជា ការកាន់អំណាចរបស់លោក Rodrigo Duterte នៅហ្វីលីពីន និងការលុបចោលការហាមឃាត់ការលក់អាវុធឲ្យវៀតណាម ពីសំណាក់អាមេរិក។

ក្រៅពីជម្លោះសមុទ្រចិនខាងត្បូង បញ្ហានៅឧបទ្វីបកូរ៉េ ក៏ទំនងជាប្រធានបទសំខាន់ផងដែរ បន្ទាប់ពីរដ្ឋឯកោមួយនេះ សាកល្បងអាវុធ និងគ្រាប់បែកនុយក្លេអ៊ែរ ជាច្រើនលើកច្រើនសារ ក្នុងឆ្នាំនេះ។ ជាមួយគ្នានេះ ការកើនឡើងអំពើហិង្សាជ្រុលនិយមនៅក្នុងតំបន់ ក៏បង្កការព្រួយបារម្ភខ្លាំង ចំពោះសន្តិសុខតំបន់ ដែលតម្រូវឲ្យប្រមុខសន្តិសុខពិភាក្សាគ្នារកដំណោះស្រាយបន្ទាន់ដែរ៕