សិស្សវិទ្យាស្ថាន អន្ដរទ្វីប អាមេរិកាំងជាង១០០០នាក់ ចុះទស្សនកិច្ចសិក្សានៅឧទ្យានជាតិគីរីរម្យ

ជាតិ

សិស្សវិទ្យាស្ថាន អន្ដរទ្វីប អាមេរិកាំងជាង១០០០នាក់ ចុះទស្សនកិច្ចសិក្សានៅឧទ្យានជាតិគីរីរម្យ

08, Jun 2016 , 7:59 am

រូបភាព

ដោយ: ថ្មីៗ

សិស្សានុសិស្ស និងបុគ្គលិកសិក្សាចំនួនជាង១០០០នាក់ នៃវិទ្យាស្ថាន អន្តរទ្វីប អាមេរិកាំង បានចុះទស្សនកិច្ចសិក្សាតាម រយៈរថយន្តក្រុងចំនួន២២គ្រឿង ដែលមានរយៈពេលពេញមួយថ្ងៃឆ្ពោះទៅកាន់ ឧទ្យានជាតិគីរីរម្យ មានទីតាំងស្ថិត នៅក្នុងខេត្ដកំពង់ស្ពឺ។ ដំណើរទស្សនកិច្ចសិក្សានេះ ធ្វើឡើងកាលពីសប្តាហ៍កន្លងទៅ ដើម្បីឲ្យសិស្សានុសិស្សបានសិក្សា ស្វែងយល់អំពី សង្គមខាងក្រៅ ការរស់នៅរបស់ប្រជាជនតាមទីជនបទ ជាពិសេសគឺសិក្សាស្វែងយល់អំពីប្រវត្តិសាស្ត្រ ឧទ្យានជាតិគីរីរម្យ ដែលជាតំបន់ទេសចរណ៍ប្រវត្តិសាស្ត្រធម្មជាតិដ៏មានសក្កានុពលប្រចាំព្រះរាជាណាចក្រកម្ពុជា។

ឧទ្យានជាតិគីរីរម្យ គឺជាតំបន់ទេសចរណ៍មួយដែលគេសង្កេតឃើញមានរមណីយដ្ឋានកែច្នៃ វត្តអារាម ផ្ទះសម្រាប់ស្នាក់ នៅ ភោជនីយដ្ឋាន សួនសត្វ សួនច្បារ ទឹកជ្រោះ លានលេងកីឡា ចំការតែ និងជាកន្លែងអតីតព្រះរាជដំណាក់របស់ ព្រះបាទ នរោត្តមសីហនុ ដែលបានយាងដោយដំរី និងរុករកឃើញតំបន់នេះក្នុងឆ្នាំ១៩៩៤។ បន្ទាប់មកព្រះអង្គបានដាក់ឈ្មោះតំបន់ នេះថា “គីរីរម្យ” ។

លោក ឡុង ពិសី ប្រធានសម្របសម្រួលដំណើរទស្សនកិច្ចសិក្សា បានឱ្យអ្នកយកព័ត៌មានយើងដឹងថា មូលហេតុដែល លោកជ្រើសរើសឱ្យសិស្សានុសិស្សចុះទស្សនកិច្ចសិក្សានៅទីនោះ ដោយលោកយល់ឃើញថា រមណីយដ្ឋាននេះជាកន្លែងដែល មានបរិស្ថានស្អាត ខ្យល់អាកាសបរិសុទ្ធ អំណោយផលដល់សិស្សានុសិស្សក្នុងការសិក្សាស្រាវជ្រាវ និងសម្រាកកម្សាន្ដ អារម្មណ៍។

លោកបានបន្ដថា ផ្សារភ្ជាប់ទៅនឹងដំណើរទស្សនកិច្ចសិក្សានេះ ដើម្បីឱ្យសិស្សានុសិស្សបានយល់ច្បាស់អំពីប្រវត្ដិសាស្ដ្រខ្មែរ សាលាបានរៀបចំជាប្រវត្ដិខេត្ដកំពង់ស្ពឺ ប្រវត្ដិឧទ្យានជាតិគីរីរម្យ ឱ្យលោកគ្រូ អ្នកគ្រូ អានឱ្យសិស្សស្ដាប់ និងរៀបចំ ជាកម្រងសំនួរ-ចម្លើយខ្លីៗ សម្រាប់ចោទសួរទៅសិស្សក្នុងអំឡុងពេលធ្វើដំណើរទៅកាន់រមណីយដ្ឋាន។ ឆ្លងតាមដំណើរ ទស្សនកិច្ចសិក្សានេះ លោកសង្ឃឹមថាសិស្សានុសិស្សទាំងអស់នឹងយកចិត្ដទុកដាក់ខិតខំប្រឹងប្រែងរៀនសូត្រ និងកាន់តែមាន មនសិការចេះស្រឡាញ់ ឱ្យតម្លៃ និងថែរក្សាសម្បត្ដិធម្មជាតិ បរិស្ថាននៅក្នុងព្រះរាជាណាចក្រកម្ពុជាយើង។

លោកសង្កេតឃើញថា ក្នុងដំណើរទស្សនកិច្ចលើកនេះ សិស្សានុសិស្សទាំងអស់មានភាពសប្បាយរីករាយឥតឧបមាជា មួយមិត្ដភ័ក្ដិ បងប្អូន មាតាបិតា អ្នកអាណាព្យាបាល និងលោកគ្រូ អ្នកគ្រូរបស់ពួកគេ ដោយបានសម្រាកលម្ហែកាយបន្ទាប់ពីការ សិក្សា និងបានឃើញនូវទិដ្ឋភាពប្លែកៗ ទេសភាពស្រស់បំព្រង ជាពិសេសធាតុអាកាសដ៏ត្រជាក់បែបធម្មជាតិពិតៗ គួបផ្សំជា មួយការលេងល្បែងប្រជាប្រិយកម្សាន្ត និងការសម្តែងទេពកោសល្យរបស់សិស្សានុសិស្ស។

គួរបញ្ជាក់ផងដែរដែរថា ដំណើរទស្សនកិច្ចសិក្សាលើកនេះ គឺទទួលបានជោគជ័យយ៉ាងខ្លាំង ដោយសិស្សានុសិស្ស ទទួលបាននូវចំណេះដឹងថ្មីៗ និងបានបន្សល់ទុកនូវអនុស្សាវរីយដ៏ល្អ ជាមួយមិត្ដភ័ក្ដិរបស់គេ ម្យ៉ាងវិញទៀតដោយមានការគាំទ្រ ពីសំណាក់មាតាបិតា និងអ្នកអាណាព្យាបាលសិស្សដែលបានផ្ដល់ការជឿទុកចិត្ដមកលើវិទ្យាស្ថាន អន្ដរទ្វីប អាមេរិកាំងអនុញ្ញាត ឱ្យបុត្រាបុត្រីរបស់ពួកគេមកចូលរួមក្នុងដំណើរទស្សនកិច្ចសិក្សា នេះយ៉ាងច្រើនកុះករ៕

(អត្ថបទសាលា)