ជាតិ
នយោបាយជាតិ
លោក ឈាង វុន ថា រដ្ឋសភា នៅតែសាកសួរមន្ត្រីយុត្តិធម៌ ទោះបីជាបក្សប្រឆាំងមិនចូលប្រជុំ
× ភ្នំពេញ៖ កាលបរិច្ឆេទនៃការកោះហៅរដ្ឋមន្ត្រីក្រសួងយុត្តិធម៌ ឲ្យចូលបំភ្លឺនៅវិមានរដ្ឋសភា មិនប្រែប្រួលអ្វីនោះទេ បើទោះបីជាអវត្តមានរបស់បក្សប្រឆាំងក៏ដោយ។ នេះជាការអះអាងរបស់លោក ឈាង វុន អ្នកនាំពាក្យរដ្ឋសភាពីបក្សកាន់អំណាច ដែលបានឆ្លើយតបទៅកាន់បក្សប្រឆាំង។
រដ្ឋសភា បានកំណត់ឲ្យលោក អង្គ វង្សវឌ្ឍនា រដ្ឋមន្ត្រីក្រសួងយុត្តិធម៌ ចូលបំភ្លឺ នៅថ្ងៃទី៩ ខែមិថុនា តាមសំណើរបស់គណបក្សសង្គ្រោះជាតិ។ បើទោះបីជា ការកោះហៅរដ្ឋមន្ត្រីក្រសួងយុត្តិធម៌ឲ្យចូលបំភ្លឺផ្ទាល់មាត់ ធ្វើឡើងតាមសំណើរបស់ខ្លួនក៏ពិតមែន តែតំណាងរាស្ត្របក្សប្រឆាំងទាំងអស់ បានសម្រេចមិនដើរចូលរដ្ឋសភា ដើម្បីស្តាប់ការឆ្លើយបំភ្លឺរបស់លោក អង្គ វង្សវឌ្ឍនា ឡើយ។
ថ្លែងប្រាប់សារព័ត៌មានថ្មីៗ លោក ឈាង វុន អ្នកនាំពាក្យរដ្ឋសភាពីបក្សកាន់អំណាច បានអះអាងថា រដ្ឋសភា មិនអាចបញ្ចប់ដំណើរការរបស់ខ្លួន ដោយសារតែអវត្តមានរបស់បក្សប្រឆាំងឡើយ។ លោក ឈាង វុន លើកឡើងថា ការសម្រេចចិត្តមិនចូលប្រជុំ គឺសិទ្ធិរបស់បក្សប្រឆាំង តែរដ្ឋសភា នៅតែបំពេញតួនាទីរបស់ខ្លួនជាធម្មតា។ លោកបានផ្ញើសារទៅកាន់បក្សប្រឆាំងបែបនេះថា៖«កុំយករដ្ឋសភា ធ្វើជាចំណាប់ខ្មាំង។ ពួកគាត់ ធ្វើពហិការ គឺជារឿងរបស់ពួកគាត់ គេមិនទៅឈឺក្បាលជាមួយទេ»។
សូមបញ្ជាក់ថា កាលពីថ្ងៃទី៦ ខែមិថុនា គណៈកម្មាធិការអចិន្ត្រៃយ៍នៃរដ្ឋសភា បានបើកកិច្ចប្រជុំ ដើម្បីសម្រេចលើសំណើរបស់បក្សប្រឆាំង ដែលស្នើឲ្យរដ្ឋសភា កោះហៅរដ្ឋមន្ត្រីក្រសួងយុត្តិធម៌ ចូលឆ្លើយបំភ្លឺ ទាក់ទងនឹងការអនុវត្តច្បាប់។ សំណើរបស់បក្សប្រឆាំង ធ្វើឡើង បន្ទាប់ពីតុលាការ មានចំណាត់ការលើតំណាងរាស្ត្របក្សប្រឆាំង និងមន្ត្រីសង្គមស៊ីវិលមួយចំនួនកន្លងមក៕
Tag:
CPP
CNRP
រដ្ឋសភា
ឈាង វុន
© រក្សាសិទ្ធិដោយ thmeythmey.com