ជាតិ
អ្នកនាំពាក្យថា លោក រស់ សារ៉ុម គួរតែសូមទោសគ.ជ.ប តាមរយៈសន្និសីតកាសែត លោក រស់ សារ៉ុម ប្រធានសមាគមជ័យលាភីបញ្ញាជន
× ភ្នំពេញ៖ ការសុំទោសរបស់ លោក រស់ សារ៉ុម ប្រធានសមាគមជ័យលាភីបញ្ញាជន ដែលធ្វើឡើងតាមរយៈលិខិត ហាក់ដូចជាមិនទាន់គ្រប់គ្រាន់ឡើយ សម្រាប់គ.ជ.ប។ អ្នកនាំពាក្យ គ.ជ.ប លើកឡើងថា ប្រសិនបើលោក រស់ សារ៉ុម មានឆន្ទៈក្នុងការទទួលកំហុសពិតមែន ប្រធានសមាគមរូបនេះ គួរតែធ្វើសន្និសីទសារព័តមាន ទើបសាកសមនឹងអ្វីដែលខ្លួនបានប្រព្រឹត្តកន្លងមក។
បន្ទាប់ពីដឹងកំហុសរបស់ខ្លួន ដែលប្តឹងសមាជិកគ.ជ.ប ដោយគ្មានមូលដ្ឋានច្បាស់លាស់ លោក រស់ សារ៉ុម ប្រធានសមាគមជ័យលាភីបញ្ញាជន បានសូមទោសបុគ្គល ដែលខ្លួនចោទប្រកាន់ តាមរយៈលិខិតមួយច្បាប់។ លើសពីការសូមទោស គ.ជ.ប សង្ឃឹមថា លោក រស់ សារ៉ុម នឹងធ្វើសន្និសីទសារព័ត៌មាន ដើម្បីសាងកិត្តិយសរបស់គ.ជ.ប ឡើយវិញ។
ថ្លែងប្រាប់សារព័ត៌មានថ្មីៗ អ្នកនាំពាក្យគ.ជ.ប លោក ហង្ស ពុទ្ធា បានអះអាងថា ស្ថាប័នរៀបចំការបោះឆ្នោត មិនយកទោសពៃរ៍ ពីលោក រស់ សារ៉ុម ដែលបានប្តឹងថ្នាក់ដឹកនាំរបស់ គ.ជ.ប នោះទេ។ លោក ហង្ស ពុទ្ធា បន្ថែមថា ការលើកលែងទោសបែបនេះ ដោយសារតែគ.ជ.ប យល់ថា លោក រស់ សារ៉ុម មានភាពទន់ភ្លន់ និងមានស្មារតីភ្ញាក់រឭក ចំពោះទង្វើឆ្គាំឆ្គងដែលខ្លួនបានប្រព្រឹត្ត។
យ៉ាងណាក៏ដោយ អ្នកនាំពាក្យរូបនេះ លើកឡើងថា ដើម្បីសាកសមទៅនឹងកំហុសរបស់ខ្លួន លោក រស់ សារ៉ុម គួរតែធ្វើសន្និសីទសារព័ត៌មាន ដើម្បីសូមទោសនិងសាងភាពស្អាតស្អំឲ្យស្ថាបន័គ.ជ.ប ឡើងវិញ ព្រោះកាលពីលោកចោទប្រកាន់ គ.ជ.ប ក៏ធ្វើតាមរយៈ សន្និសីទសារព័តមានដែរ។ លោក ហង្ស ពុទ្ធា បញ្ជាក់បែបនេះថា៖«យើងមិនបង្ខំគាត់ថាត្រូវតែធ្វើសន្និសីទទេ តែបើគាត់មានឆន្ទៈគាត់គួរតែធ្វើ ដើម្បីឲ្យវាសាកសមនឹងអ្វីដែលគាត់ចោទគ.ជ.ប»។
កាលពីថ្ងៃ២ ខែមិថុនា លោក រស់ សារ៉ុម បានប្តឹងទៅកាន់អង្គភាពប្រឆាំងអំពើពុករលួយ ដើម្បីស្នើឲ្យស្ថាប័នមួយនេះ ស៊ើបអង្កេតលើមន្ត្រីជាន់ខ្ពស់គ.ជ.ប ៤រូប ដែលលោក សង្ស័យថារួមគ្នាប្រព្រឹត្តអំពើពុករលួយ។ មន្ត្រីជាន់ខ្ពស់ដែល លោក រស់ សារ៉ុម ប្តឹង គឹ លោក ស៊ិក ប៊ុនហុក ប្រធានគ.ជ.ប, លោក គួយ ប៊ុនរឿន អនុប្រធានគ.ជ.ប, លោក ហង្ស ពុទ្ធា សមាជិកនិងជាអ្នកនាំពាក្យគ.ជ.ប រួមទាំងលោក ម៉ៅ សុភារិទ្ធ ដែលជាអគ្គលេខាធិការរងនៃគ.ជ.ប។ ប៉ុន្តែ ពាក្យបណ្តឹងរបស់លោក រស់ សារ៉ុម ត្រូវបានអង្គភាពប្រឆាំងអំពើពុករលួយ ទាន់ចោល ដោយសារតែរកមិនឃើញភស្តុតាងណាមួយ ដែលបញ្ជាក់ថា អ្នកទាំង៤រូប បានប្រព្រឹត្តអំពើពុករលួយ៕
Tag:
គជប
ហង្ស ពុទ្ធា
រស់ សារ៉ុម
© រក្សាសិទ្ធិដោយ thmeythmey.com