CNRP ដាក់លិខិតសុំចូលគាល់ព្រះមហាក្សត្រ ដើម្បីរាយការណ៍ពីស្ថានការណ៍នយោបាយ

ជាតិ

នយោបាយជាតិ

CNRP ដាក់លិខិតសុំចូលគាល់ព្រះមហាក្សត្រ ដើម្បីរាយការណ៍ពីស្ថានការណ៍នយោបាយ

15, Jun 2016 , 11:48 am

រូបភាព

ដោយ: ថ្មីៗ

គណបក្សសង្គ្រោះជាតិ បានដាក់លិខិតមួយច្បាប់សុំចូលគាល់ព្រះមហាក្សត្រ ដោយផ្ទាល់ដើម្បីរាយការណ៍ពីស្ថានការណ៍នយោបាយនាពេលបច្ចុប្បន្ននេះ។ នេះបើតាមលោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ។

ថ្លែងទៅកាន់អ្នកគាំទ្រខ្លួននៅមុខទីស្នាក់ការគណបក្សសង្គ្រោះជាតិព្រឹកនេះ លោក យ៉ែម បុញ្ញឫទ្ធិ បានឲ្យដឹងថា គណបក្សលោក បានដាក់លិខិតសុំចូលគាល់ព្រះមហាក្សត្រកាលពីថ្ងៃទី១៤ មិថុនារួចហើយ ដើម្បីសុំពិគ្រោះយោបល់ និងរាយការណ៍ពីបរិយាកាសនយោបាយជូនព្រះអង្គ។

អ្នកនាំពាក្យរូបនេះ បានបន្ថែមថា គណបក្សលោកនៅតែបន្តប្រមូលស្នាមមេដៃ និងរៀបចំញត្តិដើម្បីដាក់ថ្វាយព្រះមហាក្សត្រ ប៉ុន្តែគណបក្សលោកមិនកំណត់ពេលវេលាហែញត្តិដាក់ថ្វាយព្រះអង្គនៅឡើយទេ។ បើតាមលោក យ៉ែម បុញ្ញឬទ្ធិ មកដល់ពេលនេះគណបក្សលោកបានទទួលស្នាមលើញត្តិលើកទីពីរនេះ បានចំនួនជាង២៦ម៉ឺនស្នាមមេដៃហើយ។

កាលពីថ្ងៃទី២៨ ខែមេសា តំណាងរាស្ត្រគណបក្សសង្គ្រោះជាតិ៥៣រូបក្នុងចំណោម៥៥រូប បា នដាក់លិខិតមួយច្បាប់ថ្វាយព្រះមហាក្សត្រនរោត្តម សីហមុនី ដោយបានទូលថ្វាយពីស្ថានការ ណ៍នយោបាយនៅកម្ពុជា និងស្នើសុំព្រះរាជអន្តរាគមន៍ឲ្យបន្ថយកម្តៅនយោបាយ។ ដោយឡែកនៅថ្ងៃទី៣០ឧសភាកន្លងមក តំណាងរាស្ត្រគណបក្សសង្គ្រោះជាតិ បានយកញត្តិចំនួន១៨ដុំ ដែលមានស្នាមមេដៃប្រជាពលរដ្ឋជាង១៧ម៉ឺននាក់ យកថ្វាយទៅព្រះមហាក្សត្រជាថ្មីទៀត ដើម្បីបង្ហាញពីក្ដីព្រួយបារម្ភរបស់ប្រជាពលរដ្ឋ និងគណបក្សសង្គ្រោះជាតិជុំវិញបញ្ហានយោបាយដែលកំពុងមានភាពតានតឹងនេះ ។

ជុំវិញស្នាមមេដៃលើញត្តិគណបក្សសង្គ្រោះជាតិនេះ គណៈកម្មការស្រាវជ្រាវ និងធ្វើកោសល្យវិច្ច័យលើស្នាមមេដៃប្រជាពលរដ្ឋនៅលើញត្តិនេះ បានសន្និដ្ឋានថា ស្នាមមេដៃពលរដ្ឋជាង១៧ម៉ឺនទាំងនោះ អាចមានភាពមិនប្រក្រតី ដោយស្នាមមេដៃខ្លះមានតែឈ្មោះ ខ្លះទៀតមានឈ្មោះអត់ស្នាមមេដៃ និងគ្មានអាស្រ័យដ្ឋានច្បាស់លាស់។ ជាពិសេសស្នាមមេដៃមនុស្សម្នាក់បានផ្តិតដដែលៗលើឈ្មោះផ្សេងទៀតផងដែរ។

តែត្រង់ចំណុចនេះអ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ ហាក់មិនទាន់ជឿលើការសន្និដ្ឋាននេះឡើយ ដោយសារគណបក្សលោកមិនបានចូលរួមត្រួតពិនិត្យជាមួយក្រុមការងារស្រាវជ្រាវនេះ៕