អាមេរិក ប្រាប់រុស្សីថា ការអត់ធ្មត់ខ្លួនមានកំណត់

អន្តរជាតិ

នយោបាយអន្តរជាតិ

អាមេរិក ប្រាប់រុស្សីថា ការអត់ធ្មត់ខ្លួនមានកំណត់

16, Jun 2016 , 11:00 am

រូបភាព

ដោយ: តន ចាន់រិទ្ធារ៉ា

ប្រមុខការទូតអាមេរិក បានចេញមកព្រមានជាចំហទៅរុស្សី និងប្រធានាធិបតីស៊ីរី ខណៈដែលជម្លោះនៅក្នុងស៊ីរី ដែលឈានមកដល់ឆ្នាំទី៦ មកហើយនោះ នៅតែរកច្រកចេញមិនទាន់ឃើញនៅឡើយទេ។ ប្រមុខការទូតអាមេរិកអះអាងថា សហរដ្ឋអាមេរិក កាន់តែអស់ការអត់ធ្មត់លើបញ្ហាស៊ីរី និងអនាគតលោក បាសា អាល់អាសាដ ហើយ។

ពីទីក្រុងអូស្លូ ប្រទេសន័រវេស រដ្ឋមន្ត្រីការបរទេសអាមេរិក លោក ចន ឃែរី (John Kerry) បានប្រាប់ឲ្យ របបប្រធានាធិបតី អាសាដ និងសម្ព័ន្ធមិត្តរុស្សី ត្រូវគោរពបទឈប់បាញ់ ដែលរង្គោះរង្គើមិនចេះមិនចប់ ខណៈការវាយប្រយុទ្ធថ្មី នៅតែមាន ដោយសម្លាប់ជីវិតអស់ជាច្រើន។ លោក ឃែរី ថែមទាំងព្រមានថា ការអត់ធ្មត់របស់ខ្លួន ចំពោះបញ្ហាស៊ីរី មិនមែនអមតៈទេ។

ថ្លែងនៅក្នុងវេទិកាស្ដីពីការស្វែងរកដំណោះស្រាយ និងការសម្រុះសម្រួល រដ្ឋមន្ត្រីការបរទេសអាមេរិក បានបញ្ជាក់ថា រុស្សីត្រូវតែដឹងពីកម្រិត នៃការអត់ធ្មត់របស់អាមេរិក គឺមានកម្រិត ជាពិសេសលើវាសនារបស់ប្រធានាធិបតីស៊ីរី លោក បាសសារ អាល់ អាសាដ។ លោក ឃែរី និយាយទៀតថា បទឈប់បាញ់ ទំនងជាបរាជ័យ ហើយរុស្សី ត្រូវតែដាក់សម្ពាធឲ្យខ្លាំងលើលោក អាសាដ ដើម្បីធានាការគោរពបទឈប់បាញ់ និងសម្រួលការដឹកជញ្ជូនជំនួយ។ មួយវិញទៀត លោក ឃែរី នឹងឲ្យពួកឧទ្ទាម ទទួលខុសត្រូវ ចំពោះការអំពើហិង្សា ដែលនៅតែបន្តរហូតមក។

ឆ្លៀតឱកាសស្នាក់នៅន័រវេស ប្រមុខការទូតអាមេរិក ក៏បានជួបជាមួយសមភាគីមកពីអ៊ីរ៉ង់ និងរដ្ឋមន្ត្រីការពារជាតិស៊ីរី អ៊ីរ៉ង់ ព្រមទាំងរុស្សី ក្នុងគោលដៅបញ្ចប់ការវាយប្រយុទ្ធគ្នា នៅស៊ីរី ជាពិសេសនៅឯទីក្រុង Aleppo ភាគខាងជើងស៊ីរី ដែលការប្រយុទ្ធគ្នា បានឆក់យកជីវិតជាច្រើន។ ទាក់ទិនរឿងនេះ បើតាមសារព័ត៌មាន Al Arabiya លោក ចន ឃែរី សង្កត់ ធ្ងន់ថា បទឈប់បាញ់ ថ្ងៃទី២៧ ខែកុម្ភៈ ហាក់រសាត់ទៅឆ្ងាយ និងប្រឈមមុខ នឹង គ្រោះ ថ្នាក់ទៀតផង ហើយវា ជាបញ្ហាសំខាន់ ដែលត្រូវមានបទឈប់បាញ់ថ្មីមួយ។

វិបត្តិស៊ីរី ដែលកើតឡើងក្នុងឆ្នាំ២០១១ នៅតែជាបញ្ហាក្ដៅ ខណៈដែលកិច្ចព្រមព្រៀងសន្តិភាព ជាប់គាំង ហើយបទឈប់បាញ់ជាច្រើន ក៏បរាជ័យជាបន្តបន្ទាប់ផងដែរ។ យ៉ាងណាមិញ រដ្ឋមន្ត្រីការបរទេសអាមេរិករូបនេះ ប្រាប់ឲ្យដឹងដែរថា កិច្ចខិតខំប្រឹងប្រែង កំពុងតែបន្ត ដើម្បីសម្រេចឲ្យបានបទឈបប់បាញ់ថ្មីមួយទៀត ដែលអាចនឹងចេញជារូបរាងក្នុងសប្ដាហ៍ខាងមុខ។

ប៉ុន្តែ លោក ចន ឃែរី មិនអាចសន្យាបានទេថា កិច្ចព្រមព្រៀងថ្មី នឹងចេញជារូបរាងមែន ដោយលោកគ្រាន់តែអះអាងថា ការសន្ទនារបស់លោក ជាមួយរដ្ឋមន្ត្រីការបរទេសអ៊ីរ៉ង់ នឹងជួយច្រើនដល់ការបង្កើតបទឈប់បាញ់ថ្មីនេះ៕