អន្តរជាតិ
ចិន ៖ និស្សិតស្រីៗត្រូវបង្ខំឲ្យផ្ញើរូបថតស្រាតរបស់ខ្លួន ដើម្បីជាការធានាថានឹងសងប្រាក់
×![]()
ដោយ: ធីតា
ការសិក្សានៅប្រទេសចិន ត្រូវចំណាយប្រាក់ច្រើន។ មាននិស្សិតមួយចំនួនតូចប៉ុណ្ណោះដែលមានលទ្ធភាពបង់ថ្លៃចំណាយលើការសិក្សា។ រីឯនិស្សិតដែលគ្មានលទ្ធភាព ពួកគេត្រូវស្វែងរកប្រាក់កម្ចីតាមមធ្យោបាយរៀងខ្លួន។ អ្នកក្រីក្រខ្លះក៏ត្រូវធនាគារបដិសេធផ្តល់កម្ចី។ ហេតុនេះ និស្សិតស្រីមួយចំនួនបានស្វែងរកជំនួយពីក្រុមអ្នកចងការប្រាក់លើអ៊ីនធឺណេត។ កម្ចីនេះមិនត្រូវការទ្រាំបញ្ចាំទេ អ្វីដែលគេត្រូវការនោះ គឺរូបថតស្រាតរបស់ពួកនាង និងច្បាប់ចម្លងនៃអត្តសញ្ញាណប័ណ្ណ។ រូបថតស្រាតទាំងនោះគឺជាការធានានៃការសងប្រាក់។ បើសិនជាពួកនាងមិនសងប្រាក់ទេ រូបថតស្រាតរបស់ពួកនាងនឹងត្រូវបង្ហោះលើវ៉ិបសាយអាសអាភាស។
ក្រុមអ្នកចងការប្រាក់ផ្តល់នូវកម្ចីដ៏ខ្ពស់ ជួនកាលខ្ពស់ជាងកញ្ចប់កម្ចីទៅតាមធនាគាររហូតដល់ទៅ ៥ ដង។ ក៏ប៉ុន្តែ ពួកគេនឹងជំរិតយកការប្រាក់ដ៏ខ្ពស់ដូចគ្នាដែរ។ នារីវ័យក្មេងម្នាក់ឈ្មោះ Lin Wiao បានប្រាប់សារព័ត៌មាន Beijing Youth ថា នាងចង់បើកអាជីវកម្មតូចមួយ នាងសុខចិត្តផ្ញើរូបថតស្រាតរបស់នាងទៅក្រុមចងការប្រាក់លើវ៉ិបសាយ Jiedaibao ។ នាងទទួលបានកម្ចីប្រមាណ ១៨ ០០០ ដុល្លារ។ ៤ ខែក្រោយមក បំណុលស្រាប់តែកើនឡើងទ្វេដង។ នាងត្រូវសុំជំនួយពីក្រុមគ្រួសារដើម្បីសងប្រាក់ឲ្យក្រុមចងការឲ្យបានឆាប់ បើសិនដូច្នោះទេ រូបថតស្រាតរបស់នាងនឹងត្រូវបង្ហោះជាសាធារណៈ។ ទោះជាសងប្រាក់អស់រួចក៏ដោយ នាងនៅតែព្រួយបារម្ភថា រូបអាក្រាតរបស់នាងនឹងត្រូវគេបង្ហោះដដែល។
ចាប់តាំងពីថ្ងៃពុធនេះមក ព័ត៌មានអំពីការផ្តល់កម្ចីជាមួយនឹងការបញ្ចាំរូបថតស្រាតត្រូវបានផ្សព្វផ្សាយកាន់តែទូលំទូលាយឡើង។ ក្រុមអ្នកប្រើប្រាស់អ៊ីនធឺណេតបានបញ្ចេញមតិយោបល់ជាច្រើនទាក់ទិននឹងបញ្ហានេះ ហើយបានចោទសួរថា ហេតុអ្វីក៏អាជ្ញាធរមិនយកចិត្តទុកដាក់នឹងរឿងនេះ។ នេះជាល្បិចថ្មីរបស់ក្រុមចងការប្រាក់ ដែលក្លាយជារឿងអាស្រូវថ្មីមួយទៀតនៅក្នុងសង្គមចិន៕
ប្រភព៖ Direct Matin
Tag:
ចិន
និស្សិតស្រី
© រក្សាសិទ្ធិដោយ thmeythmey.com
