កីឡាជាតិ
ជាតិ
ក្បាច់គុនបុរាណទាំងបីប្រភេទ ក្លាយជាក្បាច់គុនកងទ័ពខ្មែរជាផ្លូវការ
× ចាប់ពីថ្ងៃទី២២ខែមិថុនា ក្បាច់គុនបុរាណរបស់ដូនតាខ្មែរ នឹងត្រូវបញ្ចូលជាផ្លូវការទៅក្នុងមេរៀនប្រយុទ្ធរបស់កងយោធពលខេមរភូមិន្ទ។ លោក ហ៊ុន ម៉ាណែត នឹងធ្វើសន្និសីទកាសែតស្តីពីការចាប់ផ្តើមហ្វឹកហាត់ក្បាច់គុនបុរាណខ្មែរក្នុងវិស័យយោធានេះ។
គុនល្បុក្កតោ យុទ្ធក្រមខម និងក្បាច់ប្រដាល់សេរីខ្មែរ នឹងត្រូវបញ្ចូលទៅក្នុងកម្មវិធីហ្វឹកហាត់របស់យោធាខ្មែរជាផ្លូវការ ចាប់ពីរសៀលថ្ងៃពុធទី២២មិថុនានេះទៅ។ នេះជាការបញ្ជាក់របស់លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា។ ការបញ្ចូលក្បាច់គុនបុរាណខ្មែរទាំងបីក្រុមទៅក្នុងវិស័យកងទ័ពខ្មែរនេះ នឹងត្រូវធ្វើឡើងតាមរយៈពិធីចុះហត្ថលេខាលើអនុស្សារណៈយោគយល់ស្តីពីការចងក្រង និងបណ្តុះបណ្តាលក្បាច់គុនកងយោធពលខេមរភូមិន្ទ។ ពិធីចុះហត្ថលេខាដែលត្រូវរៀបចំធ្វើនៅគណៈកម្មាធិការជាតិអូឡាំពិកកម្ពុជា នឹងប្រព្រឹត្តទៅក្រោមអធិបតីភាព លោក ថោង ខុន ប្រធានគណៈកម្មាធិការជាតិអូឡាំពិកកម្ពុជា លោកនាយឧត្តមសេនីយ៍ ឥត សារ៉ាត់ អគ្គមេបញ្ជាការរងកងយោធពលខេមរភូមិន្ទ លោក ហ៊ុន ម៉ាណែត នាយរងសេនាធិការចម្រុះនៃកងយោធពលខេមរភូមិន្ទ រួមទាំងប្រធានសហព័ន្ធនៃក្បាច់គុនខ្មែរទាំងបីក្រុម។
លោក វ៉ាត់ ចំរើន ដែលជាប្រធានសហព័ន្ធកីឡាល្បុក្កតោកម្ពុជា បានពន្យល់ប្រាប់សារព័ត៌មានថ្មីៗថា ការឈានដល់ការចុះហត្ថលេខាបញ្ចូលក្បាច់គុនដូនតាខ្មែរទៅក្នុងវិស័យយោធាជាផ្លូវការនេះ បានបង្ហាញអំពីជំហានរីកចម្រើននៃវិស័យក្បាច់គុនខ្មែរ។ លោក វ៉ាត់ ចំរើន បន្តបញ្ជាក់ថា គ្រូក្បាច់គុនទាំងអស់នឹងសហការគ្នាចងក្រងសៀវភៅក្បាច់គុនសម្រាប់យោធាខ្មែរ ដើម្បីបង្ហាត់គ្រូបង្គោលជាយោធា មុននឹងក្បាច់គុនទាំងនេះត្រូវនាំយកទៅបង្ហាត់តាមអង្គភាពនានាក្នុងក្របខណ្ឌកងយោធពលខេមរភូមិន្ទ។
ប្រធានសហព័ន្ធកីឡាល្បុក្កតោកម្ពុជាអះអាងយ៉ាងដូច្នេះ៖«សុបិនយើងក្លាយជាការពិតហើយ។ វាជាក្តីស្រមៃរបស់យើងយូរហើយ ដែលចង់ឃើញក្បាច់គុនបុរាណខ្មែរត្រូវបានប្រើប្រាស់ដើម្បីការពារមាតុភូមិ ដូចដូនតាខ្មែរយើងបានធ្វើពីអតីតកាល»។ លោក វ៉ាត់ ចំរើន បន្តថា៖«វាក៏បានបង្ហាញអំពីជំហាននៃអភិរក្ស និងការអភិវឌ្ឍក្បាច់គុនខ្មែរដែរ»។
គួរបញ្ជាក់ថា ក្រោយពីពិធីចុះហត្ថលេខានោះ លោក ហ៊ុន ម៉ាណែត ដែលជាអនុប្រធានគណៈកម្មការរៀបចំក្បាច់គុននៃកងយោធពលខេមរភូមិន្ទ នឹងធ្វើសន្និសីទកាសែតផ្តល់ព័ត៌មានលំអិតស្តីពីការបញ្ចូលក្បាច់បុរាណខ្មែរចូលក្នុងវិស័យយោធានេះ។
បើតាមការអះអាងរបស់លោក វ៉ាត់ ចំរើន គុនល្បុក្កតោ ដែលកម្ពុជាគ្រោងស្នើចុះឈ្មោះចូលក្នុងបញ្ជីបេតិកភណ្ឌអរូបីនៃអង្គការយូណេស្កូ ក៏ត្រូវបានបញ្ចូលទៅក្នុងកម្មវិធីអប់រំកាយនៅតាមសាលារៀនទូទាំងប្រទេសកម្ពុជាហើយ។ សិស្សានុសិស្សចាប់ពីថ្នាក់អនុវិទ្យាល័យឡើងទៅនឹងបានស្គាល់កីឡាល្បុក្កតោខ្មែរចាប់ពីឆ្នាំសិក្សា២០១៧នេះទៅ៕
Tag:
ល្បុក្កតោ
ក្រមខម
ហ៊ុន ម៉ាណែត
វ៉ាត់ ចំរើន
© រក្សាសិទ្ធិដោយ thmeythmey.com